Ritashandighi irya katatö irya
Yohana
Amakëërërryö
1
Öni omoghaaka uwa ekanisa,
ndakwandekera uwe omoghonshe uwaane Ghaayo.
Obhoheene nenkohanshirë.
2 Öni nkokosabhera ndë omoghonshe uwaane igha,
amangʼana ghonswe igho,
ghabhe bhuuya ku-uwe,
agha kinyamöbhërë,
kya bhono mmanyirë igha,
ubhwighwerrani ubhwaho na Waryobha m-buuya bhörë.
3 Naashömëëywë bhököngʼu hano abhakumya bharikyëtö bhaaishirë hano.
Hano bhaahikirë hano,
mbaantëëbhëri igha,
nköghëndërrya örë okoghooterra obhoheene ubhwa Waryobha,
na öbhömënyi ubhwaho nu-bhwa obhoheene.
4 Teeho engʼana eno ikunshomera bhököngʼu,
okokera ukwighwa amangʼana igha,
abhaana abhaane abha ku-mukumo,
nköghëndërrya bharë bhuuya okobha na öbhömënyi ubhwa heene.
Öbhöntö ubhwa heene ubhwa Ghaayo
5 Omoghonshe uwaane,
uwe m-möntö uwa heene örë,
ko ghano okokorra abhakumya bharikyëtö,
nokaanyoora igha m-baghëni ku-uwe.
6 Mo-bhantö bhayö waatöörrya,
mbo bhaatëëbhya ekanisa iya hano kya bhono ohanshirë bhököngʼu Abhakiristo bharikyaho.
Bhoono keno nkökötëëbhya ni-igha,
uwe ghëndërrya ökötöörrya abhantö kya bhayö,
hano waanyoora bharatuna ukurwa kö-bhëënyu hayö bhaghi ahasë handë.
Ko bhoora engʼana iya ökösërëënia iyö,
nkushomera ërë Waryobha.
7 Abhantö bhayö,
mbaasimiri oroghendo urwa ukutighinkanera Yëësu Kiristo,
bhataana ekehaheeno ukurwa ko abhantö bhano bhatakukumya Yëësu Kiristo.
8 Ku bhuyö bhëëtö Abhakiristo,
ni-igha tötöörringa abhantö kya bhayö.
Hano toraakore igho,
nkunyoora örë toghootaini nabho hamwë ko-meremo ighya okoraareka obhoheene.
Diotirefe bhaana Demetirio
9 Naandekera abhantö abha ekanisa ritashandighi irya amangʼana amake igho,
kasi Diotirefe ono ahanshirë ukwitangatërrya,
okanya igha we omotangati uwaabho,
akaanga ukwikërrya amaraghërryö aghëëtö.
10 Ku bhuyö hano ndiisha iyö,
nendehonyora harabhu igho amangʼana aghaaye ghano akokora.
Keno akokora,
no-kotoghamba bhoghogho ko amangʼana agha obhorongo agha akutushabhura.
Te-ghayö agheene igho hë,
kora takösërëënia abhakumya bharikyëtö bhano ukunyoora bharëngë ko-roghendo.
Kora ghwiki nkokaania arë abhantö abha mo-kanisa bhano bhakutuna ökösërëënia abhakumya bharikyëtö bhayö.
Abhakumya bhano bhakobhasërëënia,
nkobharughya arë ukurwa mo-kanisa.
11 Bhoono Ghaayo omoghonshe uwaane,
otakeegha okokora amangʼana amaghogho ghayö.
Kasi weeghe eteemo iya abhantö bhano bhakokora amangʼana amaiya.
Hano ömöntö yakora amangʼana amaiya,
nkwörökya gharë igha,
ömöntö uyö,
m-moona uwa Waryobha.
Kasi ömöntö ono akokora amangʼana amaghogho,
uyö tamanyirë Waryobha hë.
12 Abhantö bhonswe igho,
nkoghamba bharë igha,
“Demetirio m-möntö uwa heene.
Nkokora arë amangʼana kya bhono Waryobha akutuna.”
Kora bhëëtö bhonswe nkoghamba törë igha,
uyö m-möntö uwa heene.
Kora uwe wonswe nomanyirë igha,
ghayö tokoghamba m-maheene.
Amakëërërryö agha okoragha
13 Neena amangʼana amaaru ghano nkutuna mbatëëbhi,
kasi tinkutuna ngandeke ku-ritashandighi.
14 Keno nkwitengʼera ni-igha,
m-böngö ndaabhataarre.
Hayö ho torebha hamwë tushumaashe.
15 Omorembe ghobhe hamwë na uwe.
Bhasaani abhaaho bhonswe igho abha hano,
bharakökëërya.
Na uwe wonswe,
tökëërërri abhasaani abhëëtö bhonswe igho abha iyö,
kera ömöntö ku iriina iryaye.