6
Yesuma: 5 daoseni wanda:hali ne haleekeeki
1 Koto pimanu laata: mo hande tunkula:pa pitieke Ka:lili ikali mone tea:na: pa la:ka:la peekeme. Koto ikali biki ma:nda:ta: Taibitiasi lo hala:me. 2 Wanda:hali paeyaoma:ta: Yesuma: mo yeni haemeke wanda:halina: yeni tandeleaaso hata: wele wopu pieke ekimanu handemeke ekina: Yesu telia: mea pemekeme. 3 Yesuta: eli ma:nda: a:meiya pua ipika: *disaipolo haliweki ame̱le̱ pitimikime. 4 Hande Diu wanda:halina: *Lombei Pupa Yapeeke nate ipuluekema: haena: peekeme. 5 Yesuma: lekema: lekema: pea handaata: mo wanda:hali paeyao epemekeeki handata: Pilipi pa:ta: alota: Do wanda:hali paeyaota: ne ana:na: halomana:yeke neta: hando pa:ta: hambomana:pe leekeme. 6 Pilipima: pulu pa:la:eki handuluekema: leekeme. Yesuma: ipika: pulu piekeeki amba: hone wiekeme.
7 Pilipima: ipika: pi hombo peaaso alota: Do wanda:hali paeyaoma: ne hosikisiki kone nena:yeke palaowa hambaasota: 200 kina kone ana: na pilieke. 8 Ipika: disaipolo hali ma:nda:ta: Saimono Pidana: hameke A:ndutuma: alota: 9 Do hala: weki ma:nda:ma: *bali palaowa punka yunki hata: make ta:peli yaapo make wia hala:pate do wanda:hali paeyao yolo hata: ana:na: napeke na yelieke. 10 Yesuma: iki pa:ta: alota: Wanda:hali pitiniao pitinina: lape leekeme. Noma: wopu opa:la: alena: pitimikime. Koto ekina: wanda:hali paeyao pitimikipate haliweki paeyao diminiekepate 5 daoseni tupa: pitimikime. 11 Yesuma: hande palaowa meata: Koda: pa:ta: keiyae pi laata: mo pitimiki wanda:hali pa:ta: teli teli peaeyekeme. Mo hande ta:peli yaapo make koto tupa: teli teli peaeyekeme. Kutupa mo wanda:hali paeyao ika: hone pieke tupa: kone mea nemekeme. 12 Wanda:hali paeyao ne naa weleke hao pitina: Yesuma: ipika: disaipolo haliweki pa:ta: alota: Mo hande ne putupilikimanu minolota: popusunu kone na wina: lapa:peke leekeme. 13 Koto leeke handa mo haliwekima:ta: hande *bali palaowa yunki hata: nemeke wanda:hali paeyaoma: naa wina: lemeke putupilikimanu paeyao mea basekede nuna: mendimikipate 12 basekede numanu tumbaemekeme.
14 Mo wanda:halima:ta: Yesuma: koto pa:ta: wele wopu piekeeki hando hao alota: Do halita: hande kenkena: epolo pa:la: ota: *Potopede hali ya:ka:ta:me lemekeme. 15 Mo wanda:halima:ta: koto pa:ta: kone Yesu ta:nka:pa: mina ika: kini hali haena: loluekema: hone wimikieki Yesuma: handaata: ipika:siki paa la:ka:la mo yu eli pa:ta:manu peekeme.
Yesuma: ikali manda peekeeki
16 Welealo naneta: Yesu ipika: disaipolo haliwekita: oni tunkula:pa pitieke ikali kendo pa:ta: hola:pa:niaota: 17 kawaso pa:ta: pua pita Kapeneami nane poluekema: mo ikali tunkula pemekeme. Kutupa timba: leekepate Yesuta: mo haliweki pa:ta: a̱i̱ na opolo peekeme. 18 Kutupa pulu haena:ta: po tilipu tieke ipulu hata: ikali ho a:meiyekeme. 19 Mo disaipolo haliwekima: deli awa tia 5 *kilomida o 6 kilomida tupa: pemekepate Yesuta: kawaso pa:ta: ipuluekema: ikali manda anke hao epeekeeki handaata: paala:ma: wopu homemekeme. 20 Yesuma: iki pa:ta: alota: Paala:ma: na homa:pa:peke dota: I̱e leekeme. 21 Mo haliwekima: Yesuta: mo kawaso tukiki pa:ta: pitulu epena:e hone wimikime. Kutupa mo hande kawasota: ika: opolo polo pimiki alena: kuta kone opolo pemekeme.
