15
Ika: kone ta:na:ma: na homaake
1 Nikana:ma:ta: nika: hone tulao haloma:eki honkopu hao hata:ta: mo damako piki wanda:hali ika: ka:nda: pa:la: ekimanu meatia pena:yeke tamba: mumana:e. Nikana:ma: niki kone ta:na:ma: na homaamana:e. 2 Dia:me. Nika: *Ketiso yankeke ipika: hone tulaasa:eki sutialuekema: kota: niki paeyao homeke homekema: ipiki epeaaso ta:na:ma: homa:tiamana:e. 3 Ketisoma:ta: ipika: hone pa:la:eki na pu hayeke ekina:yeke loa:me. Dia:me. Hande *Baibolo bukana: wape pa:la: ekita: dupae. Wanda:halima: neke pa:ta: pi la la pimikieki manuta: I̱ pa:ta: kone pi la la pitolo pimikime laa wape pa:la:me. 4 Mo hande Baibolo bukana: wape pa:la: ekimanu paeyaota: niki waluekema: wape pea pelememe. Mo hande Baibolo bukana: wape pa:la:eki manuma:ta: niki sutia tia pitolo haena: niki tiao hata: mo hande la: ula: ekimanu yaena:yeke handeteke hao hamono ula:me. 5 Kutupa hande niki sutia tia pea handeteke hamono ala: Koda:ma:ta: ikana:ma: Yesu Ketisoma: pu hayekeeki telia: mea pulu hata: ika: ika: kone hone homeke u hamina: lea:ka:na:ta: epelieke. 6 Iki paeyaoma:ta: apa:tao hata: kake mandakena: wia hata: Tekehali Yesu Ketiso ipika: Apa: Koda:na: pi laamina:yeke loa:me.
*Diendaili wanda:halima: make hande Pi Seliapo opitelemeeki
7 Ketisoma: iki handa: minolo pia: tupa: ikana:ma: make iki ika: kone handa: mu alu alu pea:pa:peke. Wanda:halima: Koda:na: pi laena:yeke pea:pa:peke. 8 I̱ma: iki pa:ta: la kitolo ekita: dupae. Ketisoma:ta: Diu wanda:halina: e pokalo a:pa:la: ekita: Koda:ma: ipika: la: wieke pimanu ota: yao hala:me laa la kuluekema: pokalo epeekeme. Ketisoma:ta: Koda:ma: mo hande Diu wanda:halina: apa:mei pa:ta: la: wieke pimanu yalo a:pata: 9 mo Diendaili wanda:halima:ta: Koda: ipika: a:ta:ma: homa:la:eki minolo hata: Koda:na: pi laena:yeke epeekeme. Hande Baibolo bukana: wape pa:la:eki dupa
Koto ekina: I̱ma:ta: mo Diendaili wanda:hali ame̱le̱ hata:ta: naka: biki yeiya: lalueke.
I̱ma: emelimanu alo hata:ta: neke yeiya: lalueke laa wape pa:la:me.
10 Kutupa doeki make wape pa:la:me.
Diendaili wanda:halio. Koda:ma: talopu mea haena: la:la: wanda:hali ame̱le̱ hata:ta: ta:na:ma: homa:pa:peke laa wape pa:la:me.
11 Kutupa make
Diendaili wanda:hali paeyaoo. Ikana:ma: Tekehalina: pi laapa:peke.
Kenke ta:ta: ta:ta: pa:ta: haleme wanda:hali paeyao ikana:ma: ipika: pi wotu laapa:peke laa wape pa:la:me.
12 Kutupa *Aisayama: wape pa:la:eki make dupa
Diesina: tapake hali homeke ipilieke.
Koda:ma:ta: ipikita: Diendaili wanda:halina: you hali mea haena: lelieke.
Kutupa mo Diendaili wanda:halima: ipikina: ti lao hata: ipikana:ma: pita:la:eki homeke hando halimikie laa wape pa:la:me.
13 Mo hande ti lao haasa: ekina: teke hali Koda:ma:ta: ikana:ma: ipiki pa:ta: hone tulaaseme ekina: ta:na: tiekema: homelemeeki make puki lopa:niao halemeeki make iki pa:ta: tumbao pitaeya:ka:na:ta: epelieke. Kutupa ikana:ma: ipikina: ti lao hata: hando haleme ekita: mo Holi Sipitidina: welema: mea daeyatiki pina: lea:ka:na:ta: kota: kotota: epelieke.
