Righonshe
13
Nenkaghamba ko-bheghambo ibhya abhantö,
handë ibhya abhamaraika,
kasi hano ntaana righonshe,
m-bosa,
obhoghambi ubhwane bhuyö,
n-kituri kya bhosa igho,
tebhoona moremo hë.
2 Ghwiki nekaabha na obhotoro ubhwa ukuruusya öbhörööti,
kora mmanye imbumbure na amangʼana ghonswe igho,
nenkaabha na umukumo omonene,
ughwa okotora okongʼaanya singuku,
kasi nyoore ntaana righonshe,
m-bosa.
3 Ghwiki kora nenkaghegha ëbhëntö ibhyane nhaane abhatöbhu,
handë niiruusi öni umwene nsambwe mo-morro,
a kasi nyoore ntaana righonshe,
m-bosa.
4 Ömöntö uwa righonshe,
nköghömërrya arë amangʼana,
nkösërëënia arë abhantö,
takobha na rikenge hë,
takwihasha handë ukwiheema hë.
5 Ömöntö uwa righonshe,
taana ekemoghoro hë,
takwitegherra na ukutuna amangʼana aghaaye agheene igho hë,
takorerra bhöngö hë,
handë okobheeka mo-nkoro iyaaye amangʼana amaghogho ghano abhantö bhakomokorra.
6 Ömöntö uwa righonshe,
obhoghogho tibhukumushomera hë,
kasi obhoheene mbo akushomerwa nabho.
7 Ömöntö uwa righonshe,
nköghömërrya arë ghonswe igho,
naana umukumo nkaagha syonswe igho,
naana ubhweseghe ko-ghonswe igho,
m-mötërëmu uwa ghonswe igho.
8 Righonshe terekotemboka hë.
Kasi hano oraanyoore öbhörööti bhooho,
nkusika bhörë,
hano oraanyoore ebheghambo ebhehya bheeho,
nkusika bhërë,
hano oraanyoore obhomanyi ubhwa amangʼana bhooho,
nkusika bhörë.
9 Ngambirë igho ko bhoora amangʼana ghano tomanyirë,
n-kerengere keke igho,
na öbhörööti ubhwëtö bhwonswe m-bwa kerengere keke igho.
10 Kasi hano kiriisha keno ketakusuuha,
ikisuuhu nkirisika.
11 Hano naarë omoona moke,
ukushumaasha ukwane n-kwa ikyana kwaarë,
na-mangʼana agha ikyana ngo naamanyirë,
amaitegherro aghaane n-ga ikyana ghaarë,
kasi bhoono nabhaayë ömöntö mökörö,
natighirë amangʼana agha ikyana.
12 Okomaaha kono tokomaaha bhoono igho,
n-kwa mawëëriwëëri,
n-kya hano ömöntö yamaaha ëkëntö mu-kitu,
kasi iriihika-ho enkaagha eno toremaaha bhuuya.
Bhoono igho n-kerengere keke igho ikya amangʼana keno mmanyirë,
kasi enkaagha iriihika-ho eno ndemanya bhuuya kya igho öni umwene mmanyirwë bhuuya na Waryobha.
13 Mbe,
amangʼana ghano ghaimërëëyë bhoono igho,
na-tatö,
umukumo,
ubhweseghe na righonshe.
Ko amangʼana atatö ghayö,
ekenene ni-righonshe.