Wanda:halima: Yesu weimikieki
22 Kutupa da kelepeeketa: hande tunkula:pa pitieke ikali mone tea:na: mina:pa:lao pemeke wanda:halima:ta: mo kawaso homeke wiekeeki amba: hone wimikime. Mo disaipolo haliwekita: Yesu iki ame̱le̱ mandakena: na pitiki pa ika: kone pemekeeki make hone wimikime. 23 Mandane kawaso manuta: Taibitiasi nane hao a:paata: hande Tekehalima: keiyae pi laa mo wanda:hali paeyao pa:ta: palaowa teli teli peaeyeke ikali tea:na: kone opolo epemekeme. 24 Wanda:hali paeyaoma: Yesu na hayekeeki make ipika: disaipolo haliweki na haemekeeki make handaata: kawaso manuna: pita Kapeneami da nane Yesu weilu pemekeme.
Yesuta: da:ta:la: palaowa konee
25 Mo wanda:halima:ta: Yesuta: mo hande tunkula:pa pitieke ikali mone tea:na: hayekeeki handaata: ipiki pa:ta: alota: Disao. Do pa:ta: handima: a:pa pipe lemekeme. 26 Yesuma: ika: pi hombo peaaso alota: Iki pa:ta: ota: pi alome. Hande wele pita:la:eki pua:eki handeme ekina: I̱ weiya mea na epeke hande palaowa naa weleke haemeke ekina: hone witolo hata: I̱ weiya mea ipulimime. 27 Paeya:peke ne muluekema: hone anepu na wiki pa u hapekeeki muluekema: hone wotu wia:peke. Koto ekita: da:ta:la:eki kone hoto paeyao pa u halieke. Apa: Koda:ma: *Wanda:halina: Eiyeke mea haena: la:la: ekina: Eiyekema: koto neta: iki pa:ta: mea kilieke.
28 Koto leeke handa mo wanda:halima: Yesu pa:ta: lota: pitolo alota: Koda:na: pita:la: ekimanu puluekema:ta: nikana:ma: eki puluma:pe. 29 Yesuma: ika: pi hombo peaaso alota: Koda:ma:ta: ikana:ma: dupa puemena:yeke hone pa:la:me la Koda: ipikana:ma: tapaala: hali pa:ta: hone tulaamina: hone pa:la:me leekeme. 30 Mo wanda:halima: ipika: pi hombo peaaso alota: Nikana:ma: neke pa:ta: hone tulamonoyeke eki wele pita:la:eki ma:nda: nikana:ma: handomono pilipikipe lemekeme. 31 Nika: apa:mei amedama: mo hande hapu hayeke alena: hata:ta: hande *ma:na netiki pu haemekeme. Hande Baibolo bukana: wape pa:la: tupa: Palaowa nena:yeke hepeni nane hata: hala:niaeyekeme. 32 Yesuma: mo wanda:hali pa:ta: alota: Iki pa:ta: ota: pi alome. Mosesima:ta: hepeni nane palaowa iki na kitolo pia:me. Yaka Apa:ma: hepeni nane ota: palaowata: iki kia:peke ya:la:me. 33 Do hande Koda:ma: kita:la: palaowata: ipikana:ma: hepeni mina:pa:lao hola:pa:niao a:paata: kenke wanda:hali pa:ta: da:ta:la:eki hala:la:me leekeme. 34 Mo wanda:halima: ipiki pa:ta: alota: Aneke halio kutupiki palaowata: niki pa:ta: hoto paeyao ku hapeke. 35 Yesuma: mo wanda:hali pa:ta: alota: Da:ta:la: palaowata: I̱ konee laata: Hali epima: I̱ pa:ta: epea:ka:na:ta: tea:ma: paa na homilieke. Kutupa hali epima: I̱ pa:ta: hone tulaeya:ka:na:ta: ikali na:na: paa na pilieke leekeme.
