11
Polo pita: makeaaso aposolo haliweki
1 Ikana:ma: I̱ta: hosiki hone wopu na wiki hake nono pimanu lono a̱i̱ na kiake waleke siki kipe laa honke alome. 2 Koda:ma: iki pa:ta: hone wopu witolo leke wia hala: tupa: I̱ma: make iki pa:ta: homeke hone wopu witolo hata: leke wia halome. Ikita: mo hande ma:nda:ma: hakopu na tunkuliki pa hala: moputali wandikima: handelememe. Kutupa I̱ma: koto wandikita: ota: hali homeke Ketisoma: kone mina: laa amba: la: ua:me. 3 Ika: hone manuta: hoeyaasa:eki manuma: mea bepolao ika: ota: Ketiso pa:ta: homeke ala:ta: ma:nda: na ta̱leke pukima: homelemeeki hoki walimikie laata: I̱ta: paala: pa:la:me. Mo hande ketona: hone wopu lenkene piki yayapiki pima: hande Ipa: makeaeyeke tupa: kone pilieke laa loa:me. 4 Pa ekipeke ikana:ma:ta: iki pa:ta: ma:nda: epima: a:pa mo Yesu ma:nda:na: wala:la: pita: pa ta:na:ma: homaa opu halememe. Mo nikana:ma: waloma: Yesuna: dia:me. Ikana:ma: mimi sipitidi pita: pi seliapo yaapota: ota: ta:ta: pa:la:me. Mo hande nikana:ma: mea epoma: Sipitidi pita: Pi Seliapo yaapo ota: dia:me.
5 I̱ma:ta: I̱ta: koto ika: mea a:meiyaaseme aposolo aleme haliweki ota: hosiki siki make oto pa:ta: halome hone na ulume. 6 I̱ta: ma:nda:ta: yaka pi alo pa:ta:ta: me̱i̱me̱i̱ lialopate pa mo hone witoloeki pa:ta:ta: ota: dia:me hone witolome. Nikana:ma:ta: hau paeyao pa:ta:ta: koto ekita: peneme yatiki pu haloma:me.
7 I̱ma:ta: iki pa:ta: mo hande Koda:na: Pi Seliapo waloa: dina:ta: ikita: ota: ala:ta: ma:nda:siki make yenki kipe pi na loa:me. Iki ota: aneke wanda:hali au laluekema: yeke I̱ma:ta: ya kone homu pea lu mina:niaowa:me. Kotota: ata:ka: piki hau pua:pe. 8 I̱ma: iki tukiki pa:ta: e pokoa: dina:ta: mandane siosi manuma: I̱ta: yenki kimime. I̱ma:ta: iki tamba: muluekema:yeke mo wanda:halina: mani pake neke nono pua:me. 9 Kutupa iki ame̱le̱ haowa: natena:ta: I̱ mani dia:yeketa: I̱ tamba: mipe laa iki pa:ta: ka:nda: peaapeke honke na loa:me. Pa ekipeke mo *Ma:sedonia nanema: epeme kame tonuma: I̱ dia:ya:la: ale paeyao aneke mea a:paememe. Amba: pua: tupa: wetepe nina: make I̱ta: iki ka:nda: homaaluekema: na taapulueke. 10 Ketisona: ota: pi I̱ pa:ta: pila:eki yalota: I̱ma: do yaka hakoko litolo pita: ota: koto *Akaya kenke paeyao pa:ta:ta: na palueke laa pi la: witolome. 11 I̱ma: do alo ekita: iki pukima: na homolome laa alope. Dia:me. I̱ma: iki pa:ta: pukima: homolo ekita: ota: Koda:ma: hone ula:me.
12 I̱ma:ta: ame do pitolo ekita: ota: pa pitolo ombu halueke. Pa ekipeke mo koto mandane *aposoloe lo haleme haliwekima: hakoko litolo hata: alota: Nikana:ma:ta: ikana:ma: pokeme tupa: kone pokoloma:me alemeeki sa:sa: puluekema: loa:me. 13 Koto haliwekita: ota: aposolo haliweki dia:me. Ikita: makeaaso aposolo haliweki hata: ika: pokeleme ena: yayapiki pi laata: ikita: Ketisona: ota: aposolo haliweki leke au lo halememe. 14 Kota: a:pa:la:ma: hone wopu wia:peke na ya:la:me. Pa ekipeke Sadanima: kone ipikita: mo pa̱a̱piki enisoloma: handeke nono pu hapeke ya:la:me. 15 Koto ekina:ta: ipika: pa hameke e pokaasa: haliwekima: iki make ota: tikitiki piki hauna: e pokaasa: haliweki hata: au lemeka:na:ta: kota: kotoeki hau tieke dia:me. Paetolo nate nina:ta: ika: pimi hauma: wala:la: yenki kone milimikie.
