Ritashandighi irya kabhërë irya Pauro
ku-Timoteo
Amakëërërryö
1
Nö-öni Pauro nkwandeka ritashandighi reno.
Waryobha ku righonshe iryaye yaatunirë igha,
mbe omotomwa uwa Kiristo Yëësu,
okore ndaareke amangʼana agha öbhöhöru.
Waryobha yaaraghaini igha,
ömöntö nkunyoora arë öbhöhöru bhuyö,
ku ukukumya Yëësu Kiristo.
2 Timoteo nu-uwe nkwandekera.
Uwe omoona uwaane omoghonshe ku-mukumo ghono tokosanga hamwë.
Örööbhö,
ikyabhera na omorembe ukurwa ku-Waryobha Taata uwëëtö na ko-Monene uwëëtö Kiristo Yëësu,
bhebhe hamwë na uwe.
Pauro arakumya Waryobha na okotogheka Timoteo
3 Öni nkukumya ndë Waryobha ono nkokorra emeremo ko amaitegherro amaiya,
kya bhoora abhakörö abhaane bhamokorranga emeremo.
Ku bhuyö,
nkukuhiita ndë senkaagha syonswe igho ko-masabhi aghaane ubhutikö na omobhasö.
4 Nkuhiita ndë bhoora waakuurrë amaisöri,
roora twaatighaini.
Nkwighomba ndë bhököngʼu igha,
hano tokamaahana ghwiki,
okore nshomerwe bhököngʼu.
5 Kora ghwiki nkuhiita ndë umukumo ughwaho ughwa obhoheene.
Umukumo ghuyö ghöökö uwëënyu Röisi yaarenagho,
na nyakuwëënyu Eunike wonswe.
Neena obhoheene igha,
kora uwe wonswe nonagho.
6 Ku bhuyö,
nkukuhiitökya ndë igha,
okore omotono ughwa okokorra emeremo ituho eno Waryobha yaakohaayë,
hano naakötöörëëyë amabhoko.
7 Okorenga igho,
ko bhoora igha,
umwika ghono Waryobha yaatohaana,
tu-ughwa obhoobha hë,
kasi nu-ghwa okotohaana singuru,
righonshe na obhotoro ubhwa ukwirebherra.
8 Mbe,
bhoono otakaasooka ukwimererra amangʼana agha Omonene uwëëtö Yëësu Kiristo,
handë okomaaha sënsöni ko bhoora igha öni mo-kebhohe ndë ko okoghera iya Omonene uwëëtö uyö.
Kasi ghömërrya inyaanyi hamwë na öni,
ko okoghera iya Amangʼana Amaiya,
ku singuru seno okohaanwa na Waryobha.
9 Waryobha yaatötöörya,
akatushaaghora tobhe abhantö abhaaye.
Tiyaakörrë igho ko bhoora igha twaakora amangʼana amaiya,
ti-igho hë.
Kasi yaakörrë igho ko okoghera iya ësëëmyö iyaaye,
na örööbhö urwaye.
Yaatohaayë örööbhö ruyö,
ko okoreeta Kiristo Yëësu ko okoghera iya bhëëtö.
Yaakörrë igho kora ataraabhomba ekebhara.
10 Kasi bhoono,
Waryobha yöörökëri örööbhö urwaye kö-bhëëtö,
ku ukuusha ukwa Kiristo Yëësu Ömötöörya uwëëtö.
Uyö,
we yaaruusya-ho obhotoro ubhwa uruku,
akatohonyorra öbhöhöru ubhwa amakora ghonswe igho,
ko Amangʼana Amaiya.
11 Öni naashaaghorwa mbe omoraarëki,
omotomwa,
na umwëghya uwa Amangʼana Amaiya ghayö.
12 Kiyö nkyo kekoghera ndanyanka.
Kasi tenkosookera inyanko iyö hë,
ko bhoora nemanyirë ono naakumya.
Ghwiki nemanyirë igha,
amangʼana agha obhoheene ghano Yëësu Kiristo yaangʼaana,
a nkogharenda arë bhuuya okohekera urusikö roora arikyora.
13 Onaghi bhuuya amëëghyö agha obhoheene ghaara naakwëghëri.
Öghëëghinga ko-bhantö,
öghëndërri okobha na umukumo na righonshe bheno twaahaanwa ko okobha na öbhömwë na Kiristo Yëësu.
14 Amangʼana amaiya ghano waatëëbhibhwa,
ogharende ku singuru isya Umwika Ömöhörëëru ono arëngë mö-bhëëtö.
15 Uwe nomanyirë igha,
abhantö bhonswe igho abha mo-mokowa ughwa Asia Enke bhantigha.
Mo-bhayö,
bhaamo bhaabho Fughero na Herimoghene.
16 Ndasabha igha,
Omonene Yëësu aashe kwabhera abhantö abha wa Onesiforo,
ko bhoora hare kaaru yaasambaarokyanga enkoro iyaane.
Kora tiyasookanga ukuusha okommaaha mo-kebhohe.
17 Hano yaaishirë mu-mughi ughwa Ruumi hano,
yaakörrë omotono ughwa ukuntuna akannyoora.
18 Na uwe wonswe nomanyirë bhuuya,
amangʼana amaaru ghano yaankörëëyë mu-mughi ughwa Ëfësö hayö.
Omonene Yëësu aashe kumwabhera urusikö roora urwa okobhotora ibhiina.b