4
Yesu mo hande Sametia wanda: yaapo
1 Koto natena:ta: mo hande *Pa:tisi haliweki pa:ta: pi dupa la:niaeyekeme. Yesuma: disaipolo wanda:hali wopu meaata: bapitaisi peao pita:la: ekima: Dionima: pita:la: ekita: wetepe yaasa:me laa la:niaeyekeme. 2 Koto la:niaeyekepate Yesu ipikana:ma: bapitaisi na peaake ipika: disaipolo haliwekima: homeke bapitaisi peatiki pimikime. 3 Koto la:niaeyeke pita: Yesuma: make opuaata: mo hande Diudia nane mina:pa:lao mo Ka:lili nane peekeme.
4 Koto nane pulu hata: *Sametia nanema: lopa:la: peekeme. 5 Kutupa Sametia lopa:la: puaata: daoni homeke pa:ta: opolo peekeme. Koto daoni bikita: Saika lemekeme. Mo da teketa: hande Dieikopema: ipika: eiyeke Diosepe pa:ta: haleeke kenke teke pa:ta: hayeke dae. 6 Koto kenke pa:ta: Dieikopema: aweeke naku pa:ta: ikali pitiekeme. Kutupa Yesuta: pota:na: ipu hao anke litu pieke mo naku ikali teke pa:ta: pitiekeme. Nate you tikekena: haena: pitiekeme.
7 Kutupa pitina: Sametia wanda: homekema: ikali nolo epeekeme. Yesuma: ipiki pa:ta: alota: Ikali ma:nda: nono kie leekeme. 8 Ipika: disaipolo haliwekima: mo daoni pa:ta: ne hambolo pena: pita: leekeme. 9 Mo Sametia wanda:ma: Yesuna: pi hombo peaaso alota: I̱ta: Sametia wanda: halopate neketa: Diu hali hata: kone ekipeke I̱ pa:ta: Ikali ma:nda: nono kie laa honke alepe leekeme. Koto Sametia wanda:halima: ika: ne ikali no haemeke kawaso manuta: mo Diu wanda:halima: yola: alu pea napeke na yeeke handa loa:me. 10 Yesuma: ipika: pi hombo peaaso alota: Nakana:ma:ta: Koda:ma: kita:la: ale make neke pa:ta: Ikali ma:nda: nono kie laa honke ala: halina: biki make hone wika:na: yoluta: kota: naka: honke aleeki ipikana:ma: opua da:ta:la: ikali kulu pia:me leekeme.
11 Mo wanda:ma: ipiki pa:ta: alota: Aneke halio. Do nakuta: ota: oni pa:ta: leke awa:niaala:me. Koto pa:la: ekina: neketa: ipi kanake na wia halepate da:ta:la: ikali ekipa naa kuluekema: alepe laata: 12 Nika: apa:mei Dieikopema:ta: do naku ikali niki pa:ta: ka:la:me. Do ikalita: ipikana:ma: make ipika: eiyeke titima: make ipika: ma:na: manuma: make na:tiki pu haemekeme. Neketa: Dieikope ankulaluekema: alepe leekeme. 13 Yesuma: mo wanda: pa:ta: alota: Hali epima: do naku ikali naa haota: wetepena: make ikali nena: pa pea:tiki pilieke. 14 Kutu piliepate hali epima: I̱ma: halolo ikali naa haya:ka:na:ta: koto halita: ikali nena: paa na pilieke. I̱ma: do alo ekita: do ekina: yeke loa:me. I̱ma: halolo ikalita: mo hali tukiki pa:ta: pita: opa:la: ikali kone pitilieke. Kutupa hande ikalima:ta: opolo hata: mo halita: da:tao haena: lelieke leekeme.
15 Mo wanda:ma: ipiki pa:ta: alota: Aneke halio. Nakana:ma: koto ale ikalita: I̱ ma:nda: kie leekeme. Kutupa wetepena: ikali nena: paa na pitolo hata: do naku ikali nolo paa na ipulueke leekeme. 16 Yesuma: ipiki pa:ta: alota: Naka: haliki amba:la wi lolo puaata: do pa:ta: paa a:pa:peke leekeme. 17 Mo wanda:ma: alota: I̱ta: hali dia:me leekeme.
Koto leeke handaa Yesuma: ipiki pa:ta: alota: Nakana:ma: I̱ta: hali dia:me ale ekita: ota: pi aleme. 18 Neketa: yunki hata: haliwekina: da amba: pekepate ame do halepe hali make ota: naka: haliki dia:me laata: Nakana:ma: ale ekita: ota:ekie leekeme. 19 Mo wanda:ma: ipiki pa:ta: alota: Aneke halio. Ameta: neke handolome laa Koda:na: pi la: mea halo hale hali ya:ka:ta:me leekeme. 20 Nika: apa:mei amedama: niki Sametia wanda:hali pa:ta: Do pote pa:ta: pua mombela Koda: pa:ta: yeni pea:pa:peke laa lemekepate Diu haliweki ikana:ma: alota: Diutuseleme da pa:ta: pua mombela Koda: pa:ta: yeni pea:pa:peke alememe leekeme.
