3
Nika:na: yeni peapa:peke laa leekeeki
1 Kametonuo. Paeyaaso pita: dupa. Tekehalina: pita: hande iki pa:ta: peo la:pa wia: tupa: mo mandane wanda:hali pa:ta: make a̱i̱ peo lena:e. Kutupa ikana:ma: do pita: seliapoe la kende tupa: wina: lena: nika:na: yeni peao hapa:peke. 2 Kutupa make wanda:hali paeyaoma: mo hande pina: hone na tulaasemeke handa mo hoke haliwekima: niki pa:ta: hoke hau peaama:na: Koda:ma: niki petelena: yeni peao hapa:peke. 3 Mo Tekehalima: hone homeke u haleke handa ikita: wele pealieke. Kutupa make Sadanima: iki hoeyaapa:na: handeteke halieke. 4 Kutupa ikana:ma:ta: epeke tupa: pilimikie hone witoloma: ekita: Koda:ma: niki pa:ta: ku hala:me. Koto ekina: ota: nika: honema:ta: nikana:ma: iki pa:ta: la ku haloma:eki manuta: ame do piteleme tupa: pa pu halimikie hone witoloma:me. 5 Ikana:ma: Koda:na: pukima: homa:la:eki make Ketisoma: ka:nda: pa:la:eki na mina:pa:lake taka:lao hayekeeki make hone uemena: Tekehalima: ika: hone witeleme ekita: tikitiki yao hatuku pena:e.
Wanda:hali paeyaoma: e poka:pa:peke aleo
6 Kametonuo. Tekehali Yesu Ketisona: bikina: dupa:pe aloma:me. Mo nikana:ma: loma: mana: pimanu opua na piki soka:la: pambeke kametiti pa:ta: apa:tao na hake ta:ta: hapa:peke. 7 Nikana:ma: puma: tupa: ikana:ma: make koto tupa: kone pea:pa:peke aleo. Koto ekita: ikana:ma: hone wotu wilimime. Nikana:ma: iki ame̱le̱ mandake hata:ta: soka:la: na hake haoma:me. 8 Ika: kimi neta: pa hameke na noma:pate hamboma:me. Nikana:ma: pa na pitu haoma:pate iki homeke homekena: mani paeyaama:na: yeke timba natena: e pokolo hata: e tieke pokoma:me. 9 Nikana:ma: ne kipa: lapeke na yeke dia:me. Kipa: lapeke yea:pate kone ikana:ma: nika: hau handa puemena: yeke kipa: pi na loma:me. 10 Nikana:ma: iki ame̱le̱ mandake hata:ta: dupa la kuma:me. Hali epima: e poka:la:eki kiaeya:ka:na:ta: kota: koto somema: ne napeke na ya:la:me.
11 Nikana:ma: doeki aloma: ekina: teketa: taa iki tukiki pa:ta: mandakena: haleme wanda:halita: soka:la: pamba pa pitu hata: mandane wanda:halina: pita:la:eki manuna: wakopu tia pomu dupi dupi la:tiki pu haleme ekita: opu haloma:me. 12 Tekehali Yesu Ketisona: bikina: koto wanda:hali pa:ta: iki handeteke hapa:peke laa pi dupa witoloma:me. Ikana:ma: pa na pomu lopo hake tikitiki yao hata: ika: halo peleme ekina: e pokolo hata: haena:e.
13 Kametonuo. Koto pa:la:pate ikana:ma: epeke hau pitolo hata:ta: soka:la:ma: na homa:pa:peke. 14 Mata:la: do tameiya:na: wape poloma: pita: iki homeke ma:nda:ma: na opilieke. Kutu pia:ka:na:ta: koto ipika: hau handolo hata:ta: ipikana:ma: yaaloma: homaena: mandakena: na apa:tao hapa:peke. 15 Kutupa ikana:ma: ipikita: a:nda: tunkuliki hali leke na haena: lo pelemepate pa Kameo. Yopu handeteke hae lo hapa:peke.
Wape paeyaaso pi
16 Mo Tekehali ipikana:ma: kone nika: a:nda: peliaasa: ekina: teke hata: ika: pota: paeyao pa:ta: hoto paeyao a:nda: peliaasa:eki ku haena:e. Tekehali iki paeyao ame̱le̱ mandakena: haena:e.
17 I̱ta: Polo ya kikima: kone wape pitolo hata: iki pa:ta: A:taloe alome. Tameiya: paeyaona: dupiki wapema: ya biki wape pu halome.
18 Nika: Tekehali Yesu Ketisona: a:ta:ma: homolo tamba: mina:la:eki iki paeyao pa:ta: haena:e.