10
1 Yaka kame titio. Yaka puki pa:ta: witolo hone tieketa: yaka tapake hande Diu wanda:halima: da:ta:la:eki muemena:yeke hone witolo ekina: loa:me. I̱ma: iki pa:ta: hone witolo hata: Koda: pa:ta: yeni pu halome. 2 Ikana:ma: Koda:na: hau puluekema: hone wotu peleme ekita: I̱ma: handa alome. Kutu pitelemepateta: ikana:ma: Koda:na: hau puluekema: hone peleme ekita: ota:eki hando hoeyaaso hata: pitelememe. 3 Wanda:hali Koda:ma: ipiki yaapo tikitiki yao haena: la:la: pota: ikana:ma: na handa: wiki ikana:ma: ika: kone Koda: yaapo tikitiki haluekema: pimikime. Kutu pimiki ekina: Koda:ma: wanda:hali ipiki yaapo tikitiki yao haena: la:la: pota:ta: kiao haemekeme. 4 Mo hande *Lo Pimanu wieke dita: *Ketisoma: paeyaala: ekina: ameta: hone tulaaseme wanda:halita: Koda:ma: ipiki yaapo tikitiki yao haena: ala:me.
Wanda:hali paeyaoma: da:ta:la:eki mea:pa:peke ya:la:eki
5 Mo hande wieke Lo Pimanu opieke halita: Koda: yaapo tikitiki yao haluekema: pita:la:eki pa:ta: Mosesima: dupa wape pa:la:me. Hali epima: mo hande Lo Pimanu opua pu haya:ka:na:ta: kota: da:ta:la:eki milieke. 6 Koto la:la:pate hande Koda: pa:ta: hone tulao hata: ipiki yaapo tikitiki yao haluekema: pita:la:eki pa:ta: mo Baibolo bukana: wape pa:la: ekita: dupae. Nakana:ma: naka: kone dupa lota: na pea:peke. Oli hepeni naneta: epi a:meiliepe laa lea:ka:na:ta: kota: mo Ketiso niki pa:ta: hola:pa:niao epena:yeke honke lolo a:meilu pele ekina: loa:me. 7 Dupa make na lota: pea:peke. Oni homemeke wanda:hali pambo hao haleme alena: epi hola:pa:niao peliepe. Kotota: mo Ketisota: niki pa:ta: paa la:ka:la opa:liaena:yeke honke lolo hola:pa:niao lolo pele ekina: loa:me. 8 Mo Baibolo bukana: wape pa:la: ekima:ta: doeki ala:me. Koda:ma: la:la: pita: papate na ulu pa:la:me. Ika: puki pa:ta: make mendiata: ika: kakema: make lapa:peke ya:la:me laa wape pa:la:me. Hande pita: nikana:ma: walo haloma: pi kone wanda:halima: hone tulaena: la:la: ekita: dupa. 9 Nakana:ma: naka: kakema: Yesuta: Tekehali hala:me laa peneme yao alo make naka: puki pa:ta: Koda:ma: Yesu homa lapa: pa:ta: wieke alena: paa mea tiaeyekeme laa hone tulaeka:na:ta: kota: da:ta halipikie. 10 Do ekina:yeke loa:me. Nika: puki pa:ta: hone tulaasoma: ekina: Koda:ma: nikita: ipiki yaapo tikitiki yao hamono ala:me. Nika: kakema: peneme yao aloma: ekina: nikita: da:ta haloma:me. 11 Kota: mo hande *Baibolo bukana: wape pa:la: ekita: dupa
Hali epima: ipiki pa:ta: hone tulaeya:ka:na:ta: kota: hone ka:nda:ma: homa na halieke laa wape pa:la:me.
12 Koto wape pa:la: ekita: wanda:hali paeyao pa:ta: la:la:me. Diu wanda:hali make *Diendaili wanda:hali make paeyaota: homeke tupa: da:ta hapa:peke ekina: loa:me. Wanda:hali paeya tapaona: Tekehali homeke kone hala:me. Kutupa make epi ameda paeyaoma: ipika: biki laa honke lemeka:na:ta: kota: ipikana:ma: iki wotu epeaalieke. 13 Mo hande Baibolo bukana: wape pa:la: ekita: dupa
Epi ameda paeyaoma: Tekehalina: biki laa honke lemeka:na:ta: kota: da:ta halimikie laa wape pa:la:me.
14 Kutu pulu pelemepate ikana:ma:ta: hone na tulaake hata:ta: ekipa ipika: biki alo hata: honke lelimikipe. Kutupa make hande la:la: pita: na opiki hata:ta: ekipa hone tulaalimikipe. Kutupa hali ma:nda:ma: hande pi na walea:ka:na:ta: kota: ekipa opilimikipe. 15 Kutupa hande pi mea pua walaaseme wanda:hali na tapaemeka:na:ta: kota: ekipa pi walaalimikipe. Mo hande Baibolo bukana: wape pa:la: ekita: dupa.
Mo ota: epeke pi seliapo mea a:paaseme wanda:halina: anke manuta: ota: yole pea ula:me laa la:la:me.
16 Kutu pa:la:pate hande Pi Seliapota: pea: paeyaoma: opua puki pa:ta: na mea mendielememe. *Aisayama: ipikana:ma: kone alota:
Tekehalio. Do nikana:ma: waloma: pita: epima: opua hone tulaala:pe laa leekeme.
17 Koto ekina: pi opita:la: ekima: wanda:halima: hone tulaasememe. Kutupa hali ma:nda:ma: Ketisoma: pa:la:eki wala:la: ekima: wanda:halima: pi opitelememe.
18 Kutu pitelemepate I̱ma: lota: pitoloeki dupae. Hande pita: wanda:halima: na opelememe ala: ekita: ota: alemepe. Dia:me amba: opimime. Hande Baibolo bukana: wape pa:la: ekita: dupa
Mo pi mea puaaseme haliwekina: kakema: lemeke pi manuta: kenke paeyao pa:ta: amba: pa:la:me.
Ikana:ma: lemeke pi manuta: kenke honiki pa:ta: haleme wanda:halima: amba: opelememe laa wape pa:la:me.
19 I̱ma: paa lota: pitolo ekita: dupa. Isulai wanda:halima:ta: hande pita: hone na wimikipe. Dia:me. Ikana:ma: opua kone halememe. Mosesima:ta: Koda:na: pi lawaaso hata: ipikana:ma: amba:la pi alo alota:
I̱ma:ta: pa ika: ta:ta: pea hao haleme wanda:hali ota: tapake tieke na haleme wanda:hali kone mea haena: loa:ka:na:ta: ikana:ma: hoke hone witolo hata: I̱ma: pitolo ekina: sokulama: homilimikie.
Kutupa mo hone wopu na witeleme wanda:hali I̱ma: mea haena: loa:ka:na:ta: ikana:ma: kutu pitolo ekina: mineke pankelimikie laa wape pa:la:me.
20 Kutupa Aisayama: Koda:na:eki lawaaso hata: doolema: na homeke dupa leekeme.
I̱ na weimi wanda:halima: kone I̱ handa: wimime laata: I̱ haloeki lota: na pimi wanda:hali pa:ta: kone yaka kone peneme yao waloa:me laa leekeme.
21 Koto leekepate paa ipikana:ma: mo Isulai wanda:hali pa:ta: Koda:na:eki lawaaso hata: alota:
Yaka pi na opiki I̱ kiaaseme wanda:hali pa:ta: kone I̱ma:ta: epoe la alo hano nate opa pa pambolo yapea:me laa leekeme.