43
Mo hama̱la̱: hama̱la̱:ma: Benisamini hatuku Idiepi pemekeeki
1 Oni Keinani naneta: mo tea: kita: ota: hoeyekeme. 2 Kutupa mo Dieikopena: tapakema: mo hande Idiepi nane hambolo pua mea epemeke widita: na:ta: paota: Dieikopema: eiyeketonu pa:ta: alota: Paa pua nika: ne tepo a:nda: ma:nda: pua hamba:pee leekeme.
3 Diudama: ateke pa:ta: alota: Mo hande you halima: niki pa:ta: pi taka:lakema: alota: Ikana:ma: ika: kame na hatuku epemeka:na:ta: kota: ika: leke popeleke na handulueke laa lea:me. 4 Koto ekina: nakana:ma: nika: kame niki ame̱le̱ tapaalueke hone wika:na:ta: kota: naka: ne hambalo polumeke. 5 Pate nakana:ma: na tapaalueke lekena:ta: kota: mo halima:ta: mo nika: kame niki ame̱le̱ ipika: leke popelekena: poma:ka:na: homeketa: ana: pa:la:me lea: ekina:ta: na polumeke leekeme.
6 Dieikopema: alota: I̱ pa:ta: do ka:nda: tieke epena:yeke ikana:ma:ta: ekipeke ika: kame ma:nda: hala:me laa la halaa pelemepe leekeme.
7 Ikana:ma: hombo peaaso alota: Mo halima:ta: niki make nika: tapake make lota: lota: ombu pia:me. Ika: apa:ta: pa hala:pe o Ika: kame ma:nda: hala:pe laa lota: ombu pia:me. Koto ekina: nikana:ma:ta: ipika: pi hombo peapeke yeke loma:me. Ipikana:ma: nika: kame hatuku a:pa:pa:peke laa lolo pia: ekita: pa ekipa hone wiomono alepe.
8 Diudama: ipika: ateke pa:ta: alota: Niki koto kone polumekema: mo weki I̱ yaapo tapae. Kutu puma:ka:na:ta: kota: niki ma:nda: tea:ma: ota: na homulumeke. 9 Mo weki pa:ta: hau ma:nda: pia:ka:na: maketa: kota: I̱ pa:ta: wina:e. I̱ma: mo weki hau ma:nda: peao epeke tupa: neke pa:ta: na hatuku epoa:ka:na:ta: kota: koto pu hoeyalua: hauna: yenkita: I̱ pa:ta: wina: loelena:e. 10 Nikana:ma: nateleke hokuluna: na yuwia haoma:ka:na: yoluta: ameta: amba: hoto yaapo pua epolo puma:me leekeme.
11 Ika: apa:ma: iki pa:ta: alota: Kota: kutu pulu pia:ka:na:ta: kota: do kenkena: opa:la: epeke nemanu ika: nu pa:ta:manu mendiao mo kapomani handeteke hala: you halina: pa hameke hala:la: ale mea puapee. Mo ale manuta: pa totopo piki ti yonkeleke sikima: make hosiki boi hapeke make mo ne totopo peaasa: alemanu make mo (pei kilikima: handeke) pisidasio kiliki make (mo sa:tikima: handeke) amono kiliki make mea puapee. 12 Kutupa make mo hande ika: nu kake nina: mendiaeyeke manita: ata:ka: peaopate pimima: pao mea puaaso hata:ta: moeki haka:ta:pao yaapo peao mea pua:pa:peke. 13 Kutupa ika: kame make hatuku puaata: a̱i̱ koto kone paa la:ka:la a:pa:pa:peke. 14 Mo you halima:ta: Benisamini make mo ika: kame ma:nda: make iki pa:ta: a:ta:ma: homolo kina: yeketa: mo Aneke Wele wopupiki Koda:ma: mo some pa:ta: a:ta:ma: homa:la:eki halena:e. Kota: I̱ta: yaka wekiwandiki alupawa:ka:na:ta: kota: ota: alupaapeke ya:la:me leekeme.
15 Koto ekina: mo hama̱la̱: hama̱la̱:ma:ta: mo hande pa hameke hala:la: alemanu make mo mani haka:ta:pao yaapo peao mea Benisamini ame̱le̱ Idiepi nane pemekeme. Koto pate ikita: Diosepe pa:ta: pua walemekeme. 16 Kutupa Diosepema: mo tapake ame̱le̱ Benisamini hayekeeki hando haota: kota: ipikana:ma: mo ipika: da handeteke hawayeke e pokaeyeke some pa:ta: alota: Do haliweki yaka da pa:ta: hatuku pue. Ikita: natepa nane I̱ ame̱le̱ ne nelimikima: mo koa ma:na: ma:nda: lia amu peapeke leekeme. 17 Mo e pokaeyeke halima:ta: mo pia:peke leeke tupa: mo hama̱la̱: hama̱la̱: hatuku Diosepena: da pa:ta: peekeme.