Do wape pieke ekina: teke
14 Yaka kame titio. Ikana:ma: epeke haumanu putia pulu hata: mo piteleme ekimanu make wotu handelememe. Kutupa ika: ika: kone mana: la alualu pea:pa:peke ekita: I̱ma: ota: handa: ulume. 15 Koto pa:la:pate I̱ma: do wape poloeki pa:ta: ika: hone u tiaaso hata: taka:lake pi mandane ekimanu laa wape polome. Koda:ma: e tieke I̱ pa:ta: ka:leke handaata: I̱ma: na kita: yokake hata: wape pea polome. 16 Hande I̱ pa:ta: ka:la: eta: dupae. Yesu Ketiso ipika: e pokaaso hali hata: mo Diendaili wanda:halina: e pokaanoyeke ka:la:me. I̱ma: mo hande Koda:na: Pi Seliapo walaaso hata:ta: yeni peaasa: hali leke hata: pitolome. Mo hande Diendaili wanda:halita: Koda:ma: ta:na:ma: homolo hata: mina:yeke pa hala:la: ale leke haluekema: pitolome. Mo Holi Sipitidima: make mo hala:la: aleta: yako pina: ala:me. 17 Koto ekina: I̱ma:ta: Yesu Ketiso yaapo ta:ma:ni pea hata:ta: Koda:na: e pokao halo ekina: epeke pua:me laa ta:na:ma: homa:peke ya:la:me. 18 I̱ma: na kita: yokake hata: dupa lolo polopate Ketisoma: I̱ pa:ta: peaala:eki homeke lolueke. Diendaili wanda:halima: Koda:na: pi opua pina:yeke pua:me. Do pimiki ekina: teketa: dupae. I̱ma: loa: pimanu make pua: haumanu make 19 wele wotu pa:la: ekimanu make na hando haeme ekimanu make ipika: Sipitidima: wele wotu pia:eki make koto ekimanu paeyao handaata: pimikime. Koto ekina: I̱ma:ta: mo Diutuseleme da pa:ta: kini pu mea wala:tiki pua mo Ilitikumi nane kone mo hande Ketiso pa:ta: ipula: Pi Seliapo paeyao pa:ta: wala:niaowa:me. 20 Yaka hone witoloeki homeke dupae. Ketisona: biki na opiki pa hao haleme wanda:hali pa:ta: I̱ pua mo hande Pi Seliapo waluekema: hone u halome. Ma:nda:ma: pa:la:eki manda taapopao peaama:na: loa:me. 21 Hande Baibolo bukana: wape pa:la: ekita: dupa
Hande ipiki pa:ta: ipula: pi na opiki wanda:halima: handilimikie.
Kutupa pi na opimiki wanda:halima: hone wilimikie laa wape pa:la:me.
Poloma: Loma: da ipuluekema: hone wiekeeki
22 Koto pa:la: ekina: I̱ta: iki pa:ta: ipuluekema: pitolopate hoto eleke eleke pota: sa:sa: pia:tiki pia:me. 23 Kutu pua:pate ameta: hande hone ua: kenke paeyaomanu pa:ta: I̱ma: e poko paeyaalome. Kutupa bapi wopu I̱ma: iki handolo ipuluekema: hone wia:tiki pua: ekina: 24 ame ipulueke laa hone pa:la:me. I̱ta: Sipeini kenke nane yapuluekema: yopuluta: titina: amba:la iki handuluekema: hone pa:la:me. Iki ame̱le̱ hosiki a:pa haota: pa mo Sipeini kenke nane poa:ka:na:ta: kota: ikana:ma: I̱ tamba: mimika:na:ta: epelieke hone witolome. 25 Kutu pulu polopateto ame dota: mo Diutuseleme da nane haleme Koda:na: wanda:hali tamba: mulu pulume. 26 Do I̱ polueke alo ekita: mo hande *Ma:sedonia *Kitiki kenke yaapo nane haleme siosi wanda:halima:ta: mo hande Diutuseleme da nane haleme Koda:na: wanda:hali pa mandane natehali wanda:hali pa:ta: mani haluekema: hone wilimi ekina: pulu loa:me. 27 Mo mani haleke hauta: ikana:ma: ika: hone wia kone halo pelemepate koto hauta: ikana:ma: ota: pea:pa:peke ale kone pitelememe. Mo hande Diu wanda:halima:ta: Koda:ma: ika: temokomanu epeala:eki manuta: Diendaili wanda:hali pa:ta: teli teli peaalememe. Koto peleme ekina: mo hande Diendaili wanda:halima:ta: ika: wia haleme alemanu Diu wanda:hali pa:ta: teli teli peao halemeka:na:ta: epelieke. 28 Ikana:ma: amu pea wialeme mani paeyao mea pua haloa:ka:na:ta: kota: koto eta: poko paeyaalueke. Kotoeki pu paeyaota: I̱ta: koto pa:ta: mina:pa:lao mo Sipeini kenke nane yopulu hata: iki amba:la a:pa handulueke. 29 I̱ epoa:ka:na:ta: kota: Ketisoma: iki ota: wotu epeaena:yeke ipuluekema: loa:me.
30 Ya kame titio. Nikana:ma: Tekehali Yesu Ketiso pa:ta: hone tulao haloma: ekina: make mo Holi Sipitidima: hande pukima: homa:la:eki niki pa:ta: ka:la: ekina: make ikana:ma: make I̱ma: make honkopu hao mandake dina: Koda: pa:ta: ya yeni peaama:na:yeke I̱ma: iki sutiaaso loa:me. 31 Doeki yaapona: yeni peaapa:peke. Ma:nda:ta: Diudia nane haleme pi na miki haliwekima: I̱ hoeyaama:na: loa:me. Ma:nda: make dupa. Mo Diutuseleme da nane haleme Koda:na: wanda:halima: I̱ma: iki tamba: mulu poloeki mina:yeke loa:me. 32 Kutu pimika:na:ta: Koda:na: hone pa:la: ekina: I̱ma: ta:na:ma: homa: paleke iki pa:ta: ipulueke. Kutupate nika: mandakena: halo poloma: ekima: I̱ ta:na:ma: homaalieke. 33 Mo hande puki lopa:niaasa:eki pu tiaasa: teke hali Koda:ma: iki paeyao ame̱le̱ mandakena: haya:ka:na:ta: kota: epelieke. Kutu pina:e.