Ritashandighi irya
Yuuda
Amakëërërryö
1
Ritashandighi reno,
nö-öni Yuuda ömököri uwa emeremo uwa Yëësu Kiristo,
mura uwaabho Yaakobho ndyandëkirë.
M-bëënyu bhano mwahanshwa nandëkëëyë,
mwabherekerwa na Taata Waryobha,
na nkorendwa mörë bhuuya,
ko okoghera iya Yëësu Kiristo.
2 Ikyabhera,
omorembe na righonshe bhebhe hamwë na bhëënyu bhököngʼu.
Okobhotorrwa ikiina abhëëghya nyangasheka
3 Abhaghonshe abhaane,
naaighombanga bhököngʼu igha,
mbandekere amangʼana agha öbhöhönia bhono tokosanga bhëëtö bhonswe igho.
Kasi ndööshë igha,
ni-igha mbandekere ritashandighi reno,
ko okobhasabha igha,
mokore omotono ughwa okonaghya umukumo ghono Waryobha yaahaana abhantö abhaaye kamwë igho.
4 Nkobhandekera ndë ritashandighi reno,
ko bhoora igha,
bhaaho abhantö nyabhorebhe,
bhano bhatakwighwera Waryobha.
Abhantö bhayö bhaibhumbura bhughunyi igho mö-bhëënyu.
Nkusisa bharë engʼana iya örööbhö urwa Waryobha uwëëtö,
okore bhakore amangʼana agha sënsöni,
na ukwanga Yëësu Kiristo,
umwene igho,
we omotangati uwëëtö,
Omonene uwëëtu.
Kasi ukurwa kare,
yaandëkirwë igha,
abhantö bhayö mbarebhotorrwa ikiina.
5 Nokaanyoora mmomanyirë bhuuya ghonswe igho igha,
Omonene yaatunguyi Abhaisiraëri,
ukurwa mu-kyaro ikya Miisiri mono bhaanyankanga.
Kasi nkutuna ndë mbahiitöki igha,
yaamarrë akasikya bhano bhaangirë ukumukumya.a
6 Muhiitoke igha,
kora abhamaraika bhano bhataanaghëri ibhyeo ibhyabho,
bhakatigha ahasë ahaabho aha okomenya,
Waryobha yabhabhoha na ebheraangʼani mu-kisuntë.
Nkoghanya bharë urusikö oronene roora,
urwa okobhotorrwa ikiina.
7 Ghwiki ni-igha muhiite ghano ghaanyöörrë abhantö abha imighi ighya Sodoma na Ghomora na imighi gheno ghyaaheegheraini naghyo.
Amangʼana ghayö,
n-kya agha abhamaraika bhayö.
Abhantö bhayö,
bhaakoranga obhosooraare na okoghoota amangʼana agha oronamba urwa ömöbhërë,
rono rotatuubhaini kya bhono ëmëbhërë ighyabho ghyaabhömbirwë igha ghekore.
Bhakashibhibhwa ku ukusikibhwa mo-morro ghotakurima amakora ghonswe igho.
Ku bhuyö okobhotorrwa ikiina kuyö,
kwabha ëkërëngyö ikya ukushibhibhwa.b
8 Amangʼana ni-ighoigho gharë igha,
abhantö abha reero eno bhano bhatakwighwera Waryobha,
mbatuubhaini na bhayö.
Nkoroota bharë ebherooto bheno bhekoghera bharanyankuhya ëmëbhërë ighyabho,
nkwanga bharë öbhötöngi ubhwa Waryobha.
Kora nkotoka bharë ëbhëntö ibhya ubhuhika,
bheno bhërëngë mu-ryobha.
9 Kasi kora Mikaëri,
maraika omonene oora,
hano yaanyeraini senkaani na Oghosambwa,
c ko okoghera iya ömöbhërë ughwa Mosa,
tiyaakarëhirë okoghamba bhoghogho Oghosambwa,
handë okoghotema amasoro.
Kasi keno yaaghambirë ni-igha,
“Omonene Waryobha umwene akohamere!”
10 Kasi abhantö abhaghogho bhayö,
nkoghamba bharë bhoghogho amangʼana ghano bhatamanyirë.
Kora amangʼana ghano bhakomanya n-kya ghano sityënyi seno setaana obhongʼaini semanyirë,
ghayö ngo ghakobhasikya.
11 Haahö,
abheene bhayö!
