Ritashandighi irya Pauro
ko-Bhafiripi
Amakëërërryö
1
Ritashandighi reno nö-öni Pauro ndyandëkirë tohamwë na murikyane Timoteo.
Uyö we nkokora hamwë nawe emeremo ighya Kiristo Yëësu.
Torandekera abhaimërërri,
abhashemaasi,
na abhantö abha Waryobha bhonswe igho bhano mörëngë Firipi hayö,
bhano mwabha ëkëntö ëkëmwë na Kiristo Yëësu.
2 Örööbhö na omorembe ukurwa ku-Waryobha Taata uwëëtö,
na ko-Monene uwëëtö Yëësu Kiristo bhebhe hamwë na bhëënyu.
Pauro arasabhera Abhafiripi
3 Hano nabhahiita nkaagha syonswe igho,
nkumya Waryobha,
Omonene uwaane.
4 Ghwiki hano nabhasabhera,
nkobhasabhera ndë nshömëëywë,
5 ko bhoora bhëënyu mwabha ëkëntö ëkëmwë na öni,
ko okoraareka Amangʼana Amaiya agha Yëësu Kiristo.
Mwaakörrë igho ukurwa urusikö roora mwaakumiri okohekera urusikö urwa reero.
6 Neena obhoheene igha,
Waryobha ono yaasyora emeremo imiiya mo-senkoro isyënyu,
naraaghëghëndërri,
kora nareghemarërrya urusikö roora Kiristo Yëësu arikyora.
7 M-buuya nkokora okobhatemera omotwe bhëënyu bhonswe igho ko amangʼana ghayö,
ko bhoora nembahanshirë bhököngʼu.
Nkosanga mörë na öni örööbhö urwa Waryobha,
ukukiinanera Amangʼana Amaiya na okoghaimererra hamwë na bhëënyu,
nokaanyoora igha mo-kebhohe ndë,
handë igha temo-kebhohe ndë hë.
8 Waryobha namanyirë igha no-bhoheene nkoghamba,
hano nakangʼasërrya igha,
nkwighomba ndë okomaahana na bhëënyu ghwiki.
Nembahanshirë ku righonshe reerareera Kiristo Yëësu abhahanshirë.
9 Nkobhasabhera ndë ku-Waryobha igha,
righonshe iryënyu rëghëndërri ukwaruha bhököngʼu,
kora mobhe na obhongʼaini na okomanya amangʼana,
10 okore momanye amangʼana amaiya agha okokora.
Hayö ho moraarongehe,
kora temoobhe na amasoro okohekera urusikö roora Kiristo arikyora.
11 Öbhöhöru ubhwënyu mburishore amangʼana agha obhoheene ghano ghakotooka okohetera ku-Yëësu Kiristo.
Ëkëntö kiyö nkeraaghere Waryobha atöönibhwi na ukukumibhwa ko-ghayö.
Öbhöhöru nu-bhwa ukutighinkanera Kiristo
12 Mbe,
abhakumya bharikyëtö,
nkutuna ndë momanye bhuuya igha,
amangʼana ghonswe igho ghano ghaannyoora,
ngaasangania bhököngʼu ököntöörrya okoromaania Amangʼana Amaiya.
13 Ko bhuyö bhonswe igho,
abhasirikare abharëndi abha ughunyumba ughwa omokama,
hamwë na abhantö abhandë bhonswe igho,
mbaamanyirë ikibhuno ikya okobhohwa ukwane igha,
n-ko bhoora nkutighinkanera Kiristo.
14 Hamwë na ghayö ghonswe igho,
nemanyirë igha,
okobhohwa ukwane kono,
kwaghera senkoro isya abhakumya bharikyëtö abhaaru,
syanagha ko-Monene Yëësu.
Ku bhuyö nkoraarekera bharë abhantö engʼana iya Waryobha ku singuru syonswe igho,
kora tebhaana entarëki hë.
15 No-bhoheene igha,
bhaaho abhandë bhano bhakoraareka amangʼana agha Kiristo,
ku rikenge na riihë.
Kasi abhandë hobharë,
bhano bhakoraareka kwa nkoro nshiiya.