18 Mo hama̱la̱: hama̱la̱: mo da pa:ta: hatuku epeeketa: ikita: paala:ma: homolo hata: dupiki hone wimikime. Niki do pa:ta: hatuku ipula: ekita: mo hande titina: hande nika: nu pa:ta:manu mendieke manina: pate pita:la:me. Ameta: ikana:ma: niki hoeyao make nika: donkimanu make mea nikita: ipika: pa hameke e pokaasoma: tapake hamono lelimikie laa hone wimikime. 19 Koto ekina: mo da pota: pa:ta: pua hata: mo e pokao haya: handeteke hayeke some pa:ta: alota: 20 Tiekeo. Pilisi nakana:ma: opie. Nikita: amba: hoto homeke do pa:ta: ne hambolo epoma:me. 21 Kutupa paa pua timba: leeke palai da pua a:eyaata: nika: numanu pua tokua handoma:pate hali homeke homekema: nika: mani ota: ana: sikina: mendieke handaa pao mea epoloma:me. 22 Kutupa make ne ma:nda: hambulumekema: yeke mandane mani make mea epoloma:me. Mo nika: nu pa:ta:manu mo mani paa mendiaeyeke someta: epima: pa:la: o niki mata:la:me lemekeme.
23 Mo e pokaeyeke somema: alota: Hone ti yokolo hata: paala:ma: na homa:pa:peke. Ika: Koda: mo ika: apa:na: Koda:ma: kone ika: numanu pa:ta: mo mani paa mendiao pa:la:mee. Ika: yenki manuta: ana:na: mua:me leekeme. Kutupa ipikana:ma: Simiono iki pa:ta: hatuku epeekeme.
24 Mo e pokaeyeke somema:ta: mo hama̱la̱: hama̱la̱: da tukiki pa:ta: hatuku mea epeekeme. Ipikana:ma:ta: mo ika: ankemanu tandepolo pimiki tupa: ikali halaata: ika: donkimanu make ne haleekeme. 25 Mo tapakema:ta: natepa nane Diosepe ame̱le̱ mandakena: ne nelimikie laa la haleeke handa mo hande pa hameke hala:la: alemanu tikitiki yao pitimikime. 26 Kutupa Diosepe da pa:ta: opolo epeeketa: ikana:ma: mo pa hameke hala:la: alemanu oni da pa:ta: mea pua ipiki pa:ta: pua panda: puniaemekeme. 27 Ipikana:ma: ikita: epeke tupa: halemepe laa alota: Ikana:ma:ta: mo ika: apa: kokena: pi manuta: I̱ la kimima: ipikita: eki pa:la:pe. Ipikita: pa hala:pe o epeke hala:pe laa leekeme.
28 Ikana:ma: hombo peaaso alota: Naka: epeke homupiki e pokaasa: hali mo nika: apa:ta: pa epeke tupa: hala:mee lemekeme. Koto laata: tumiki yotuao ipiki pa:ta: panda: puniaemekeme.
29 Kutupa Diosepema: ipika: hameke Benisamini hando hao alota: Dota: hande I̱ pa:ta: la kimi ika: wetepe nane weki ya:ka:ta:me. Yaka wekio. Koda:ma: neke epeaena:e leekeme. 30 Koto laata: Diosepe ipika: kamena: ipika: pukima: tanda tieke pieke handaa koto kone iki mina:pa:lao peekeme. Ipikita: teke pa:ta: e̱ podela: mia:peke nono pieke handa ipika: da panda: pa:ta: pua e̱ leekeme. 31 Kutupa ipika: leke popeleke tanda:pata: hama opolu bao a:pa ipika: kone lu mina:niao pita:ta: mo ne pana: pie leekeme. 32 Diosepeta: teipolo ma:nda:na: pana: peao ipika: hameke tonuta: ma:nda:na: pana: peayekeme. Kutupa koto pa:ta: ne nemeke Idiepi tapake manuma:ta: mo *Hibulu tapake ame̱le̱ mandake pa:ta: pita ne napeke ana: na pa:la:me laata: teipolo ma:nda:na: pita: ne nemekeme. 33 Mo hama̱la̱: hama̱la̱:ta: Diosepe handa: moneao pita: ika: mendieke tupa: mupeke hali amba:la pita pua mo wetepe wekina: pua pitu naena: leekeme. Mo tapakema: iki pitaeyeke tupa: hando haota: penkilipa:tia pominolo hata:ta: ika: ika: kone handa: alu alu pimikime. 34 Mo neta: Diosepena: teipolona: pana: piekeme. Kutupa Benisaminita: mo hameke tonuna:eki make ankulao haka:ta:pao mo ipika: ne yunki peao mulu pieke tupa: haleekeme. Koto ekina: mo tapaketa: Diosepe ame̱le̱ ne ikali no opu hao keaemekeme.