36 I̱ma: iki pa:ta: loa:pate ikana:ma: I̱ta: handaa kone hone na tulaasememe. 37 Yaka Apa:ma: I̱ pa:ta: kita:la: wanda:hali paeyao I̱ pa:ta: ipilieke. Koto ekina: hali epima: I̱ pa:ta: epea:ka:na:ta: I̱ma: ota: na tolu lueke. 38 I̱ma:ta: oli hepeni nane hao hola:pa:niao a:pa yaka hone pa:la:eki puluekema: na epeke I̱ tapaala: halina: hone pa:la:eki puluekema: epolo ekina: loa:me. 39 I̱ tapaala: halina: hone pa:la: ekita: do hau pionoyeke tapaala:me dupae. Ipikana:ma: I̱ pa:ta: ka:la: wanda:halita: homeke a:nda: I̱ma: na alupaake hande paelie dina:ta: paeyao I̱ma: pa mea tiawaanoyeke tapaala:me. 40 Yaka Apa:na: hone pa:la:eki dupae. Eiyeke handaa ipiki pa:ta: hone tulaaseme wanda:hali paeyaota: deto hala:eki mina:yeke hone pa:la:me. Kutupa mo hande paelie dina: make I̱ma: mo wanda:hali pa mea tiawaalueke leekeme.
41 Yesuma: mo hepeni nane hao hola:pa:niao epoa: da:ta:la: palaowata: I̱ konee leeke ekina: mo wanda:halima: ipiki pa:ta: tulu tulu leekeme. 42 Koto ekina: mo wanda:halima: alota: Do halita: Yesue la Diosepena: eiyeke na hala:pe laata: inkiki ateke yaapo amba: handoloma:me. Ekipeke I̱ta: oli hepeni nane hao hola:pa:niao epoa:me ala:pe lemekeme. 43 Yesuma: ika: pi hombo peaaso alota: Ikana:ma: I̱ pa:ta: tulu tulu aleme pi paapa:peke leekeme. 44 Hali ma:nda:ta: I̱ pa:ta: ipuluekema:ta: pa hameke a:pa:peke na ya:la:me. I̱ tapaala: hali yaka Apa:ma: hali ma:nda: I̱ pa:ta: epena: yola: mea epea:ka:na:ta: I̱ pa:ta: ipilieke. Kutupa koto halita: mo hande paelie dina: I̱ma: pa mea tiawaalueke. 45 Mo hande potopede haliwekima: wape pa:la:eki dupae. Koda:ma: wanda:hali paeyao wala: tiaalieke wape pa:la:me. Hali epima: hande Apa:na: pi opua pia:ka:na:ta: I̱ pa:ta: ipilieke leekeme. 46 I̱ma: do alo ekina: aloma: hali homeke ma:nda:ma: hande Apa: ota: na handa:la:me. Koda: yaapo hao do a:pa hala: halima: homeke handa:la:me. 47 Iki pa:ta: ota: pi alome laata: I̱ pa:ta: hone tulaasa: halita: da:ta hao hala:me. 48 Da:ta:la: palaowata: I̱e laata: 49 Ika: apa:mei amedama:ta: mo hande hapu hayeke alena: hata: ma:na palaowa nemekepate homemekeme. 50 Kutu pimikipate oli hepeni nane hao hola:pa:niao epeeke palaowata: hali epima: koto palaowa nea:ka:na:ta: na homilieke. 51 Oli hepeni nane hao hola:pa:niao a:pa:la: da:ta:la: palaowata: I̱e leekeme. Hali epima: do palaowa nea:ka:na:ta: da:ta hao halieke. Kutupa mo hali pa:ta: I̱ma: halo polo palaowata: yaka loke mindiki kone halueke. Kenke wanda:hali paeyaoma: da:ta:la:eki mina:yeke yaka loke mindiki halueke leekeme.
