Ritashandighi irya Yaakobho
ko-bhano bhaanyaraghana
Amakëërërryö
1
Nö-öni Yaakobho omoghorwa uwa Waryobha,
na uwa Omonene Yëësu Kiristo nandëkirë ritashandighi reno.
M-bëënyu nkökëërya abhantö abha amakabhira ikömi na abhërë,
bhano mwanyaraghana ko-kebhara kono!
Ritashandighi reno m-bëënyu nkwandekera.
Mushomerwenga hano mwashaashwa
2 Abhakumya bharikyane,
mushomerwenga hano mwashaashwa ukushaashwa kwokwonswe koora,
3 ko bhoora,
mmomanyirë igha,
ukushaashwa ukwa umukumo ughwënyu,
nkoraaghere möghömërri.
4 Ni-igha möghömërringa okohekera umuhiko ughwako,
okore mobhe abhantö abha heene,
motakaasuuhwa na engʼana yoyonswe igho hë.
5 Kasi hano oraanyoore ömöntö mö-bhëënyu muyö,
asuuhirwë na obhongʼaini,
asaasaame Waryobha,
naraamohaane.
Ko bhoora Waryobha m-mohaani ko-bhantö bhonswe igho,
kora takohamera ömöntö hë.
6 Kasi hano ömöntö yasaasaama,
abhe na umukumo,
atakaabha na emetwe imyaru eno arasaasaama Waryobha.
Nkoghamba ndë igho ko bhoora igha,
okosaasaama ukwa nyametwe imyaru,
nkobha körë kya riyengo irya ku-nyansha,
reno rikuhirwa ahasë honswe igho na rikama.
7 Ömöntö uwa eteemo iyö,
atakaitegherra igha nanyoora ëkëntö ukurwa ko-Monene Waryobha.
8 Ömöntö kya nyametwe imyaru uyö,
nkohagha arë ko-mangʼana aghaaye ghonswe igho.
9 Abhakumya abhatöbhu bhano bhakoserwa,
bhashomerwenga ko bhoora Waryobha narebhahönönökya.
10 Kasi Umukiristo umwamë,
ni-igha ashomerwe hano Waryobha yamuhiinya,
ko bhoora narisika kya ëbhëmörë ibhya mwi-sisi.
11 Hano iryobha ryatora na emerengaari ighyaryo ghëmërëki,
ëmëröngö nkooma ghërë,
kora ëbhëmörë nkosangoka bhërë,
tëbhëkötëghërya ghwiki hë.
Ni-igho kora ömöntö umwamë wonswe,
mmo-meremo ighya ubhwamë ubhwaye akukwera.
12 Nyakara ömöntö ono aköghömërrya hano yaashaashwa,
ko bhoora hano araaghömërri ukushaashwa kuyö,
Waryobha narimutuha ituho iya öbhöhöru ubhwa amakora ghonswe igho,
bhono yaaraghaini okohaana bhonswe igho bhano bhamohanshirë.
13 Hano ömöntö yashaashwa,
atakaghamba igha,
“Waryobha we akunshaashya,”
ko bhoora Waryobha,
takushaashibhwa igha akore amaghogho hë,
kora takushaashya ömöntö wowonswe oora hë.
14 Kasi ömöntö nkushaashwa arë,
ko kötëghëribhwa na okongʼainwa na oronamba urwaye umwene.
15 Hano oronamba rwakongʼa,
nkoreeta rörë ëkëbhë,
hano ëkëbhë kyonswe kyakongʼa kereeta uruku.
Motakaingʼainanga kö-bhöntö ubhwa heene ubhwa Waryobha
16 Abhakumya bharikyane abhaghonshe,
motakangʼainwa.
17 Ëkëntö ikiiya kyokyonswe keno tokohaanwa,
mu-ryobha kikurwa,
ku-Waryobha Ömöbhömbi uwa emerengaari.
We takwisyöryasyörya kya ikiiriiri hë.
18 Kya bhono we umwene yaatunanga,
akatokora tobhe abhaana abhaaye,
ko okohetera ko-ngʼana iyaaye iya obhoheene,
okore tobhe abhatangi abhaaye,
ku-bhyonswe igho bheno yaabhömbirë.
Mwighwenga engʼana iya Waryobha na moghenaghi
19 Abhakumya bharikyane abhaghonshe,
munyitegherre bhuuya!
Mobhe abhangö abha ukwighwa engʼana,
kasi motakaaheetanga okoghamba engʼana,
handë ukwangoha okorerra,
20 momanye igha,
hano ömöntö arërëëyë,
takokora amangʼana agha heene ku-Waryobha hë.
21 Ku bhuyö mwibhashe amangʼana agha ubhunyanku,
mohaatere amangʼana amaghogho ghano moonagho.
Mwihoote kora mwikërri amangʼana amaiya ghano Waryobha yaatoora mo-senkoro isyënyu,
ghayö ngo ghakotora okobhatöörya.
22 Motakaakanya igha,
ukwighwa engʼana iya Waryobha ukwene igho,
nkwisa körë,
keno kikutunwa,
no-kokora bhono engʼana ekoraghërrya.
23 Ko bhoora ömöntö wowonswe ono akwitegherra engʼana iya Waryobha,
kasi aanga okokora bhono engʼana ikutuna igha akore,
uyö nkobha arë kya ömöntö ono akwimaaha mu-kyowa.
24 Na hano yaamara ukwimaaha mu-kyowa,
nkurwa arë ku-kyowa hayö kamwë igho,
ebha kya igho arë.
25 Kasi ömöntö ono akwitaaha amaraghërryö ghano ghataana risoro,
ghano ghakomokorra öbhötöönööni,
abhe ömököri uwa amangʼana ghayö yaaighwa,
uyö we araangʼoorwe na Waryobha ko ghaara akokora.
26 Hano ömöntö araaimaahe igha na-mangʼana agha idiini akokora,
kasi takorebherra örörëmë urwaye hë,
uyö nkwingʼaina arë,
ubhweseghe ubhwa idiini iyaaye igha aratëghërya Waryobha,
m-bwa bhosa.
27 Amangʼana amaiya agha idiini ghano ghakushomera Taata uwëëtö Waryobha,
ghano akomaaha igha teghaana isoro hë,
nö-kötöörrya sentakaana na abhasinö mu-sinyanko isyabho,
na ukwibhasha ëbhëbhë ibhya ko-kebhara kono.