Polota: aposolo hata: mieke tandamanu
16 I̱ma: pa yaapo peao dupa alome. Ma:nda:ma: I̱ta: hone na wiki halie hone wia:peke na ya:la:me. Pate ikana:ma: koto hone wimika:na:ta: kota: a:pa:la:me. I̱ma:ta: hosiki siki hauna: hakoko liono I̱ta: hone na wiki hali leke handa: mipee. 17 Kota: ame I̱ma: do alo ekita: Koda:ma: I̱ma: lono lolo pi dia:me. Dupiki hakoko litolo ekita: ota:e mo hone na wiki somema: ala: tupa: alome. 18 Kutu pa:la:pate kenke hauna: hakoko liteleme wanda:hali wopu halemeeki yalota: I̱ma: make homeke hau pulueke. 19 Ikita: lombei peao hone wopu wilimieki yalota: mo hone na wiki haliwekita: ta:na:ma: homa handa: mu halememe. 20 Ikana:ma:ta: mo iki dupi dupi lo haleme haliweki make o iki teke puleke lao haleme haliweki make o iki hona:ma̱o̱ haleme o iki handa:niao haleme o iki kadapo ku haleme haliweki paeyao pa:ta: ta:na:ma: homolo hata: ika: pi opu halememe. 21 Nikana:ma:ta: kutupiki haumanu puluekema: doda:pikina: na puma:ta: laa loluekema: I̱ma: yaala: pa:la:me.
Pate ma:nda: epima: ala:ta: ma:nda:na: honkopu hao hakoko lulueke hone wia:ka:na:ta: kota: I̱ma: make hone na wiki some leke mandake tupa: loluekema: ana:na: honkopu hao pea:peke ya:lieke. 22 Ikita: Hibulu ya:ka:ta:pe kota: I̱ make lataa. Ikita: Isulai ya:ka:ta:pe kota: I̱ make lataa. Ikita: Eipoloha:ma:na: tapake ya:ka:ta:pe kota: I̱ make lataa. 23 Ikita: Ketisona: e pokaaseme haliweki ya:ka:ta:pe kota: I̱ta: you hoke halima: leke nono pitolopate I̱ta: e pokaaso hali hata: iki lombei peaalome. I̱ma:ta: lombei peaaso hata: oto honkopu hao e wopu pokolome. I̱ta: dipula da pa:ta:manu ota: lombei piki hoto eleke eleke mea pitaalememe. I̱ta: ota: lombei peake tupa: dopitama: yombelememe. Kutupa I̱ta: homa:la:eki tombona: teke pa:ta: ota: lombei piki natemanu mea:tiki polome. 24 Mo Diu tapakema: I̱ta: hoto yunki hata:na: minaata: puma: hoto 39 peao I̱ yombimime. 25 Kutupa hoto tepota: mo Loma: haliwekima: dopitama: I̱ yombimime. Kutupa hoto homeketa: toopima: I̱ limime. I̱ta: hoto tepota: mo sisima kawasota: toopina: tulaaso yambolo hoeya:tiki pua:me. Kutupa hoto ma:nda:ta: ota: nate homekena: ma:nda:ma: I̱ petelena: oni ikali manda pomua:me. 26 Yaka wopu pomua:tiki pu haowa: pa:ta: manuta: I̱ lia homaaluekema: mo ikali tieke tea: ekima: teke pa:ta: epea: make mo pake nala: haliwekima: make teke pa:ta: haememe. Mo Diu yankeke tonu pita: *Diendaili tapake yaapoma:ta: I̱ hoeyaaluekema: hone wimime. Mo daonimanu pa:ta: make hapu hayeke alemanu pa:ta: make dawala tieke manuna: make makeaaso yankeke tonu pa:ta: make ota: I̱ hoeyaapeke alemanu teke pa:ta: hatiki pu haowa:me. 27 Kutupa nate mandaneeki manuna:ta: honkopu paena: kone e wopu pokoa:me. Hoto eleke eleke timba: naneta: e pokaaluekema: u na polua:me. Nate ma:nda: nina:ta: I̱ta: tea:ma: make ikali na:na:ma: make homoa:me. I̱ta: nate ma:nda: nina:ta: ne da dau wopu dia:yalo hata: pa haowa:me. 28 Kutupa mandane haumanu wina: koneta: I̱ta: hoto paeyaota: mo siosi paeyao pa:ta: hone uluekema: I̱ ota: tumbaala:me. 29 Ma:nda: a:nda: damako pia:ka:na:ta: I̱ make homeke tupa: damako pu halome. Ma:nda: a:nda: hoke hau pa:ta: mea lopaeya:ka:na:ta: kota: I̱ta: ya puki pa:ta: ka:nda:ma: homolome.
30 I̱ma: hakoko lia:peke ya:ka:na:ta: kota: I̱ma: mo I̱ damako pitoloeki wala:la: ale manuna: hakoko lionoe. 31 Koda: mo Tekehali Yesu Ketisona: Atekema:ta: I̱ma:ta: yayapiki pi na alome laa hone wita:la:me. Ipika: bikita: hoto paeyao mea a:meiyamana:e. 32 I̱ta: mo Damasikasi daoni pa:ta: haowa: dina:ta: mo kini Aletasi oto pa:ta: haya: kapomani halima:ta: I̱ minina: alo hata: mo daoni pota: pa:ta:manu haliweki handeteke hao yapena: lea:me. 33 Pate I̱ta: mo daoni pape tea:na: lombaemeke seto ka:ka:na: windo pa:ta: yama: basekede nuna: pita:paleke lopaniao ipika: kiki pa:ta: ka:la:pa:ta: pao pindipa poa:me.