21 Yesuma: ipiki pa:ta: alota: Wanda:o. I̱ma: do aloeki opua:peke. Nate ma:nda: ipilieke laa koto nate epea:ka:na:ta: kota: do pote pa:ta: hata: make oli Diutuseleme da pa:ta: hata: make wanda:halima:ta: hande Apa: pa:ta: yeni na pilimikie laata: 22 Iki Sametia wanda:hali ikana:ma: yeni piteleme ekita: epi pa:ta: pitelemepe. Ikana:ma: wopu na handelememe. Kutu pitelemepate niki Diu wanda:hali nikana:ma: yeni pitoloma: ekita: epi pa:ta: pitoloma:pe kota: ota: handoloma:me. Pa ekipeke mo wanda:hali da:taasa: ekita: Diu wanda:hali pa:ta: kini pea ipula:eke handa loa:me leekeme.
23 Koto pa:la:pate wetepe hande epolo pa:la: nateta: ame amba: a:pa:la:me. Kutu pa:la: ekina: ota: yeni piteleme wanda:halima:ta: Apa: pa:ta: yeni pimika:na:ta: ika: temokoma: make ota: hau pitolo hata: make yeni pilimikie leekeme. Koto tupa: ipiki pa:ta: yeni piteleme wanda:halita: Apa:ma: hone pa:la:me. 24 Koda:ta: temoko tekee. Koto pa:la: ekina: ipiki pa:ta: yeni piteleme wanda:halima:ta: ika: temokoma: make ota: hau pitolo hata: make ipiki pa:ta: yeni pea:peke ya:la:me leekeme.
25 Mo wanda:ma: ipiki pa:ta: alota: Mo hande *Mesaya ipika: biki ma:nda:ta: *Ketiso epolo pa:la:eki hone witolome. Ipiki a:paata: hau paeyao pita:la:eki la kilieke leekeme. 26 Yesuma: ipiki pa:ta: alota: Nakana:ma: koto ale halita: I̱ konee laata: Neke yaapo do pi alopa: halie leekeme.
27 Koto pi alo haena:ta: ipika: disaipolo haliweki paa opolo epemekepate Yesu mo wanda: yaapo pi alo haepekeeki handaata: hone ta:ta: ta:ta: wimikipate hali homeke ma:nda:ma: Aleke muluekema: alepe o Ipiki yaapo ekipeke pi alepe laa pa na lota: piekeme.
28 Kutupa mo wanda:ma: ipi kanake mina:pa:lao mo daoni nane puaata: koto pa:ta: haemeke wanda:hali pa:ta: alota: 29 Hali ma:nda: handoemena: ipupe laata: I̱ma: amba: pua: ekimanu paeyaota: ipikana:ma: la kia:me laata: Ipikita: hande Ketisope leekeme. 30 Koto leeke ekina: mo wanda:halita: daoni mina:pa:lao Yesu handolo pemekeme.
31 Koto hau pitolo haena:ta: hande disaipolo haliwekima: Yesu honke alo alota: Disao. Ne ma:nda: nae lemekepate 32 Yesuma: ika: pi hombo peaaso alota: Ya neta: ma:nda: ula:pate ikana:ma: na handeleme leekeme. 33 Koto leekeeki opuaata: mo disaipolo haliwekima: ika: kone ane la: mone la: pitolo alota: Ma:nda:ma: ipika: ne mea a:pao halea:pe lemekeme. 34 Yesuma: iki pa:ta: alota: Yaka neta: dupae. I̱ tapaala: halina: hone pa:la:eki puluekema: make ipikana:ma: I̱ pa:ta: walea: e make pokao paeyawaaluekema: loa:me leekeme. 35 Kota: ika: aleme pita: dupae. Sumba: tonkopu yapea:ka:na:ta: ne napeke naa pilie natena: poka: mepi pilimikie lo halemepate I̱ma: iki pa:ta: alota: Emanu lekema: lekema: pea:pa:peke. Ame kone ne napeketa: naa pa:leke handaa poka: mepi pia:pa:peke ya:la:me leekeme. 36 Ne napeke poka: mepi pita:la: halima:ta: ipika: yenki minolo hata: mo hande ne napekemanu mea pua momba:la wia:ka:na:ta: da:ta hao hala:eki kone yelieke. Kutu pia:ka:na:ta: ne wae noka:pa:la: hali make napeke poka: mepi pita:la: hali make ipiliki telipina:ma: ta:na:ma: homilipipikie leekeme. 37 Kutu pita:la: ekima: mo hande lo haloma: pi ma:nda: dupa yaasa:me. Hali ma:nda:ma:ta: ne wae noka:pa:la:pate pa hali ma:nda:ma:ta: mo ne napeke poka: mepi pita:la:me aloma:me laata: 38 Ikana:ma: na pokeme e pa:ta: kone ne napekemanu poka: mepi puemena:yeke iki tapaalome. Kutupa mandane haliwekima: pokeme e pa:ta: kone ikana:ma: ne napeke poka: mepi pulu pelemepateta: mo amba: haliwekima: honkopu hao pu wilimi hauna: pitelememe leekeme.
