6
Wanda:halina: e pokaasa: tapakena: mana: pi
1 Mandane pa hameke e pokaaseme tapake ikana:ma: ika: you haliweki pa:ta: hone witolo hata: homu pea hapa:peke. Kutu pimika:na:ta: kota: mo pa haleme wanda:halima: Koda:na: biki pa:ta: make nika: aloma: mana: pimanu pa:ta: make ikana:ma: hoke pimanu na lelimikie.
2 Mandane pa hameke e pokaaseme tapakema: ika: you halita: *Ketiso hali haya:ka:na:ta: ipikita: nika: Ketiso yankeke hone witolo hata: paa pa alema: na handaapa:peke. Kotoeki na pikita: ikana:ma: dupiki hone witolo Ipikita: ya Ketiso kame haleka:na:ta: I̱ma: ipiki hone pa:la:me. I̱ma: ipika: e pokawa:ka:na:ta: ipikana:ma: do e pa:ta: yama: epeke ale mina:e hone wiaata: ikana:ma: amba: pokeme e tupa: na pokeketa: kotoeki lombei peao pokaapeke.
Makeaasa: hau wala:la: ekina: kinki pita:la: pimanu
Do alo pi manuta: nate paeyao wopu sa̱:tiaaso hata: wala:tiki pu hapeke. 3 Ma:nda: epima: mo hande nika: Tekehali Yesu Ketisona: ota: pi make mo nika: hone tulao yeni pita:la: hauna: mana: pimanu make kota: waloma: pi yaapo mandake na piki pa ta:ta: piki mana: pimanu a:pa walea:ka:na:ta: 4 kota: koto someta: hone na wiki hakoko lita:la: hali hala:me. Ipiki pa:ta:ta: hoke hone teke pila:me. Koto ekina: ipikana:ma: mo mana: pi teke manuna:ta: ape ape lo make pi yokaalu alu puluekema: hone wopu u hala:me. Ipika: kutu pita:la: ekima:ta: mo hone wopu epeke tupa: na handeteke haleme wanda:hali tukiki pa:ta:ta: I̱ I̱ ala: hau make ape ape la alualu pitolo hata: yaala: peake pi la alualu pu make na handoma: tiake hoke hone u alualu pita:la:eki make 5 kima: na homeke pi yokaalu alu pita:la: ekimanu make kota: hao paeyao mo wanda:hali tukiki pa:ta: wala: tiao hala:me. Kutu piki wanda:halima:ta: mo hande ota: pimanu mina:pa:laaso hata:ta: pa mo Koda:na: hau pita:la: ekita: hamoko hapeke pota:e hone u halememe.
6 Ota: ala:me. Hali ma:nda: epita: Koda: pa:ta: hone tulao hata: ipika: miniki hala: kenke ala:ta: ala:ta: ana:e hone wia:ka:na:ta: kota: koto someta: hamoko some hala:me. 7 Nikita: do kenkena: ipulu hata:ta: aleke miniki epoloma:pe. Ala:ta: ma:nda: na miniki epoloma:me. Pa do kenke mina:pa:laoma:ka:na:ta: aleke mea poluma:pe. Dia:me. Ala:ta: ma:nda: na mea polumeke. 8 Koto ekina:ta: nika: ne aka:manu ana:na: wia haoma:ka:na:ta: kota: kotota: ana:e. 9 Mo hamoko haluekema: hone pa:la: wanda:halita: ne wiaasa:eki muluekema: pea:ka:na:ta: ka:pei leke hondalieke. Ika: hone wopu na wiki hoeyaapeke ya:la: hoke hone manuma: iki yola: mea lopao ota: hoeyaalieke. 10 Mo mani we pamba:la: ekima:ta: ta:ta: ta:ta: piki hoke haumanu pu tialo pa:la: ekina: teke ula:me. Mandane wanda:halima: mani muluekema: hone wopu witolo hata: ika: hone tulao halemeeki mina:pa:lao hoke ka:nda: manuma: ika: puki tandama: homo haememe.
