22
Koda:ma: Eipoloha:ma: pa:ta: Aisa:ke lia kie leekeeki
1 Nate ma:nda:na: Koda:ma: Eipoloha:ma: la handuluekema: wi alota: Eipoloha:ma:o leeke Eipoloha:ma:ma: hombo peaasota: Wae laa alota: I̱ do handa:e leekeme.
2 Koda:ma: alota: Mo ota: naka: pukima: homele homeke weki Aisa:keta: hatuku mo Motaeya kenke pa:ta: pue. Kutupa koto pate I̱ma: walua: potena: naka: weki lia I̱ pa:ta: kuelena: loa:me leekeme.
3 Da ka:la:paaso sikita: Eipoloha:ma:ma:ta: mo weki lia halopieke timanu poka ipika: donkina: hokina: mendiao Aisa:ke make ipika: e pokaepeke hali yaapo make hatuku peekeme. Ikita: mo hande Koda:ma: la haleeke alena: poluekema: pemekeme. 4 Nate tepo peaona:ta: Eipoloha:ma:ma: mo hande leeke alena: handa: moneayekeme. 5 Kutupa ipikana:ma: mo e pokaepeke hali yaapo pa:ta: alota: Do donki ame̱le̱ do pate hape. Mo weki dikita: mo pa pate leke pua panda:puniao yeiya: lao ipiliki halipi alena: paa ipulupekema: loa:me leekeme.
6 Eipoloha:ma:ma:ta: mo hau pitolo yankolo pipiki tita: Aisa:ke mea tiao ipikita: kaiya make mo ti noya: pia:peke ti epeleke make miniekeme. Ipiliki mandakena: pulu hata: 7 Aisa:kema: alota: Apa:o leekeme. Ipikana:ma: alota: Alekeka:ta:pe leekeme. Aisa:kema: lota: pitolo alota: I̱ma: mo ti noya: pulu pele ale ti epeleke pita: ti yaapota: handolopate mo lia halo polopa: sipisipi ikikita: handoka:ta:pe leekeme.
8 Koto leeke Eipoloha:ma:ma: hombo peaaso alota: Koda:ma: kone kilieke leekeme. Kutupa telipuna: mandakena: pepekeme.
9 Kutupa mo hande Koda:ma: la haleeke alena: opolo a:pa Eipoloha:ma:ma: oloda a:eyaata: ti manda ana: layekeme. Kutupa ipikana:ma: ipika: weki tonkao mo olodana: ti manda wiekeme. 10 Kutupa mo weki luekema: kaiya mea mina: liaeyekepate 11 mo Tekehalina: enisoloma: ya pa:ta: yama: ipiki pa:ta: wi alo alota: Eipoloha:ma:o. Eipoloha:ma:o leekeme. Ipikana:ma: hombo peaaso alota: Wae. I̱ do handa:e leekeme.
12 Koto leeke mo enisoloma: alota: Mo weki na liki ipiki pa:ta: hau ma:nda: na pia:pee. Nakana:ma: naka: homeke weki homeketa: na sa:sa: pele ekina: ameta: nakana:ma: Koda: paala:ma: homeka:ta:me laa hone ulume leekeme.
13 Kutupa Eipoloha:ma:ma: lekema: lekema: piekepate sipisipi halieki mo ipika: ekeketa: ti ma:nda:na: mea hopa:liayekeeki handeekeme. Ipikana:ma:ta: ipika: weki yanka halo pieke tupa:ta: mo hande sipisipi ma:na: pua mea yanka haleekeme. 14 Kutupa Eipoloha:ma:ma: koto pate bikita: Koda:ma: Ana: Lao Hala:me leekeme. Kutupa ame do make wanda:halima:ta: Mo Koda:na: potena: ipikana:ma: ana: lao hala:me lo halememe.
15 Kutupa mo Tekehalina: enisoloma: ya pa:ta: yama: Eipoloha:ma: paa yaapo peao wi alo alota: 16 I̱ta: Tekehalima: ota: yaka bikina: pi la: witolota: I̱ma:ta: neke wopu epealueke. Pa ekipeke. Nakana:ma:ta: naka: homeke weki kone na sa:sa:piki I̱ pa:ta: kuluekema: taape ekina: loa:me. 17 I̱ma: pi la: witolota: naka: monduma: monduma: pilipi wekiwandikina: wekiwandikita: oli yana: hala: hombulanka: manuma: o mo ikali tiekena: tea:na: ula: hou manuma: handena: lolueke leekeme. Kutupa ikana:ma:ta: ika: a:nda: tunkuliki wanda:halita: lu bepolalimikie. 18 Mo nakana:ma: yaka pi opele ekina: I̱ma: naka: monduma: monduma: pilipi wekiwandikina: wekiwandiki pa:ta: yama:ta: mo tutu paeyao sikita: epeaasa:eki mina: lolueke leekeme. 19 Kutupa Eipoloha:ma:ta: mo ipika: e pokaasa: hali yaapo haepeke alena: pua mandakena: mo ipiki hayeke ale Biasiba nane pemekeme.
Neihona: tapake
20 Hao hao nate ma:nda: nina:ta: Eipoloha:ma:ma: mo hameke Neihona: weteke Milikama: wekiwandiki ketepo hata: mendiaeyekeeki leeketa: opiekeme. 21 Mupeke weki bikita: Usu make hameke Busu kutupa mo A:tamona: ateke Kemuele make 22 Diesede make Heiso make Pilida:se make Didila:pe make 23 kutupa Lepekana: ateke Beduelo make koto weki tonu paeyaota: Milikama: Neihona: mendiaeyekeme. 24 Kutupa Neihona: yaapo peao mieke wanda: Teumama:ta: Diba make Kaha:me make Daha:se make Maaka make mendiekeme.