Ritashandighi irya Pauro
ku-Firimoni
Amakëërërryö
1
Ritashandighi reno Firimoni,
nö-öni Pauro nkwandëkëëyë.
Öni mo-kebhohe ndë,
ko okoghera iya okoraareka Amangʼana Amaiya agha Kiristo Yëësu.
Öni toona umukumya murikyane Timoteo,
torakökëërya uwe omoghonshe uwëëtö,
ömököri uwa emeremo murikyëtö.
2 Torakëërya na umusubhaati Afia,
bhaana Arikipo umwitani murikyëtö uwa riihë irya okoraareka Amangʼana Amaiya agha Yëësu Kiristo.
Torakëërya hamwë na abhakumya bhano bhakusikaneranga ka waaho kuyö.
3 Örööbhö na omorembe ukurwa ku-Waryobha Taata uwëëtö,
na ko-Monene Yëësu Kiristo,
bhebhe hamwë na bhëënyu.
Righonshe na umukumo ughwa Firimoni
4 Nkukumya ndë Waryobha senkaagha syonswe igho,
hano nakosabhera,
5 ko bhoora nkwighwa ndë igha,
nköghëndërrya örë kukumya Omonene Yëësu,
kora nohanshirë abhakumya bhonswe igho.
6 Nkosabha ndë Waryobha igha,
umukumo ghuyö okosanga hamwë na bhëëtö,
ghökötöörri omanye bhuuya amangʼana amaiya ghonswe igho ghano tukunyoora ukurwa ku-Kiristo.
7 Umukumya murikyane,
righonshe iryaho ryaanshomera bhököngʼu,
kora ryaantogheka,
ko bhoora okosambaarokya senkoro isya abhakumya.
Pauro arasaasaama Firimoni igha aabhere Onesimo
8 Mbe,
nokaanyoora igha neena ubhwera bhono naahaanwa na Kiristo,
ubhwa okokohamera igha okore bhono ukutunwa igha okore,
9 kasi ko okoghera iya righonshe,
ndööshë igha,
m-buuya bhököngʼu nkosaasaame.
Öni omoghaaka Pauro na bhoono m-mobhohe ndë ko okoghera iya Kiristo Yëësu,
10 ndakosabha engʼana ëmwë igho ko okoghera iya Onesimo.
a Onesimo uyö,
n-kya omoona uwaanewaane,
ko bhoora mmötöörri ukukumya Yëësu Kiristo na eno ndëngë mo-kebhohe.
11 Ekembere tiyaarenga na teemo nshiiya ku-uwe hë,
kasi bhoono igho,
naingʼarëëyë kö-bhëëtö bhonswe igho.
12 Bhoono ndamukyörya ku-uwe,
kasi nemohanshirë kya enkoro iyaane.
13 Kora nkutuna ndë igha hano akaghëndërrya okobha na öni hano,
okore antöörringa ghaara uwe okaantörri enkaagha eno ndëngë mo-kebhohe,
ko okoghera iya okoraareka Amangʼana Amaiya.
14 Kasi bhoono ndööshë igha,
okokora engʼana igho otanyikërërrëëyi,
ti-bhuuya hë.
Kora tinkutuna nkusingʼirri igha öntöörri,
kasi ni-igha okore bhuuya bhono uwe umwene ukutuna.
15 Mbe,
okaanyoora Onesimo yaaruurë waaho ku-ribhagha ike igho,
okore umunyoore ghwiki abhe na uwe makora ghonswe igho.
16 Ukurwa bhoono igho,
tarëngë kya omoghorwa ku-uwe hë.
Kasi nakërrë omoghorwa.
Uyö m-mura uwëënyu omoghonshe.
Öni nemohanshirë bhököngʼu,
kasi uwe,
noraamohanshe bhököngʼu konkera.
Noraamohanshe igha m-moghorwa uwaaho,
na ko bhoora igha m-Mukiristo murikyaho.
17 Mbe,
nyoore omanyirë igha öni na uwe n-këntö këmwë törëngë,
umwikërri kya bhono okaanyikërëëyi öni.
18 Nyoore Onesimo yaarenga akosarëëyi engʼana yoyonswe igho,
handë igha aana isiirë iyaaho,
öni nendaakohake isiirë iyö.
19 Öni Pauro,
nandëkirë na okobhoko ukwane umwene igha,
nendaakohake.
Kasi otakaashe webhe igha oona isiirë iyaane,
ko bhoora naakoraarekera engʼana iya Waryobha okabha Umukiristo.
20 Bhoono umukumya murikyane,
nkorra engʼana iyö ko okoghera iya Omonene Yëësu.
Nkëndya enkoro iyaane kya wamwëtö ku-Kiristo.
21 Nkukwandekera ndë manyirë igha,
noraaghaikërri.
Kora noraakore okokera bhuyö nkosabhirë.
22 Hamwë na ghayö,
ndasabha önsëëmëri ahasë aha ukwikara,
ko bhoora ko okohetera amasabhi aghëënyu,
nkwesegha ndë igha Waryobha naraantöörri niishe kö-bhëënyu iyö.
Amakëërërryö agha okoragha
23 Epafura arakökëërya.
Wonswe hamwë törë nawe mo-kebhohe mono ko okoghera iya okoraareka Amangʼana Amaiya agha Kiristo Yëësu.
24 Kora abhaköri abha emeremo bharikyane,
Maariko bhaana Arisitariko,
Dema na Ruuka,
bhonswe bharakökëërya.
25 Örööbhö urwa Omonene Yëësu Kiristo robhe na bhëënyu bhonswe igho.