Timodi pa:ta: leeke mana: pimanu
11 Nakana:ma: Koda:na: hali hata:ta: koto hau manuta: mone hata: pina: kiao papate leke hapeke. Kutu puluekema:ta: kota: nakana:ma: mo tikitiki piki hau make Koda:na: hau leke pita:la: hau make hone tulaasa: hau make pukima: homa:la: hau make ki hone na wiki pita:la: hau make kimele piki hau pita:la: hau make koto hau paeyao ota: muluekee hone u paleke pu hapeke. 12 Wanda:halima: hoto neli kita:la: nate nina: mo hande tombo muluekema: honkopu hao a̱i̱ya pu halememe. Koto tupa: nakana:ma: make Koda: pa:ta: hone tulaaso hata: naka: deto hala: ekita: mo tombo wataasa: tupa: muluekema: ota: honkopu hao a̱i̱ya pu hapeke. Koto deto hala: ekita: nakana:ma: wanda:hali wopuna: leke popelekena: Koda: pa:ta: hone tulaasome alo hata: peneme yaeketa: kota: Koda:ma: muelena:yeke neke wi lea:me. 13 Mo ala:ta: ala:ta: paeyao da:taa wina: la:la: Koda:na: leke popelekena: hata: make mo hande Pontiasi *Pailedi pa:ta: ota: pi leeke Ketiso Yesu ipika: leke popelekena: hata: make I̱ma: neke pa:ta: dupa alome. 14 Mo pea:pekee laa neke pa:ta: la: ula: pi manuna: kakena: homa mo Tekehali Yesu Ketiso paa epolo pa:la: nate epena: handeteke hata: ota: hoeya hoeya na piki yopu miniki hao hapeke. 15 Mo Ketisona: paa la:ka:la epolo pa:la: nateta: Koda:ma: homeke handeteke hala: ekina: mo ponka: di pilu ula: nate opolo epea:ka:na:ta: kota: Koda:ma: Ketiso peneme yao mea halieke. Koda:ta: ta:na:ma: homa:la: ekina: teke hata: ipiki homeketa: wanda:hali paeyaona: handeteke hala: hali hala:me. Ipikita: mo kini haliweki paeyaona: Tumiki Kini hali make mo teke haliweki paeyaona: Tekehali make hala:me. 16 Ipiki homeketa: ipika: kone pa da:taa hao hala: Koda: hala:me. Wanda:halima: ipiki hala: teke pa:ta: pua:peke na yeke pa̱a̱ tieke pa:ta: hala:me. Ipikita: hali ma:nda:ma: ota: na handemeke yeke Koda: yeke handaata: ame make ota: ma:nda:ma: handa:peke na ya:la:me. Ipika: biki tieke ota: kende wina: make mo na paeyeke pa hao hala: Kilu Tombuao hala: ekina: wele make ipika:eki wina:e. Kutu pina:e.
Hamoko wanda:halina: mana: pi
17 Mo kenke ala:ta: ala:ta:na: hamoko haseme wanda:hali pa:ta:ta: dupiki pi la wia:peke. Ika: hakoko na lu make mo a̱i̱ paelo pa:la: kenke ale manuna: hone na ti lao hao hapa:peke. Kotoeki na pikita: niki ta:na:ma: homomono epeke alemanu ku hala: Koda: pa:ta: hone ti lao hapa:peke lapeke. 18 Koto wanda:hali ikana:ma: mandane wanda:hali pa:ta: epeke hau pipe laata: mo ika: tamba: mina:la: hau piteme ekima: hamoko hapa:peke laa lapeke. Ikana:ma: epeke moke pita:la: wanda:hali hata: ika: hamoko ale manuta: mandane wanda:hali pa:ta: pa teli pealuekema: tikitiki yao hapa:peke lapeke. 19 Koto hau a:nda: pu haemeka:na:ta: kota: ika: wetepe hapeke yolo pa:la: ekina: epeke teke u haena: lelimikie. Kutu pimika:na:ta: kota: mo ota: deto hala:eki miniki hao halimikie.
20 Timodio. Do Koda:ma: neke pa:ta: ka:la: eta: ota: wopu handeteke hapeke. Mo epe na piki Koda: mataake pimanu la kiteme pi manuta: kiaapeke. Mandane wanda:halima: makeaaso hata: Do aloma: pi manuta: ota: tumiki pie lo halememe. 21 Kutupa mandane wanda:halima: Koto aleme tumiki pita: nikana:ma: ota: hone uluma:me laa lemeke handaata: ikana:ma: mo hande ota: hone tulaasa: hauna: pota:ta: mina:pa:laememe.
Koda:na: a:ta:ma: homa tamba: mina:la: ekita: Timodi iki pa:ta: hao haena:e.