Rikaaniö irya umuhiko
13
Oroghendo rono nu-urwa katatö,
öni ukuusha kö-bhëënyu iyö.
Amaandeko Amahörëëru gharaghamba igha,
“Kera engʼana iya obhosarya,
ni-igha yemererrwe na abhantö abhabhërë handë abhatatö,
abha ukwitegherra ikiina kiyö.”a
2 Hano naaishirë kö-bhëënyu hayö urwa kabhërë,
naakaanëri bhaara bhaakörrë ëbhëbhë.
Bhoono igho,
n-hare ndë,
kasi nkötëëbhya ndë bhaara bhaakora ëbhëbhë na abhandë bhonswe igho ku ukukyorra amangʼana ghaaraghaara igha,
hano ndiisha,
tindyabhera ömöntö hë.
3 Nendekora igho,
ko bhoora mukutuna ekemanyërryö ikya ukwörökya igha,
m-maheene Yëësu Kiristo nkoghamba arë okohetera ku-öni?
Yëësu Kiristo uyö,
të-mötëntëëru hë,
kasi naana singuru,
we uyö akokora emeremo mö-bhëënyu.
4 No-bhoheene igha,
Yëësu Kiristo yaahanëkirwë ko-mosarabha kö-bhötëntëëru ubhwa kinyabhantö,
kasi bhoono igho,
m-möhöru ko obhotoro ubhwa Waryobha.
Amangʼana ni-igho gharë igha,
bhëëtö m-batëntëëru törë ku-Yëësu Kiristo,
kasi moremaaha igha,
ntorebha abhahöru ko obhotoro ubhwa Waryobha.
5 Mwiyitaahe bhëënyu abheene,
mwimmaahe nyoore m-maheene mmoona umukumo.
Kasi temomanyirë igha,
Yëësu Kiristo mö-bhëënyu muyö arë?
Hano oraanyoore igha ti-igho ërë hë,
hayö momanye igha,
ubhwitaahi ubhwënyu,
tëbhöhëkërëëyë ekerengere keno kikutunwa hë.
6 Kasi ndaitengʼera igha,
bhëënyu bhoono momarrë okomanya igha,
bhëëtö twahekeera ekerengere.
7 Nkosaasaama törë Waryobha motakaakora engʼana engogho yoyonswe eera,
te-ko okoghera igha toratuna tomaahekane igha bhëëtö töhëkëëyë ekerengere kiyö.
Kasi keno tukutuna,
ni-igha bhëënyu mokore amangʼana amaiya,
nokaanyoora bhëëtö tonga kya bhano twakerwa.
8 Ngambirë igho,
ko bhoora tetootore okokora engʼana yoyonswe eera,
iya okorebherra obhoheene,
kasi no-kokora ëkëntö ko okoghera iya obhoheene.
9 Nkushomerwa törë,
hano twabha abhatëntëëru kasi bhëënyu mobha na singuru.
Nkosaasaama törë Waryobha igha,
abhahekerani.
10 Nkobhandekera ndë amangʼana ghano ntaraasha kö-bhëënyu iyö,
okore hano ndiisha,
ntakaasha okomaaha amangʼana ghano ghareghera nderre kora mbööröki ubhwera ubhwane bhono neenabho ko-Monene.
Nkoghamba ndë igho,
ko bhoora Omonene tiyangʼaana ubhwera ubhwa okobhasarya,
kasi nu-bhwa okokora umukumo ughwënyu ghonaghe.
Amangʼana agha okomarërrya
11 Bhoono abhakumya bharikyane,
nkomarërrya ndë ko okobharagha na eno ndabhatëëbhya igha,
mohekerane ko amangʼana aghëënyu,
mobhe abhantö abha ököröörësania,
mobhe ikiina ëkëmwë,
mobhe na omorembe.
Hayö ho Waryobha uwa righonshe na omorembe araabhe hamwë na bhëënyu.
12 Mokeerani ku ukwibhaarana ököhörëëru.
Abhahörëëru abha Waryobha bhonswe igho bhano bha hano,
bharabhakëërya.
13 Örööbhö urwa Omonene uwëëtö Yëësu Kiristo,
na righonshe irya Waryobha na öbhömwë ubhwa Umwika Ömöhörëëru,
bhebhe hamwë na bhëënyu bhonswe igho.