46
Dieikope tapake Idiepi pemekeeki
1 Dieikopema:ta: ipika: wia hayeke alemanu paeyao talo peaata: Biasiba nane peekeme. Koto pateta: ipika: ateke Aisa:kena: Koda: pa:ta: yeni hau piekeme. 2 Koto timbata: upama: leke ale Koda:ma: ipiki pa:ta: pi alo alota: Dieikopeo Dieikopeo leeke ipikana:ma: hombo peaaso alota: Wao. I̱ do handa:e leekeme.
3 Tekehalima: alota: I̱ta: Koda: naka: apa:na: Koda:e. Idiepi poluekema:ta: paala:ma: na homa:peke. I̱ma:ta: naka: monduma: monduma: pilipi wekiwandikina: wekiwandikita: koto pate tapake tieke haena: lolueke. 4 I̱ma:ta: neke yaapo oni Idiepi nane mandakena: puaata: naka: monduma: monduma: pilipi wekiwandikina: wekiwandikita: do kenke nane paa hatuku ipulueke. Koto pateta: mo Diosepe neke yaapo mandakena: haena: neke homilipikie laa leekeme.
5 Kota: Dieikopeta: Biasiba mina:pa:laeyekeme. Ipika: weki tonuma:ta: mo hande Idiepi kinima: tapaeyeke ma:na:ma: yola:la: pota: ale manuna:ta: ika: ateke make ika: hosiki wekiwandiki sunu make ika: weteke tonu make pitaemekeme. 6 Ika: mo Keinani hata: mimiki alemanu paeyao make ma:na:manu make mea Idiepi nane pemekeme. Dieikopema:ta: ipika: monduma: monduma: pieke wekiwandikina: wekiwandiki paeyao hatuku peekeme. 7 Ipika: wekitonu make ipika: weki tonuna: wekitonu make ipika: wandikitonu make ipika: waneke tonuna: wandikitonu make paeyao hatuku peekeme.
8 Mo Dieikope ame̱le̱ oni Idiepi nane pemeke ipika: tapaketa: mupeke weki Lubeni 9 make Lubenina: eiyeke tonu Ha:noko make Palu make Hesetoni make Kami makee. 10 Kutupa Simiono make ipika: wekitonu Diemuelo make Diamini make Ohadi make Diakini make Soha make Siolo makee. Do weki Siolota: mo Keinani wanda:na: wekie. 11 Lipai make ipika: weki tonuta: Kiesoni make Koha:di make Metati makee. 12 Diuda make ipika: weki tonuta: Sela make Petese make Sita makee. Diudana: eiyeke yaapo Ea pita: Onane yaapota: Keinani haemeke toma:na: kone amba: homepekeme. 13 Isaka make ipika: weki tonuta: Tola make Pua make Yope make Simitoni makee. 14 Sebuloni make ipika: weki tonuta: Setede make Elono make Dialieli makee. 15 Do weki tonuta: oni Mesopoteimia hata: Liama: Dieikopena: mendiaeyeke weki tonue. Liama: wandiki Daena make mendiaeyekeme. Koto paeyao siki yata:polota: Lia pa:ta: yama: Dieikope ipika: monduma: monduma: pieke wekiwandiki paeyaota: 33 yekeme.
16 Ka:de make ipika: wekitonu Sepedoni make Haki make Siuni make Eseboni make Eti make Atodi make Ateli makee. 17 A:sia make ipika: weki tonuta: Imina make Isipa make Isipi make Betia make ika: ana: Seta makee. Betiana: eiyeke yaapota: Heba pita: Malakiele yaapoe. 18 Do 16 wekiwandikita: mo hande Leibenima: ipika: waneke Lia pa:ta: haleeke pa hameke e pokaasa: wandiki Silipama: Dieikopena: mendiaeyeke wekiwandikie.
19 Dieikopena: weteke Leisoloma:ta: Dieikope ipika: weki Diosepe pita: Benisamini yaapo mendiaeyekeme. 20 Oni Idiepi kenketa: mo Heliopolisi da pa:ta: yeni peao hayeke hali Podipitana: waneke A:sena:dema:ta: Diosepena: weki Ma:na:sa: pita: Ipoteimi yaapo mondu wiayekeme. 21 Benisaminina: eiyeke tonuta: Bela make Bekea make A:sa:bele make Keta make Naamani make Ehi make Otosi make Mupimi make Hupimi make Ada makee. 22 Koto 14 weki tonuta: mo Leisoloma: pa:ta: yama: Dieikopena: mendiaeyeke wekiwandikie.
23 Da:ni make ipika: weki Husimi makee. 24 Na:petali make ipika: wekitonu Diasiele make Kuni make Diesa make Silemo makee. 25 Do watake hata: tapaketa: mo hande Leibenima: waneke Leisolo haleeke pa hameke e pokaasa: wandiki Bilihama: pa:ta: yama: Dieikopena: monduma: monduma: pieke wekiwandikie. 26 Kota: mo Dieikopena: eiyeke tonuna: weteke tonu na yata:peke pa mo ota: Dieikopena: monduma: monduma: pieke wekitonu homeketa: paeyao 66 oni Idiepi nane pemekeme. 27 Kutupa Diosepena: oni Idiepi mendiaeyeke weki yaapo apa:taasota: mo Dieikopena: oni Idiepi nane pu haemeke tapake paeyaota: 70 yekeme.
Oni Idiepi nane Dieikope pita: ipika: tapake haemekeeki
28 Dieikopema:ta: Diosepema: mo Kosene kenke pa:ta: iki a:pa manda:hande pina: honke lena:yeke Diuda amba:la tapaeyekeme. Kutupa mo tapake opolo pemeketa: 29 Diosepema: ipika: hosima: yola:la: pota: ale pitulu pua Kosene kenke pa:ta: ateke manda:hande pulu peekeme. Kutupa mo pate pua ateke manda:hande pitolo hata:ta: Diosepema: ipika: kiki bao mo atekena: make yola: mea hopulolo hata: e̱ tieke lo hokulu peayekeme. 30 Dieikopema: Diosepe pa:ta: alota: I̱ma: neke paa haeka:ta:ma: laa handolo hata:ta: kota: ameta: I̱ta: homuluekema: tikitiki yao halome leekeme.
31 Kutupa Diosepema: ipika: hameke tonu pa:ta: make mo atekena: tapake paeyao pa:ta: make alota: I̱ma:ta: mo kini pa:ta:ta: oli Keinani haeme yaka kametonu make yaka apa:na: tapake paeyao I̱ pa:ta: epelememe laa amba:la lolo polueke. 32 Kutupa I̱ma: ipiki pa:ta: dupa lolueke. Ikita: sipisipimanu handeteke hao haleme haliweki make ma:na:manu punu haleme haliweki make yalo hata: ika: ma:na:manu make e wae alemanu make ika: wia haleme alemanu paeyao make mea epelememe laa pua lolueke. 33 Koto ekina: mo kinima: iki wi la: mea ika: pu haleme ekita: aleke ka:ta:pa: laa lota: pia:ka:na:ta: kota: 34 mo hande ika: apa:meima: pu haemeke tupa: koto ika: haleme andusa:ta: ma:na:manu handeteke hao haloma:me laa lapa:peke. Dupa lemeka:na:ta: kota: mo Kosene kenke paeyao pa:ta: hape laa la:lieke leekeme. Diosepema: dupiki pi leeke ekita: mo Idiepi tapake paeyaoma:ta: mo sipisipi handeteke haleme wanda:hali iki ame̱le̱ hama:na: ota: kiaemeke ekina: leekeme.