16 Nyankoro nshiiya,
bho nkokora bharë igho,
ku righonshe reno bhanaryo ku-öni,
ko bhoora mbamanyirë bhuuya igha,
Waryobha yaantoora mo-kebhohe,
okore nkiinanere Amangʼana Amaiya.
17 Kasi nyaihë bho nkoraareka bharë amangʼana agha Kiristo bhaana rikenge,
te-kwa nkoro nshiiya hë.
Bho nkutuna bharë bhankorerre,
okore inyaanyi iyaane ebhe enene mo-kebhohe.
18 Kasi ngʼana teraasareka hë!
Ko bhoora amangʼana agha Kiristo nkoraarekwa gharë,
nekaabha kwa nkoro ngogho,
handë kwa nkoro inshiiya.
Ko okoghera iya engʼana iyö,
öni nkushomerwa ndë.
Ghwiki nendaaghëndërri ukushomerwa.
19 Nemanyirë igha nendaahone ko-ghonswe igho ghano ghaanyoora,
ko bhoora mokonsabhera ku-Waryobha,
na kora Umwika uwa Yëësu Kiristo nköntöörrya arë.
20 Ndaghanya kwa inyonta enene na ukwitengʼera igha,
tënsöökërribhwi kwa nshera yoyonswe igho hë.
Bhoono kya bhono yaarë sinsikö syonswe igho,
nendaaghëndërri kwiköngʼërya mo-nkoro,
okore Kiristo atöönibhwi ko ghano ghonswe igho nkokora,
nekaakwa,
handë hone.
21 Ko bhoora öni nenkaabha möhöru,
öbhöhöru ubhwane mboraabhe ubhwa okomanya,
okohansha,
ukutighinkanera na ökötöönia Kiristo.
Kora nenkaakwa,
ukukwa ukwane nkoraabhe ehoorohooro enene ku-öni.
22 Kasi hano ndaaghëndërri okobha möhöru,
nendaaghëndërri okokora bhököngʼu emeremo gheno nkokora.
Kasi bhoono öni temanyirë igha n-dëëhë ndaashaaghore hë.
23 Ndarutanwa ghatë iya amangʼana abhërë ghayö.
Öni nkwighomba ndë igha,
hano nkaarwa ko-kebhara kono,
ngende kwikara hamwë na Kiristo.
Ko-robhaara urwane,
iyö yo engʼana inshiiya bhököngʼu.
24 Kasi ndamaaha igha,
n-kenene ngëndërri ukwikara ko-kebhara kono,
ko okoghera iya bhëënyu.
25 Ko bhoora neena obhoheene ubhwa engʼana iyö,
nemanyirë igha nendaaghëndërri okobha ko-kebhara kono.
Ghwiki nendaabhe hamwë na bhëënyu bhonswe igho,
okore mbatöörri mukiine ku-mukumo ughwënyu na mushomerwe.
26 Enkaagha eno ndebha hamwë na bhëënyu,
murishomerwa bhököngʼu ku-Kiristo Yëësu,
ko bhoora igha,
nurinyoora antöörri nkyore kö-bhëënyu.
27 Engʼana enene ni-igha,
mobhe na eteemo eno ekorengʼana na Amangʼana Amaiya agha Kiristo.
Hano ndaashe okobhamaaha handë nange ukuusha,
kasi nighwenga igha,
nköghëndërrya mörë okonagha,
kora moona öbhömwë.
Nkunyankera mörë hamwë umukumo ghono ghokotooka ko Amangʼana Amaiya.
28 Kora motakoobhohanga abhabhisa bhëënyu,
okokora igho,
nkwo kukwörökya igha,
bho nko-nshera iya ukusikibhwa bharë,
kasi bhëënyu nko-nshera iya ökötööribhwa mörë.
Ghayö ghonswe igho ne-meremo ighya Waryobha.
29 Ko bhoora tukukumya Kiristo ukwene igho mwaahaanwa,
kasi kora inyanko yonswe mwatoorrwa-ho ko okoghera iya we.
30 Moraitana riihë reerareera naitananga kya bhoora mwaarööshë.
Ghwiki kora bhoono nkwighwa mörë igha nköghëndërrya ndë ukwitana.