Ukuusha ukwa kabhërë ukwa Omonene Yëësu
2
Bhoono abhakumya bharikyëtö,
tigha tobhandekere amangʼana agha ukuusha ukwa Omonene uwëëtö Yëësu Kiristo,
na kya igho turimwisangerra.
a Keno tokobhasabha ni-igha,
2 motakaaheeta okobhaabhayera morakanya igha,
urusikö urwa ukuusha ukwa Omonene ruhikirë.
Mbe,
eratora okobha igha mwaaighwa amangʼana nyabhorebhe agha öbhörööti,
handë agha obhoraarëki,
handë agha ritashandighi reno mokokanya igha ni-ryëtö.
3 Motakaikërrya ömöntö wowonswe oora abhangʼaine ko-ngʼana yoyonswe eera,
ko bhoora urusikö ruyö urwene teroraahika hë.
Tangata sinsikö sihike isya abhantö abhaaru okoteeya bhököngʼu ku-Waryobha,
na hano ömötëëyu omonene aremaahekana.
Umuhiko ughwa ömötëëyu uyö,
nu-kusikibhwa këmwë.
4 Ömötëëyu uyö nariitanganga kera ëkëntö keno abhantö bhakokora igha nkyo Waryobha,
handë amasambwa aghaabho ghano bhakosengerra,
kora nariitoora ighörö iya bhyonswe igho.
Ghwiki areesoha na ukwikara mu-nyumba iya Waryobha na ukwighegha igha we Waryobha.
5 Nemanyirë nkuhiita mörë igha,
hano naarenga hamwë na bhëënyu,
ghayö ghonswe igho ngo naabharaghërryanga.
6 Mmomanyirë keno kekorebherra ömötëëyu uyö bhoono igho,
okore aashe okomaahekana ko-nkaagha iyaako.
7 Kora bhoono ömötëëyu uyö,
nkokora arë emeremo aibhisirë.
Kasi tamaahekane hë,
okohekera hano ono akomorebherra arëhëënibhwa-ho.
8 Hayö bhoono,
ho ömötëëyu uyö aremaahekana.
Kasi hano Omonene Yëësu ariisha,
narimwita na umwika ughwa mu-munywa ughwaye,
na narimusikya ko okohetera ubhuhika ubhwa ukuusha ukwaye.
9 Ömötëëyu uyö,
nariisha na singuru syonswe igho isya Oghosambwab na arekora amakono na ebhemanyërryö ibhya obhorongo.
10 Narebhangʼaina ko obhongʼanangʼana ubhwaru,
bhonswe igho bhano bharëngë ko-bhesendo ibhya ukusira,
ko bhoora bhakwanga ukwikërrya obhoheene,
okore bhatööribhwi.
11 Nkyo Waryobha yaabhaikërërrya bhatangatwe na singuru isya okobhasirya,
okore bhaghëndërri ukukumya obhorongo.
12 Hayö ho bharebhotorrwa ikiina,
abhantö bhonswe igho bhano bhatarikumya obhoheene kasi në-bhëbhë bhaashomerrwanga nabhyo.
Monaghi umukumo ughwënyu
13 Kasi bhëëtö,
ni-igha tukumi Waryobha senkaagha syonswe igho,
ko okoghera iya bhëënyu abhakumya bharikyëtö,
bhëënyu bhano mohanshirwë na Omonene Yëësu.
Ni-igha tokore igho,
ko bhoora yaabhashaaghööyë ukurwa okosemoka ukwaye ukwa öbhöbhömbi,
c okore möhönibhwi.
Möhönibhwi ko okosaabhuurwa na Umwika Ömöhörëëru ono akosaabhuura,
na ko kohetera ukukumya ukwënyu obhoheene.
14 Waryobha yaabhabhërëkëëyë,
okore munyoore öbhötöörya bhuyö okohetera ko Amangʼana Amaiya ghano twaabharaarëkëëyë.
Abhabhërëkëëyë okore munyoore ubhuhika ubhwa Omonene uwëëtö Yëësu Kiristo.
15 Bhoono abhakumya bharikyëtö,
mwimerre monaghe,
moghoote amëëghyö ghano mwaaikërëëyi,
nekaabha ko-nshera iya obhoraarëki ubhwëtö,
handë ko-nshera iya amatashandighi aghëëtö.