Ukwisëëmya urusikö urwa Omonene Yëësu rotaraahika
5
Abhakumya bharikyëtö,
törööshë igha,
totakaabhandekera amangʼana agha senkaagha na ribhagha irya ukukyora ukwa Omonene Yëësu.
2 Ko bhoora bhëënyu abheene mmomanyirë igha,
urusikö urwa ukuusha ukwa Omonene Yëësu,
ndorebhasha abhantö kya hano umwibhi yaasha ubhutikö.
3 Enkaagha eno abhantö bhakokanya igha,
“Omorembe ghooho,
na kora amangʼana ghonswe igho m-buuya ghakughya,”
hayö ho obhosarya bhukwebhokera.
Obhosarya bhuyö mborebhabhasha kya hano ebhesa bhyatakya omokari ono arëngë enda.
Ku bhuyö,
tebharëtööribhwa kora hake igha hë.
4 Kasi bhëënyu,
abhakumya bharikyëtö,
urusikö ruyö terorebhabhasha kya umwibhi hë,
ko bhoora bhëënyu ko amangʼana ghayö,
tëmörëngë mu-kisuntë hë.
5 Ko bhoora bhëënyu bhonswe igho,
mmoona emerengaari,
ghwiki m-baana abha obhorabhu mörë.
Bhëëtö,
tëtörëngë abhantö abha amangʼana agha ubhutikö handë agha mu-kisuntë hë.
6 Bhoono totakaaraara sentero kya abhandë,
tobhe maiso,
na ukwirebherra.
7 Abhantö bhano bhakoraara sentero,
nu-bhutikö bhakoraara.
Kora abhanywi abha amarwa,
nu-bhutikö bhakoghanywa.
8 Kasi ko bhoora bhëëtö m-bantö abha mo-bhorabhu törë,
twirebherre.
Tobhe na umukumo hamwë na righonshe,
bhiyö bhebhe kya ingubha iya ökökëngërrya ibhikubha ibhyëtö.
Ghwiki tweseghe Waryobha igha natötöörya,
hayö ho toraabhe kya bhano tötöörrë sëngöfiira isya ikyoma ko-metwe.
9 Waryobha tiyaatushaaghööyë,
okore atusiki ku ukutushibhya hë.
Kasi yaatushaaghööyë,
okore töhönibhwi okohetera ko-Monene uwëëtö Yëësu Kiristo.
10 Uyö we yaakuurë okoghera iya bhëëtö,
okore twikare hamwë nawe,
enkaagha eno tökërëngë abhahöru,
kora hano urinyoora tukuurë.
11 Ku bhuyö abhakumya bharikyëtö,
motoghekane na ökötöörrania bhököngʼu.
Eteemo inshiiya ko abhakumya
12 Bhoono abhakumya bharikyëtö,
torabhasabha igha,
mosookenga bhaara bhakobhatöörrya,
na eno bharabhatangata na okobhaghambera ku ubhwera ubhwa Omonene Yëësu.
13 Mobhahanshe na okobhasooka bhököngʼu ko okorengʼaana na emeremo ighyabho.
Mokorranenga amangʼana agha omorembe,
bhëënyu abheene ko abheene.
14 Abhakumya bharikyëtö,
torabhasaasaama igha,
mokaaninga abhooro na okotogheka bhano bhaakwa emetwe.
Ghwiki motoghekenga bhano bhataana singuru na ököghömërrya abhantö bhonswe igho.
15 Mwangarre,
ömöntö wowonswe oora atakaahaka murikyaye obhoghogho ko-ngʼana engogho eno oraanyoore amökörëëyë.
Kasi senkaagha syonswe igho,
mokorranenga ubhwa heene bhëënyu abheene ko abheene na okokorra igho abhantö bhonswe igho.
16 Mushomerwenga senkaagha syonswe igho,
17 mosaasaamenga ko-senkaagha syonswe igho.
18 Mukuminga Waryobha ko amangʼana ghonswe igho.
Ko bhoora ni-igho Waryobha akutuna mokorenga kya bhoora Kiristo Yëësu yaatwörökërrëëyi.
19 Motakaarebherra Umwika Ömöhörëëru.
20 Motakaasera amangʼana agha öbhörööti,
21 kasi moghashaashi,
moghoote ghano gharëngë bhuuya.
22 Engʼana iyëndë ni-igha,
mwibhashe amangʼana amaghogho ghonswe igho.
23 Waryobha ono akotohaana omorembe,
abhasaabhuure ko amangʼana ghonswe igho.
Abharende senkoro isyënyu na öbhöhöru ubhwënyu na ëmëbhërë ighyënyu,
okore motakaatemwanga amasoro,
okohekera enkaagha iya ukuusha ukwa Omonene uwëëtö Yëësu Kiristo.
24 Waryobha ono akobhabherekera,
naraabhakorre ghayö,
ko bhoora arëngë uwa heene.
Amangʼana agha okoragha
25 Abhakumya bharikyëtö,
motosabherenga ku-Waryobha.
26 Mokeerani abhakumya bharikyëtö bhonswe igho ku ukwibhaarana ököhörëëru.
27 Nkobhatema ndë imuuma ku ubhwera ubhwa Omonene Yëësu igha,
ritashandighi reno mosomere abhakumya bharikyëtö bhonswe igho.
28 Örööbhö urwa Omonene uwëëtö Yëësu Kiristo,
robhe hamwë na bhëënyu bhonswe igho.