7
Apa:meina: mana: pimanu
1 *Pa:tisi haliweki make mandane *wape pea wala:tiki pu haemeke haliweki make Diutuseleme da mina:pa:lao a:paata: Yesu pa:ta: mombelemekeme. 2 Kutupa Yesuna: *disaipolo haliwekima: na tandepemeke kikima: ne nemekeeki handemekeme. Mo Pa:tisi haliwekima: dupiki tandepea:peke laa lemeke tupa: kiki na tandepemekeme.
3 Hande Pa:tisi haliwekima: make Diu haliweki paeyaoma: make apa:meina: haumanu pu haemekeeki hone witolo hata: ne noluekema: kiki amba:la tandepo haemekeme. 4 Kutupa makedina: hao a:paata: ikali a̱i̱ na peki hata:ta: ne a̱i̱ na netiki pu halememe. Ika: apa:meina: titina: haumanu make wopu opua pu halememe. Koto ekina: kapomanu make sosepenimanu make kopama: wepiki metekimanu make bedi make tandepo halememe.
5 Kutupa mo Pa:tisi haliwekima: make mo wape pea wala:tiki pu haemeke haliwekima: make Yesu pa:ta: lota: pitolo hata: alota: Naka: disaipolo haliwekima: ika: ateke meiyekena: haumanu na opiki ekipeke kiki hoke ekima: ne no halemepe lemekeme.
6 Yesuma: ika: pi hombo peaaso alota: Ikita: yayapiki hau pu haleme haliwekie laata: *Aisayama: iki pa:ta: pi walolo hata: wape piekeeki dupa.
Do wanda:halima: ika: hambilikima: yaka biki mea a:meiyaasemepate ika: puki pa:ta: hone ta:ta: witelememe.
7 I̱ pa:ta: pa hameke panda: puniao yeni pu halememe. Pa ekipeke ikana:ma: Dota: Koda:na: pi wieke ekimanue alo hata: pa ika: ateke meiyekena: wimikieki kone walo halememe laa
wape piekeme laata:
8 Yesuma: ombu alota: Koda:na: pi ula: ekimanu na waleke ika: ateke meiyekena:eki kone walo halememe leekeme.
9 Kutupa ipikana:ma: iki pa:ta: alota: Koda:na: pi ula: ekimanu mina:pa:laota: ika: ateke meiyekena: hau pimiki ekimanu pu haleme ekita: epeke hau pitolo pimipe laata: 10 Mosesima: alota: Naka: ama: apa: yaapo oto pa:ta: hapeke la:la:me. Kutupa ipika: apa: ama: pa:ta: hoke pi ala: halita: ota: homena: lia:pa:peke la:la:me leekeme. 11 Koto leekepate ikana:ma: alota: Hali ma:nda:ma: ipika: apa: ama: pa:ta: alota: Ipiliki pa:ta: kulu polo ala:ta: ameta: Kobana ula:me lea:ka:na:ta: kobana la:la: ekita: Koda:na: ekie 12 kota: ikana:ma:ta: mo halima: ipika: apa: ama: pa:ta: koto ala:ta: hala:peke na ya:la:me lo halememe. 13 Do tupa: ika: ateke meiyekema: pimiki ekimanu opitolo hata: Koda:ma: la:la: pita: alupaasememe. Kutupa ika: hoki nane telieleme haliweki make walo halememe laata: Koto tupa: kone mandane haumanu make pu halememe leekeme.
Wanda:halina: puki ha̱i̱ peaasa: ekimanu
14 Kutupa Yesuma: wanda:hali ipiki pa:ta: epena:yeke paa wi lemipi piekeme. Kutupa iki pa:ta: alota: Iki paeyao ya pi opua hone wia:pa:peke. 15 Wanda:halita: hama: nane ula: alemanu mea naloma:eki manuma: na hoeyaalo pa:la:pate tukiki nane wia ipula: ale manuma: kone wanda:hali hoeyaapeke ya:la:me.
17 Ipikana:ma: wanda:hali mina:pa:lao da tukiki pa:ta: honda: pambeeketa: ipika: disaipolo haliwekima: onkoluma: leeke ekina: ipiki pa:ta: lota: pimikime. 18 Kutupa ipikana:ma: iki pa:ta: alota: Kotota: iki make pi teke hone na witelemepe leekeme. Yonkeleke hama: nane ula: alemanu mea naloma:eki manuma: tukiki nane pea:ka:na:ta: hoeyaapeke na ya:la:me. Koto ekita: hone na witelemepe. 19 Ekipeke. Neta: ipika: puki pa:ta: na peke ipika: weleke pa:ta: puaata: hoke ale yapilieke leekeme. Koto pi leeke handaata: Yesuma: nemanu paeyaota: pa napeke ana: pa:la:me leekeme.
