Öbhömwë ko-meremo ighya Waryobha
3
Abhakumya bharikyane,
tenaashumaashirë na bhëënyu kya hano ömöntö akushumaasha na abhantö bhano bhakotangatwa na Umwika Ömöhörëëru.
Kasi naashumaashirë na bhëënyu,
kya hano ömöntö akushumaasha na abhantö bhano bhaana esemoko iya öbhököri ubhwa ëbhëbhë.
Naashumaashirë na bhëënyu kya ebhengʼerre ko mangʼana agha ukukumya Kiristo.
2 Naabhanywënsëri amabheere,
ti-bhyakorya naabhahaayë hë,
ko bhoora tewanyöörrë moraabha abha okorya ibhyakorya hë.
Kora bhoono,
temoraabha abha okorya ibhyakorya hë.
3 Ko bhoora nanyabhoono,
bhëënyu m-bantö abha esemoko iya öbhököri ubhwa ëbhëbhë mörë.
Hano okomaaha moona rikenge bheena öbhösëëghërrya,
momanye igha,
m-bantö abha esemoko iya öbhököri ubhwa ëbhëbhë mörë,
kora amangʼana aghëënyu nkoghakora mörë kinyamöbhërë.
4 Nkoghamba ndë igho ko bhoora hano ömöntö yaghamba igha,
“Öni nu-uwa Pauro ndë,”
uwöndë igha,
“Öni nu-uwa Apöörö ndë,”
mbe,
bhoono hayö tikunyoora örë morakora amangʼana ghano abhantö abha ko-kebhara kono bhakokora?
5 Mbe bhoono,
Apöörö n-nawë?
Na Pauro n-nawë?
Bhayö m-baköri abha emeremo abha Waryobha bhano bhaaghërrë mokakumya Waryobha,
kera ömöntö mo-bhayö,
yaakörrë emeremo gheno yaahaanwa na Omonene.
6 Öni nëëmya,
Apöörö akeeterra amanshë,
kasi Waryobha we akukiinia.
7 Mbe,
momanye igha,
umwëmya të-këntö hë,
kora na umwëtërri uwa amanshë,
wonswe të-këntö hë,
kasi ekenene n-Waryobha ono akukiinia.
8 Umwëmya na umwëtërri uwa amanshë,
m-bamwë bhayö,
kasi kera ömwë uwaabho,
narituhwa ko okorengʼaana na inyanko iyaaye.
9 Nkoghamba ndë igho ko bhoora bhëëtö m-baköri abha emeremo abha Waryobha törë,
na ömöghöndö ughwa Waryobha,
m-bëënyu,
kora m-bëënyu inyumba iyaaye.
10 Waryobha kö örööbhö urwaye rono yaangʼaana,
yaantöörrya okohaghaasha umusingi kya omohaghaashi umuuya omongʼaini,
ono amanyirë amangʼana,
nkatoora-ho umusingi ghono ömöntö uwöndë akohaghaasha-ko.
Mbe,
kera ömöntö angarre bhuuya bhono akohaghaasha ku-musingi kuyö.
11 Ko bhoora taaho ömöntö ono akotora okotoora-ho umusingi ughwöndë,
kasi n-goora ghwaamara okotoorwa-ho.
Umusingi ghuyö,
n-Yëësu Kiristo umwene.
12 Ömöntö aratora okohaghaashera-ko esahaabhu,
ebheghera ibhya seehera,
handë amaghena agha öbhöghöri,
handë ëmëtë,
amatö,
handë amanyanki.
13 Ubhuuya ubhwa omoremo ughwa kera ömöntö,
mboremaahekana harabhu igho.
Urusikö roora urwa okobhotora ikiina,
emeremo ghyonswe igho ngeremaahekana harabhu igho,
ko bhoora omoremo ughwa kera ömöntö,
ngurishaashibhwa ko okohetera mo-morro ughwa okobhotorra ibhiina.
14 Hano omoremo ughwa ömöntö ghörëhëtibhwa mo-morro ghotame,
ömöntö uyö narituhwa.
15 Hano omoremo ughwa ömöntö ghorerongora,
ömöntö uyö,
tarituhwa hë.
Kasi narëtööribhwa kya hano ömöntö ahönirë mo-morro.
16 Kasi motamanyirë igha bhëënyu ni-nyumba iya Waryobha mörë,
kora Umwika uwa Waryobha mö-bhëënyu amënyirë?
17 Hano ömöntö araasari inyumba iya Waryobhaa iyö,
Waryobha wonswe naraamosari.
Ko bhoora inyumba iya Waryobha në-hörëëru,
na inyumba iyö,
m-bëënyu.
18 Ömöntö atakaingʼaina umwene.
Hano ömöntö araaimaahe igha m-mongʼaini mö-bhëënyu ko-kebhara kono,
aikore igha mokangi,
okore abhe omongʼaini uwa heene.
19 Aikore igho,
ko bhoora obhongʼaini ubhwa ko-kebhara kono,
m-bokangi ku-Waryobha.
Amaandeko Amahörëëru gharaghamba igha,
“Waryobha we akoghashania abhangʼaini ko-bhongʼaini ubhwabho.”b
20 Ghwiki igha,
“Omonene namanyirë amaitegherro agha abhangʼaini,
igha teghaana ubhwera hë.”c
21 Mbe,
ömöntö wowonswe igho atakaibhaaka igha m-mosoorani uwa ömöntö nyabhorebhe,
ko bhoora bhëëtö bhonswe igho na bhëënyu,
22 nekaabha igha m-Pauro,
Apöörö,
Keefa,
ekebhara,
öbhöhöru,
uruku,
bheno bheeho,
handë igha,
bheno bherebha-ho,
bhyonswe igho ni-bhyënyu.
23 Kasi bhëënyu,
na-abha Kiristo mörë,
na Kiristo wonswe nu-uwa Waryobha.