52 Koto leekeeki opuata: mo Diu haliwekima: ika: ika: kone ape la alu alu pitolo alota: Do halima:ta: ipika: loke mindiki nikana:ma: nomonoyeke ekipa kiliepe laa lota: pimikime. 53 Yesuma: iki pa:ta: alota: Iki pa:ta: ota: pi alome. Wanda:halina: Eiyeke ipika: loke mindiki make ipika: we make na nemeka:na:ta: ika: kone da:ta:la:eki na milimikie. 54 Hali epima: yaka loke mindiki make yaka we make nea:ka:na:ta: da:ta hao hala:me. Kutupa mo hande paelie dina: koto halita: I̱ma: pa mea tiawaalueke. 55 I̱ma: do alo ekita: do ekina:yeke loa:me. Yaka loke mindikita: ota: nee kutupa yaka we make ota: ikalie leekeme. 56 Hali epima: yaka loke mindiki make yaka we make nea:ka:na:ta: ipikita: I̱ pa:ta: halieke. Kutu pia:ka:na:ta: I̱ make ipiki pa:ta: halueke. 57 Da:ta hala: Apa:ma: I̱ tapaeya:me. Kutupa ipiki hala: ekima: I̱ make halome. Koto pa:la: ekina: hali epima: I̱ nea:ka:na:ta: kota: koto halita: I̱ haloa: ekima: da:ta halieke. 58 Koto ekina: do ekita: hande hepeni nane hao hola:pa:niao a:pa:la: palaowae laata: hande ika: apa:mei amedama: naa homemeke palaowa tupa: dia:me. Hali epima: do palaowa nea:ka:na:ta: da:ta hao halieke leekeme. 59 Do la:la: pi manuta: Yesuma: mo Kapeneami nane hayeke pi hotu haemeke da pa:ta: hata: waleeke pimanue.
Mo da:tao hala: pi
60 Ipika: disaipolo haliweki wopuma: koto leekeeki opua alota: Do pita: ka:nda: wopu piki pie. Epi amedama: opua:peke ya:la:pe lemekeme. 61 Koto haliwekima: ipika: leeke ekina: tulu tulu lemekeeki Yesuma: hone wia kone mo haliweki pa:ta: alota: Do alo pina: ki hone witelemepe. 62 *Wanda:halina: Eiyeketa: amba: hao epea: nane paa la:ka:la polo pa:la:eki handemeka:na:ta: eki piliepe. 63 Loke mindikima:ta: niki tamba: mea:peke na yelieke. Mo hande Sipitidima: kone da:taapeke ya:la:me. I̱ma: iki pa:ta: loa: pi manuta: Sipitidina:eki make da:taapekeeki make loa:me. 64 Koto pa:la:pate iki ame̱le̱ haleme mandane haliwekima: I̱ pa:ta: hone na tulaasememe leekeme. Ipiki pa:ta: hone na tulaalo peleme haliwekita: Yesuma: amba: kone hone wiekeme. Ipiki lina: a:nda: lombolo polo pieke hali make amba: kone hone wiekeme. 65 Ipikana:ma: alota: Hande iki pa:ta: amba: loa: ekita: do ekina:yeke loa:me. Hali ma:nda:ta: hande Apa:ma: na peaeya:ka:na:ta: koto hali I̱ pa:ta: a:pa:peke na ya:la:me leekeme.
66 Koto leeke handaa Yesu ipika: hoki nane telimiki haliweki wopuma: Yesu kiao mina:pa:lao ipiki ame̱le̱ paa na pomu haemekeme. 67 Koto ekina: Yesuma: hande 12 disaipolo haliweki pa:ta: alota: Ikana:ma: make I̱ kiao pelimikipe. 68 Saimono Pidama: ipika: pi hombo peaaso alota: Tekehalio. Epi pa:ta: pomonope. Naka: pi manuta: da:tao hala: pimanue. 69 Neketa: Koda: ipika: Yakopiki Hali hale ekita: nikana:ma: hone tulao hao amba: handoloma:me leekeme. 70 Yesuma: ika: pi hombo peaaso alota: Iki 12 haliwekita: I̱ma: na talopu mea hamina: loeke yekea. Kutu pua:pate iki ame̱le̱ hala: hali homeketa: hoke temoko hala:me leekeme. 71 Koto leeke ekita: ipikana:ma: mo Isekatioti hali Saimonona: eiyeke Diudasi pa:ta: leekeme. Ipikita: hande 12 haliweki ame̱le̱ haemeke hali kone wetepeta: Yesu lina:yeke a:nda: lombeekeme.