6
1 Mo hande titi panake pa:ta: opuma: Ketisona: pi manuna: homeke na ambula u hake pa wina: ipika: pi mandane ekimanu make handa:tia pomana:e. Da a:eyoma:ka:na:ta: oni hande amba: nokopoma: da ka:ta:ta: pa yoka noka:pa:tiki noka:pa:tiki pea:peke na ya:la:me. Koto tupa: kone nikana:ma: make mo Koda: pa:ta: hone tulaasa: titina: pimanu make mo teke na wiki hau pita:la: ekimanu mina:pa:lao hone la:ka:la:la: ekina: pimanu make 2 bapitaisi pita:la: hau manuna: pi wala:la:eki make youna: kiki wia yeni pita:la: haumanu make homa paa tiaasa: hau make Koda:na: pi yokaalu pea mo honiki na paeke homo hala: alena: tapaalo pa:la: ekina: wala:la: pimanu make koto amba: hande titina: waloma: pimanu na ambula u hake 3 pa mandane ekimanu make handa:tia pomana:e. Kutu piomono Koda:ma: niki pa:ta: waleke kia:ka:na:ta: kota: ota: putia polumeke.
4 Mandane wanda:halima:ta: mo hande amba: ika: hone tulaemekeeki mina:pa:laemeka:na:ta: pa ekipa ika: puki la:ka:la hone ma:nda: tulaena: handa: mea epomana:pe. Ikita: Koda:na: pa̱a̱ pa:la:eki tukiki pa:ta: amba: haemeke handa make mo hepeni nanema: pa hameke hala:la: hau ikana:ma: amba: pea handemeke handa make mo Holi Sipitidima: telipea yekeeki make mimiki handaata: 5 Koda:na: pi mea pea handa epekeeki yeke handaata: a:pa:la:me hone make wimiki handaata: Koda:na: wetepe epolo pa:la: natena: wele tiekena: wele wataa handemeke handaata: 6 kota: koto hau paeyao pea hoki naneta: ika: hone tulaemekeeki mina:pa:lao lopea:ka:na:ta: kota: iki paa la:ka:la a:pa hone tulaena: ma:nda:ma: ota: paa hatuku a:pa:pa:peke na ya:la:me. Dia:me. Ika: koto peleme ekima:ta: mo Koda:na: Eiyeketa: mo wanda:halina: leke popelekena: yaala:ma: homena: mo a:ka:tei wape piki tina: ipiki paa liki nono pitelememe.
7 Kenke ma:nda:ma: lako nalo hata: mo e handeteke hala: halina: ne anekema: opaeya:ka:na:ta: kota: koto kenketa: Koda:ma: wamo pita:la: kenkee. 8 Pate mo ka̱:la̱:ta: o hoke ambu homeke opa:la: kenketa: ipika: hoeyaalo pa:la:eki make teke pa:ta: ulume. Koto hoke ambu opita:la: kenketa: tima: yankilieke.
9 Nika: puki piki yankeke titio. Iki pa:ta: dupiki pi tieke aloma:pate pa mo da:ta:la: ekima: mea a:pa:la: wamo pita:la: haumanu pu haleme ekina: nikana:ma: koto piteme wanda:hali iki pa:ta: hone ma:nda: na witoloma:me. 10 Koda:ta: homeke pa:ta: homeke hone ula: Koda: dia:me. Ipikana:ma: mo ika: epeke e poka:lemekeeki make ika: Ketiso kame tonu tamba: mimieki make ame do pa tamba: mu haleme ekima: make koto hau pa:ta: yama:ta: ika: Koda: pa:ta: pukima: homelemeeki peneme yaasa:me. Koto piteme ekita: Koda:ma: hone na yonka:lapeke ya:la:me. 11 Koda:ma: ota: pina:e hone wilimieki iki pa:ta: ota: pina: kima: na homeke honkopu hao hata: mo hande epeke haumanu pa pea:tiki pu hamena: niki hone wopu pa:la:me. 12 Ikana:ma: soka:la: homeleme wanda:hali hamena: niki hone na pa:la:me. Kotoeki na pikita: mo hande mandane wanda:hali ika: hone tulaemeke hauma: make ika: epeke tupa: yu wia haemeke hauma: make koto hau yaapo pa:ta: yama: mo hande Koda:ma: la: ula: ekimanu mu haemekeme. Koto wanda:halina: hauta: ikana:ma: handa: muemena: hone witoloma:me.
Koda:ma: ota: yaalo pieke pi la: wiekeeki
13 Mo hande Eipoloha:ma: pa:ta: pi la: wieke dina: hali ma:nda:ta: ota: manda hala: hali ma:nda: ota: dia: yeke handaata: Koda:ma: ipika: biki kone laa ota: pi alo loa:me laa pi la: wiekeme. 14 Ipikana:ma: alota: I̱ma: neke epeaota: naka: hoki nane halo peleme tapaketa: ota: wopu haena: lolueke pita: I̱ma: ota: neke pa:ta: la: witolome leekeme. 15 Eipoloha:ma: mo pi la: wieke ale muluekema: yu wia hayeke handaata: koto pi la: wieke ekita: ota: miekeme.
16 Hali homeke ma:nda:ma: ota: pi loluekema:ta: kota: ota: mo paeyaona: bikimanu tombuao ota: manda hala: biki ula: halina: biki laa la: wita:la: pi lea:ka:na:ta: kota: koto pima:ta: mo pi yoka: alualu piki pi aleme ekimanu pa tunkulalieke. 17 Koda: make mo hande pi la: wiekeeki mulu peleme wanda:hali pa:ta: ipika: puluekee laa la: wiekeeki ota: topo na pea:peke ya:la:eki peneme yaaluekema: ipikana:ma: hali keke wita:la: pima: apa:tao la: wiekeme. 18 Koda:ma: koto topo pea:peke na yo yayapiki pi na lo pea:peke yekeeki yaapo wina: leekeme. Ipika: oto nane tinki pa haloma: wanda:hali nikita: nika: hone ti laloma:eki ota: miniki hamono yeke do koto pi yaapoma:ta: nika: puki tieke wopu mea tiala:me. 19 Do hone ti laloma: ekina:ta: nika: temoko epeke tupa: halo pa:la: ekina: da̱o̱la hasa: ekina: teke ula:me. Koto teketa: mo hepeni nane yeni pu hala: dana: tupele dau tieke hoki nane ula: yako piki da panda: tukiki nane yopua ula:me. 20 Niki tamba: muluekema:ta: koto yako piki da panda:na: pota: pilaluekema: Yesu amba:la amba: yapeekeme. Ipikana:ma: mo hande amba: hayeke some *Melekisedeke hayeke tupa: ipika: anke teke mea mo Yeni Peaasa: You Hali na paeke hao hala:me.