Abhaköri abha emeremo abha Imuuma Eehya
3
Kanaa,
nkokanya mörë igha nkusimya törë ghwiki ukwikumya kö-bhëënyu?
Bhëëtö tëtörëngë kya abhantö abhandë,
igha toratuna ritashandighi irya ukwiyörökya kö-bhëënyu,
handë irya ukurwa kö-bhëënyu.
2 Ko bhoora bhëënyu,
m-bëënyu ritashandighi iryëtö,
reno ryandëkirwë mo-senkoro isyëtö,
reno remanyekaini,
kora nkosomwa rërë na abhantö bhonswe igho.
3 Nkomaahekana mörë bhuuya igha,
bhëënyu n-kya ritashandighi irya Yëësu Kiristo mörë,
reno rikwörökya emeremo gheno twaakora kö-bhëënyu.
Ritashandighi riyö,
tiryandekwa na ubhwino hë,
kasi ndyandekwa na Umwika uwa Waryobha ömöhöru.
Kora tëmörëngë kya ritashandighi reno ryandekwa ko-bhebhaau ibhya amaghena,
a kasi mo-senkoro isya abhantö.
4 Nkoghamba törë amangʼana ghayö,
ko bhoora toona ubhweseghe ku-Waryobha okohetera ku-Yëësu Kiristo.
5 Tërëngë igha nkokanya törë igha,
kyokyonswe keno tokokora,
n-ko obhotoro ubhwëtö abheene,
a a,
n-ko obhotoro ubhwa Waryobha.
6 Uyö,
we yaatokora tobhe abhaköri abha emeremo abha Imuumab Eehya,
eno ikurwa ku-Mwika uwa Waryobha.
Imuuma iyö,
tërëngë igha na-maraghërryö ghano ghaandekwa hë,
ko bhoora amaraghërryö ghano ghaandekwa,
gho nu-ruku ghakoreeta,
kasi Umwika uwa Waryobha,
we nö-bhöhöru akoreeta.
Ubhuhika ubhwa Imuuma Eehya
7 Amaraghërryö ngaatöörrwë-ho ku ukwandekwa ko-sembaau isya amaghena.
Nokaanyoora ngaamarrë ghakareeta uruku,
kasi ubhuhika ubhwako,
m-bonene bhököngʼu bhwaarë,
kora Abhaisiraëri tebhaatörrë okomaaherra ubhusyö ubhwa Mosa,
c ko okoghera iya emerengaari ighya-ko.
Emerengaari ghiyö,
n-gya ibhagha ike igho ghyaarë.
Mbe,
hano okomaaha igha emeremo ighya keera kyaarëëtirë uruku,
nkyaarenga na emerengaari ëmërörö bhököngʼu,
8 bhoono momanye igha,
emeremo ighya Umwika uwa Waryobha,
ngeraabhe na ubhuhika obhonene bhököngʼu.
9 Hano okomaaha igha,
omoremo ughwa okobhotorra abhantö ikiina ngoona ubhuhika ubhwako,
bhoono n-kwakë omoremo ghono ghokoghera abhantö bharakorwa okobha abha heene ku-Waryobha,
ghwange okobha na ubhuhika obhonene bhököngʼu?
10 Ku bhuyö tomanye igha,
ubhuhika ubhwa Imuuma iya Kare,
m-bukwerranu ko okoghera iya ubhuhika ubhurito bhököngʼu ubhwa Imuuma Eehya bhono bhooho bhoono igho.
11 Hano okomaaha igha keera kyaarë ikya enkaagha nke igho,
nkyaarë na ubhuhika,
ku bhuyö ikya senkaagha syonswe igho,
nkeena ubhuhika obhonene bhököngʼu.
12 Nkoghamba törë ko bhokarë,
ko okoghera iya ubhweseghe bhuyö toonabho.
13 Bhëëtö tetonga kya Mosa,
ono yaakundikiryanga ubhusyö ubhwaye na ikikundikiryö,
okore Abhaisiraëri bhatakaamaaha emerengaari gheno ghyaarë ku-bhusyö ubhwaye,
kya igho ghyaahwererranga.
14 Sehakëri isya Abhaisiraëri,
ni-ndito syaarë.
Ko bhoora igha,
kora bhoono igho,
hano Imuuma iya Kare yasomwa,
ikikundikiryö keerakeera,
nkobhakundikirya kërë.
Ikikundikiryö kiyö,
tikikuruusibhwa-ko hë,
ko bhoora nkuruusibhwa-ko kërë hano ömöntö yaabha na öbhömwë na Yëësu Kiristo.
15 M-maheene igha,
kora nanyabhoono hano ebhetabho ibhya Mosa bhyasomwa,
ikikundikiryö kiyö,
nkukundikirya kërë sehakëri isyabho,
bhanga okomanyërrya.
16 Kasi enkaagha yoyonswe igho eno ömöntö araakumi Omonene,
ikikundikiryö kiyö nkuruusibhwa-ko kërë.
17 Mbe,
Omonene we Umwika.
Ahasë hano Umwika uwa Omonene arë,
hayö ho öbhötöönööni bhörë.
18 Bhëëtö bhonswe igho bhano totakundikiiyi ubhusyö,
m-bëëtö emerengaari ighya Omonene ghekohetera-mo kya ikyowa.
Omonene ono ërëngë igha we Umwika,
nkutusyörya arë,
tutuubhane nawe,
ukurwa ko-merengaari okohekera ko-merengaari ëmërörö bhököngʼu.