39 Mo hande wanda:ma: I̱ma: pua: ekimanu paeyao ipikana:ma: la kia:me leeke ekina: mo daoni pa:ta: haemeke Sametia wanda:hali wopuma: Yesu pa:ta: hone tulaemekeme. 40 Koto ekina: mo hande Sametia wanda:halima:ta: Yesu pa:ta: puaata: Niki ame̱le̱ hosiki hao polena:e laa honke lemekeme. Koto lemeke handa hoto yaapo Yesu koto pa:ta: haemekeme.
41 Kutupa mandane wanda:hali wopuma: ipikana:ma: waleeke pi opitolo hata: ipiki pa:ta: hone tulaaso hata: mo wanda: pa:ta: alota: 42 Ameta: ipiki pa:ta: hone tulaasoma: ekita: nakana:ma: lele ekina: hone na tulaake nikana:ma: kone ipika: pi opuaata: ipikita: kenke wanda:hali hande mea Da:taasa: Hali ota: hala:me hone witoloma:me lemekeme.
Yesuma: mo kapomani halina: eiyeke mea tiaeyekeeki
43 Yesuta: hoto yaapo koto pa:ta: hao pa Ka:lili nane peekeme. 44 Yesuma: ipika: kone leekeme dupae. *Potopede halita: ipika: ota: da teke pa:ta: haya:ka:na:ta: ipika: biki na wilieke leekeme. 45 Ipikana:ma: mo Ka:lili nane opolo peeke dina:ta: wanda:hali paeyaoma: ipiki handa: mimikime. Do ekina: yeke loa:me. Mo wanda:hali ika: kone Diutuseleme nane puaata: hande *Lombei Pupa Yapeeke pita:ta: ne nalo hata: Yesuma: pieke haumanu paeyao amba: handemekeme.
46 Kutupa Yesuta: mo Ka:lili nane hayeke da Keina pa:ta: opolo peekeme. Amba:ta: koto da pa:ta: hata: Yesuma: ota: ikali kone waini ikali pitina: leekeme. Koto da pa:ta:ta: kapomani hali homeke hayekepate ipika: wekita: Kapeneami da pa:ta: yeni hayekeme. 47 Koto halima:ta: Yesuta: Diudia nane mina:pa:lao Ka:lili nane a:pa hala:me leekeeki opuaata: Yesu pa:ta: peekeme. Yesuma: mo Kapeneami nane pua ipika: homoluekema: taapo pitieke weki mea tiaena:yeke honke leekeme. 48 Yesuma: mo hali pa:ta: alota: Ikana:ma: hau tieke ipula:eki handolo homeke pa hone tulaasememe leekeme.
49 Mo hande kapomani halima: alota: Aneke halio. Yaka weki homaapa:na: dika: mandakena: pana:e laa leekeme. 50 Yesuma: ipiki pa:ta: alota: Naka: weki tiaaliekema: pue leekeme. Hande halima: Yesuma: leeke pi opua hone tulao hao peekeme. 51 Mo ipika: da nane paa poluekema: pulu haena: ipika: e pokaemeke haliwekima: pota:na: manda:hande pea alota: Naka: weki tiao pila:me lemekeme.
52 Ipikana:ma: mo haliweki pa:ta: lota: pitolo alota: Ya weki hosiki tiaeyeke hauta: nate hando pa:ta: haena: piekepe laa lota: pieke handaa mo haliwekima: ipika: pi hombo peaaso alota: Ambaneke nate lekelo yopulu haena:ta: ipika: hoputiti yenita: tandelea:me lemekeme. 53 Atekema: hone witolota: Ambaneke koto natena: kone Yesuma: I̱ pa:ta: alota: Naka: weki tiaalieke laa lea:me hone wiekeme. Koto ekina: mo halima: make ipika: weki wanda:ma: make hone tulaemekeme.
54 Yesuta: Diudia nane mina:pa:lao Ka:lili nane pua hayeke pita:ta: do wele wopu pieke ekita: hoto yaapo peaoeki piekeme.