Ritashandighi irya kabhërë irya
Yohana
Amakëërërryö
1
Öni omoghaaka uwa ekanisa,
nu-uwe umusubhaati nkwandekera ritashandighi reno,
hamwë na abhaana abhaaho.
Uwe musubhaati,
waahorwa na Waryobha hamwë na abhaana abhaaho.
a Uwe hamwë na abhaana abhaaho,
ko bhoheene nembahanshirë.
Tö-öni umwene igho mbahanshirë hë,
kasi kora abhandë bhonswe igho bhano bhamanyirë obhoheene,
mbabhahanshirë.
2 Nembahanshirë ko bhoora bhëëtö na bhëënyu,
ntomanyirë obhoheene,
ghwiki ntoraaghëndërri okobhomanya amakora ghonswe igho.
3 Mbe,
Taata Waryobha na Omoona uwaaye Yëësu Kiristo,
mbaraatohaane örööbhö,
ikyabhera bheena omorembe,
bhëëtö bhano toona obhoheene na righonshe.
Okohanshana nko okosooka imighiro ighya Waryobha
4 Naashömëëywë bhököngʼu ukwighwa igha,
abhaana abhaaho abhandë mbanaghëri obhoheene,
kya bhono Taata Waryobha yaatoraghërrya.
5 Bhoono ore musubhaati omoghonshe,
ndakosabha omanye igha,
bhëëtö Abhakiristo,
ni-igha tohanshane.
Umughiro ghuyö te-mohya hë,
kasi n-gooraghoora ughwa kare,
ghono twaarenga tomanyirë ukurwa hano twaasimiri ukukumya Yëësu Kiristo.b
6 Okohanshana,
nko okosooka imighiro ighya Waryobha.
Mwaatëëbhibhwanga umughiro ughwa okohanshana nkaagha syonswe igho,
kerenga haara mwaasimiiyi ukukumya Yëësu Kiristo.
Motakaasërëënia abharongo
7 Nkobhatëëbhya ndë igho,
ko bhoora abharongo abhaaru bheebhoka ko-kebhara kono.
Abharongo bhayö,
tebhakwikërrya igha Yëësu Kiristo,
yaaishirë ko-kebhara kono,
aana ömöbhërë kya gheno tonaghyo.
c Ömöntö wowonswe igho ono akoghamba bhuyö,
uyö m-morongo,
kora m-mubhisa uwa Kiristo.d
8 Mbe,
ku bhuyö ni-igha mwiyangarrenga,
okore omotono ughwënyu ughwa okokorra Waryobha emeremo,
ghotakaaheta bhosa igho.
Kasi omotono ughwënyu ghuyö,
ghobhareetere ehoorohooro iya okobhaisa,
eno ikurwa ku-Waryobha.e
9 Ömöntö wowonswe igho ono atakoghoota amëëghyö agha Yëësu Kiristo,
kora ghwiki igha nkoghasyörya arë,
uyö taana öbhömwë na Waryobha hë.
Kasi ömöntö ono aköghëndërrya okoghoota amëëghyö agha Yëësu Kiristo,
uyö naana öbhömwë na bhonswe igho,
Taata Waryobha,
na Omoona uwa Waryobha.
10 Hano ömöntö wowonswe igho araashe kö-bhëënyu,
eno arëëghya amëëghyö ghano ghatatuubhaini na amëëghyö ghaara Yëësu Kiristo yëëghya,
motakaamösërëënia mu-sinyumba isyënyu.
Kora motakaamökëërya ënkëërya iya Ikikiristo.
11 Ömöntö ono araamökëëri,
uyö nkoghootana arë hamwë nawe,
ko-mangʼana amaghogho ghano akokora.
Amangʼana agha okomarërrya
12 Neena amangʼana amaaru ghano naakutuna igha mbatëëbhi,
kasi tinkutuna igha ngandeke ku-ritashandighi kono.
Ko bhoora nkwitengʼera ndë igha,
nendaashe kobhataarra.
Hayö bhoono ho turishumaasha hamwë,
kora nturishomerwa bhonswe igho.
13 Abhaana abha musubhaati uwëënyu ono yaahorwa na Waryobha,
f bharakökëërya.