Ko bhoora bhaghöötirë enshera iya Kaini,
iya okokora ëbhëbhë.
d Ko bhoora nu-bhwamë bhakutuna,
bhaihaatera këmwë,
kora mö-bhöngʼënërrya kya ubhwa Bharaamu bhoora bharë.
e Bhaasika,
ko bhoora bhaatëëyirë kya bhoora Koora yaatëëyirë akasika.f
12 Abhantö bhayö,
n-kya amarengog amaghogho agha mu-nyansha.
Nkwingʼahërya bharë okorya abheene mu-sinyangi isyënyu isya righonshe,
kora tebhaana sënsöni hë.
Ghwiki abhantö bhayö,
tebhaana ubhwera hë,
mbanga kya amasaarö ghano ghataana imbura,
rikama nkoghahuushahuusha rërë,
ukughya ahasë honswe igho.
Ghwiki mbanga kya ëmëtë gheno ghetaana sehagho enkaagha iya ukutwa sehagho,
ghyoma törö,
kora ghyaihwa.
13 Tebhakwirebherra hë.
Bhaabha kya amayengo amanene agha ku-nyansha.
Amangʼana aghaabho agha sënsöni ghano bhakokora,
gharomaana kya rihuro irya amayengo.
N-kya sinyota seno sikwinaaranaara igho,
kora teseena ubhwera hë.
Waryobha yaabhatoorra-ho emongo iyaabho,
ahasë aha ikisuntë ekenene amakora ghonswe igho.
14 Henooko,
ömöntö uwa muhungatë ukurwa ko-Adamu,
h yaaruusiri öbhörööti ko amangʼana agha abhantö bhayö igha,
“Maaha,
Omonene Waryobha araasha,
hamwë na abhamaraika abhaaye abhahörëëru ëbhëkwë ibhyaru,
bhano otaatore okobhara,
15 okore abhotorre ikiina abhantö bhonswe igho,
na okotoora harabhu amangʼana aghaabho amaghogho ghonswe igho,
hamwë na amangʼana ghonswe igho,
ghano abhaköri abha ëbhëbhë bhayö bhakoghamba bhoghogho Waryobha.”
16 Abhantö bhayö,
nkwibhëmbëërya bharë na okotema abhantö abhandë amasoro,
kasi no-ronamba urwabho urwene igho ndo rokobhanyankya.
Nkoghamba bharë amangʼana amarito agha ukwihasha,
na ukukumya bhököngʼu abhantö abha ibhyeo,
okore bhanyoore ehoorohooro.
Amakaanio bheena amaraghërryö
17 Kasi bhëënyu bhare abhaghonshe abhaane,
muhiitoke ghaara abhatomwa abha Omonene uwëëtö Yëësu Kiristo bhaaghambirë kare.
18 Bhaaghambirë igha,
“Enkaagha iya sinsikö isya umuhiko,
mbaryebhoka abhantö abha oronamba,
na abhashabhuri.”
19 Abhantö bhayö,
m-baköri abha ikisiiyomba,
amangʼana agha ko-kebhara kono,
ngo agheene bhakwitegherra,
tebhaana Umwika Ömöhörëëru uwa Waryobha hë.
20-21 Kasi bhëënyu bhare bhaghonshe abhaane,
mwiraarerre ku righonshe irya Waryobha.
Monaghe ku-mukumo ughwënyu ömöhörëëru bhököngʼu,
mosabhenga ko obhotoro ubhwa Umwika Ömöhörëëru,
na eno moraitengʼera na ukushomerwa ko okoghera iya ikyabhera ikya Omonene uwëëtö Yëësu Kiristo,
ono araabhareetere öbhöhöru ubhwa amakora ghonswe igho.
22 Mobhe na ikyabhera ko bhano bhataana obhoheene ubhwa umukumo.
23 Abhantö abhandë mobhatööri ko okobhasakörya ukurwa mo-morro.
Abhandë mobhaabhere,
kasi mwangarre,
mwibhashe obhoghogho ubhwabho.
Amasaasaamo agha ukukumya
24 Waryobha aana obhotoro ubhwa okobharenda motakaasira,
na okobhareeta mbere iya ubhuhika ubhwaye mushömëëywë,
motaana isoro.
25 Waryobha we umwene igho Ömötöörya uwëëtö,
okohetera ku-Yëësu Kiristo Omonene uwëëtö.
Waryobha atöönibhwi!
Naana obhonene,
obhotoro,
na ubhwera,
ukurwa kare,
bhoono igho,
na amakora ghonswe igho.
Amina.