20 Kutupa ipikana:ma: alota: Wanda:hali tukiki pa:ta: wia ipula: ale manuma: wanda:hali hoeyao halememe leekeme. 21 Wanda:halina: puki tukiki pa:ta: wia hone pa:ta: ipu hala: hau manuta: dupae. Hoke honemanu make loke apa:taasa: hau make pake nala: hau make hali homena: lita:la:eki make 22 tooli ka:taasa: hau make we pamba:la: hau make hoke hoke hau make yayapiki hau make pamba: na piki hau make ne tunkula:la: hau make pi lala pu handaena: hau make hone na wiki hau make 23 do haumanu paeyaota: puki pa:ta: pita ipulu hata: wanda:hali hoeyao halememe leekeme.
Wanda: ma:nda:ma: hone tulaeyekeeki
24 Yesuma: koto alena: mina:pa:lao Taiya nane peekeme. Mo da homeke ma:nda: honda: pambaata: wanda:halima: ipiki handaama:na: a:mbao panka pituluekema: peekepate a:mbaapeke na yeekeme. 25 Koto kone wanda: ma:nda:ma: Yesuna: pieke haumanu opuaata: Yesu pa:ta: a:pa ipika: anke pa:ta: panda: puniaeyekeme. Koto wanda:na: wandikita: weleke pa:ta: hoke temoko pitieke handaata: piekeme. 26 Ipikita: Sitia nane hala: da Pinisia wanda: kone hayekepate Kitiki pi lo hayekeme. Ipika: wandikina: weleke tukiki pa:ta: pitieke hoke temoko Yesuma: tolu lina:yeke honke leekeme. 27 Honke leekepate Yesuma: ipiki pa:ta: alota: Weki wandiki sunuma: ne amba:la nena:e leekeme. Wekiwandiki sununa: neta: kika sunu pa:ta: mea lopaeya:ka:na:ta: ana: na pilieke leekeme.
28 Koto leekepate koto wanda:ma: alota: Tekehalio. Ota: alepate weki wandiki sunuma: pindipu lopa: lopa: piteleme ekimanu tokele pa:ta: kika sunuma: no halememe leekeme.
29 Kutupa Yesuma: mo wanda: pa:ta: alota: Koto pi leeke handaata: a:pa:la:me. Pue. Hoke temokoma: naka: wandiki mina:pa:lao opolu bao pea:me leekeme.
30 Kutupa ipika: da puaata: ipika: wandiki da panda: pa:ta: peli hake wiekeeki handeekepate mo hoke temoko amba: peekeme.
Yesuma: katake poko pi na lo pieke hali epeaeyekeeki
31 Yesuma: Taiya nane la:ka:la: minaata: mo Saidoni nane make Daoni kiki yaapo haemeke kenke nane make lombei pupa Ka:lili ikali leke pa:ta: opolo peekeme. 32 Koto pa:ta: wanda:halima: mo pi na opu na lo pieke hali homeke Yesu pa:ta: hatuku epemekeme. Yesuma: ipika: kikima: mo halina: loke wataena:yeke honke lemekeme. 33 Kutupa Yesuma: ipiki hosiki mopateleke wanda:hali na hayeke pa:ta: hatuku mea pua ipika: kiki ma̱leke mo halina: katake ka:ka:na: pa:ta: pankaata: kutupa dopi taata: ipika: kiki ma̱leke yola: mea mo halina: kekekena: makeke mea kitaeyekeme. 34 Kutupa oli ya nane handa:liaaso hata: pomoma: homata: Yesuma: ipiki pa:ta: alota: Epa:da:e leekeme. Koto pita: Lomba:e laa leekeme.
35 Koto kone ipika: katake yaapo lumbupa wiaata: ipika: kekeke tindipao hayeketa: kutupa pi epeke tupa: leekeme. 36 Yesuma: wanda:hali paeyao pa:ta: mana: honkopu hao alota: Ma:nda: pa:ta: do pitoloeki na lapa:peke leekepate kone wanda:halima: pa honkopu hao la:tia tia pea hande leeke pita: kende tupa: wina: lemekeme. 37 Koto pita:la:eki opimiki wanda:hali paeyaoma: ota: wopu penkilipa:tia pomua:tiki pitolo hata: alota: Ipikana:ma: hau paeyao pieke ekina: epeke tupa: pu hala:me laata: pi opua:peke na ya:la: halima: opina: pi lapeke na ya:la: halima: pi lena: lo hala:me laa lemekeme.