Ritashandighi irya kabhërë irya
Peetero
Amakëërërryö
1
Ritashandighi reno nö-öni Simeoni Peetero ndyandëkirë,
öni ömököri uwa emeremo,
na ghwiki m-motomwa uwa Yëësu Kiristo ndë.
Bhëënyu bhano mwanyoora umukumo ughwa ubhwera,
m-bëënyu nkwandekera.
Mwaanyoora umukumo ghooraghoora,
ghono na bhëëtö bhonswe twaanyoora okohetera ko obhoheene ubhwa Waryobha na ömötöörya uwëëtö Yëësu Kiristo.
2 Örööbhö na omorembe bhebhe hamwë na bhëënyu bhököngʼu,
ko okohetera ko okomanya Waryobha bhaana Omonene uwëëtö Yëësu.
Okobherekerwa hamwë na ukwahorwa na Waryobha
3 Waryobha yaatohaana ghonswe igho ghano tukutuna,
okohetera ko obhotoro ubhwaye,
okore tobhe na öbhöhöru,
kora tomosooke.
Yaatohaana ghayö ko enshera iya okomomanya.
Ghwiki atöbhërëkëëyë ko okoghera iya ubhuhika na öbhöntö ubhwa heene ubhwaye.
4 Ko okoghera iya ghayö,
yaatohaana imituho emenene ighya ubhwera,
kya bhono yaatoraghaini.
Imituho ghiyö,
nkötötöörrya ghërë ukwibhasha obhoghogho bhono bhokoreetwa na oronamba oroghogho,
urwa ko-kebhara kono.
Ghwiki nkötötöörrya ghërë,
okore tosange eteemo iya Waryobha.
5 Ku bhuyö mokore omotono,
okore umukumo ughwënyu ghwëngëribhwi-ko öbhöntö ubhwa heene,
öbhöntö ubhwa heene bhuyö,
bhwëngëribhwi-ko obhongʼaini.
6 Ghwiki obhongʼaini bhuyö,
bhwëngëribhwi-ko ukwirebherra,
ukwirebherra kuyö,
kwëngëribhwi-ko ököghömërrya,
ököghömërrya kuyö,
kwëngëribhwi-ko okosooka Waryobha.
7 Okosooka Waryobha kuyö kwëngëribhwi-ko righonshe irya okohanshana bhëënyu abheene ko abheene,
okohanshana kuyö,
kwëngëribhwi-ko na righonshe irya okohansha abhantö bhonswe igho.
8 Hano seteemo siyö seraaiyëngëri kö-bhëënyu,
nsebhatöörrya,
okore ko amangʼana agha okomanya Omonene uwëëtö Yëësu Kiristo,
motakaabha kya ëmëtë gheno ghetakwama.
9 Kasi ömöntö ono ataana seteemo siyö,
uyö n-kya umuhukuru,
ko bhoora yeebha igha,
Waryobha yaamosaabhuura ëbhëbhë ibhyaye.
10 Mbe,
abhakumya bharikyane,
mokore omotono bhököngʼu,
ukwörökya igha,
Waryobha yaabhabherekera na okobhaahora.
Hano moraakore igho,
timutighe umukumo ughwënyu kora hake hë.
11 Ku bhuyö mörësërëënibhwa bhököngʼu,
mosohe mo-Bhokama ubhwa amakora ghonswe igho,
ubhwa Omonene na Ömötöörya uwëëtö Yëësu Kiristo.
12 Ko okoghera iya ghayö,
nendaaghëndërringa okobhahiitökya amangʼana ghayö sinsikö syonswe igho,
nokaanyoora,
mmoghamanyirë,
kora monaghirë ko obhoheene bhono mweegha.
13 Nkomaaha ndë igha,
ni-igha mbahiitökinga amangʼana ghayö,
senkaagha syonswe igho seno nkeheeshera ko-kebhara kono.
14 Nkoghamba ndë igho,
ko bhoora Omonene uwëëtö Yëësu Kiristo yaanhonyorra igha,
nendaarwe ko-kebhara kono,
na öni nkomaaha ndë igha,
enkaagha iyö,
n-haangʼë ërë.
15 Kiyö nkyo kekoghera ndakora omotono ughwa okobhatëëbhya ghayö sinsikö syonswe igho,
okore muhiitenga amangʼana aghaane ghayö,
hano urinyoora nkuurë.
Abhantö bhano bhaarööshë ubhuhika ubhwa Kiristo
16 Hano twëëghyanga abhantö amangʼana agha obhotoro ubhwa Omonene uwëëtö Yëësu Kiristo na ukuusha ukwaye,
tetwaitengʼeranga amaghano agha kare ghano ghaandekwa kinyabhongʼaini ngʼaini.
Kasi bhëëtö abheene,
ntwaarööshë ubhuhika ubhwaye.
17-18 Bhëëtö hamwë twaarenga na Yëësu ku-nguku ëhörëëru,
hano yaasöökirwë kora akahaanwa ubhuhika ukurwa ko-Taata Waryobha.
Enkaagha iyö,
yo twaaighuurë engamba iya ubhuhika obhonene,
ararwa mu-ryobha ku-Waryobha umwene,
ekaghamba igha,
“Ono no-Moona uwaanea omoghonshe,
we aköntëghërya bhököngʼu.”b
19 Kora ntoona amangʼana amaheene bhököngʼu,
agha öbhörööti,
hano moraaghaghoote,
m-buuya oraanyoore mökörrë.
Amangʼana ghayö n-kya etara eno ëkömërëkya mu-kisuntë,
okohekera hano öröghörö roraasambe,
na obhorabhu ubhwa inyota iya nyinkyo bhomoreke mo-senkoro isyënyu.
20 Kasi ekenene ni-igha momanye igha,
tebhooho öbhörööti mo-Maandeko Amahörëëru,
bhono abharööti bhaarahööyë kya bhono abheene bhaatunanga.
21 Nkoghamba ndë igho,
ko bhoora teeho engʼana iya öbhörööti eno yaareetwa na amaitegherro agha ömöntö wowonswe oora.
Kasi abharööti bhayö,
mbaaghambirë amangʼana ghano ghaaruurë ku-Waryobha ko okotangatwa na Umwika Ömöhörëëru.