Ökötöörrya abhantö
8
Mbe,
bhoono nkutuna törë bhëënyu abhakumya bharikyëtö,
momanye örööbhö urwa Waryobha rono amakanisa agha Makedonia ghaanyoora.
2 Abhantö bhayö,
m-batöbhu bhököngʼu,
kora bhaanyoora amashaasho amaköngʼu agha inyanko,
kasi ukushomerwa kono bhaarë nako,
n-konene kwaarë.
Kora ukushomerwa kuyö,
nkwo kwaaghërrë bhakabha abhantö abha ökösërëënia bhököngʼu abhantö.
3 Nkobhaimererra ndë igha,
bhaaruusiri ëbhëntö ibhyaru okokera obhotoro ubhwabho bhono bhaarë nabho.
Kora mbaaruusiri ko okohansha ukwabho abheene.
4 Bhakatosaasaama bhököngʼu igha,
abheene bhonswe bhanyoore umweya ughwa okobha mo-bhantö bhano bhakötöörrya abhahörëëru abha Yërusarëëmu.
5 Mbaakörrë okokera bhono twaakanyanga igha bhakaakörrë.
Ko bhoora mbaaitörrë abheene mo-mabhoko agha Omonene ekembere,
ho bhaamarrë,
bhakaitoora na kö-bhëëtö,
kya bhono Waryobha akutuna.
6 Ko bhoora Tiito we yaasëmööyë engʼana iyö kö-bhëënyu hayö,
ku bhuyö tokamosaasaama igha,
aashe iyö abhatöörri,
momarërri engʼana iya örööbhö iyö.
7 Bhëënyu m-baamë mörë abha bhyonswe igho,
m-baamë mörë abha umukumo,
obhoraarëki ubhwa engʼana,
obhomanyi,
omotono na righonshe iryënyu kö-bhëëtö,
ni-ighoigho tukutuna kora igha mobhe abhaamë abha enkoro iya okokora igho.
8 Tenkoghamba igho,
okore mbahamërri,
kasi nkutuna ndë mmaahe nyoore righonshe iryënyu,
ni-irya obhoheene ko okobhatëëbhya amangʼana agha omotono ughwa abhantö abhandë.
9 Bhëënyu mmomanyirë örööbhö urwa Omonene uwëëtö Yëësu Kiristo igha,
nokaanyoora m-mwamë yaarë,
kasi yaaikërëëyi abhe ömötöbhu ko okoghera iya bhëënyu,
okore mwamehe ko okohetera kö-öbhötöbhu ubhwaye.
10 Ëkëntö ikiiya keno nkabharaghërrya ko engʼana iyö,
ni-igha,
omooka ghwahëtirë,
kerenga haara mwaarë abha mbere,
ti-ku ukuruusya ëbhëntö ukwene igho,
kasi kora igha,
mwaaighombanga okokora engʼana iyö.
11 Bhoono ni-igha,
momarërri keno mwaasëmööyë okokora kya bhono mwaaighombanga,
mokore omotono ughwa ukuruusya ëbhëntö ko okorengʼaana na ëbhëntö bheno moonabhyo.
12 Hano wanyoora ömöntö aana omotono ughwa ökötöörrya,
Waryobha nkwikërrya arë ko okorengʼaana na ekerengere kiyö aanakyo.
Waryobha tamutune aruusi keno aataanakyo.
13 Keno nkutuna ti-igha,
bhëënyu munyanke kö ökötöörrya abhandë,
kasi abhandë bhanyoore ehoorohooro kö-bhëënyu,
a a,
14 kasi keno nkutuna ni-igha,
morengʼaane bhonswe igho.
Enkaagha eno bhëënyu moona ëbhëntö ibhyaru,
mobhatöörri ko-bhohabhë ubhwabho bhono bhaanabho,
okore hano abheene bhonswe bharebha na ëbhëntö ibhyaru,
bhabhatöörri na bhëënyu.
Ku bhuyö,
kuyö nkwo okorengʼaana.
15 Hayö ho erebha kya bhono Amaandeko Amahörëëru ghakoghamba igha,
“Ono yaakomania ibhyaru,
tiyaabhaayë na bheno bhyaatighaayë hë,
na ono yaakomania bheke,
tiyaasuuhwa hë.”a
Tiito aratomwa Körintö
16 Nkukumya ndë Waryobha,
ono yaakora Tiito abhe na omotono ughwa okobhangarra,
kya bhono öni nkobhangarra.
17 Nkoghamba ndë igho,
ko bhoora hano twaamötëëbhëri igha,
aashe kö-bhëënyu iyö,
yaaikërëëyi.
Kora nkwighomba arë umwene ukuusha iyö.
18 Hamwë na uyö,
nkotoma törë umukumya murikyëtö ono akukumibhwa na amakanisa ghonswe igho,
ko-meremo ighyaye,
ighya okoraareka Amangʼana Amaiya.
19 Umukumya murikyëtö uyö,
kora we yaashaaghorwa na amakanisa igha,
ahinanenga na bhëëtö ko-roghendo urwa okohaheenera abhakumya abha Yërusarëëmu.
Emeremo ighya örööbhö ghiyö,
gheraghera Omonene Waryobha atöönibhwi,
ghwiki nkwörökya ërë kya bhono toona omotono ughwa ökötöörrya abhantö abhandë.
20 Nkutuna törë twitashe hare na risoro ryoryonswe reera,
irya emeremo gheno,
ighya ökösërëënia abhantö.
21 Keno tukutuna,
tokokora bhuuya mbere iya Omonene aheene igho,
kasi kora na ko-bhantö honswe.
22 Toratoma na umukumya murikyëtö uwöndë hamwë na bhaabho Tiito.
Nkomaaha törë igha,
umukumya murikyëtö uyö,
m-mara kaaru akwörökya igha,
aana omotono ughwa okokora emeremo,
kora bhoono igho,
nkwighomba arë bhököngʼu,
ko bhoora aana ubhweseghe obhonene kö-bhëënyu.
23 Mbe,
hano ömöntö araatune okomanya amangʼana agha Tiito,
Tiito uyö,
nö-mököri uwa emeremo murikyane kö-bhëënyu.
Na abhandë bhayö,
m-barikyëtö,
ekanisa yo ebhatömirë okore Kiristo atöönibhwi.
24 Ku bhuyö ni-igha,
möbhööröki righonshe iryënyu,
okore amakanisa ghamanye igha,
ntoona ikibhuno ikya ukwihasha ko okoghera iya bhëënyu.