Motakaabhotorranga ikiina abhakumya bharikyënyu
14
Mwikërringa nyamukumo mötëntëëru,
motakaanyerana senkaani ko amangʼana agha umukumo ughwaye.
2 Abhantö tebhakorengʼaana hë.
Nyamukumo ghonaghirë,
aratora okorya kyokyonswe keera.
Kasi nyamukumo mötëntëëru,
we n-sinyënyi akorya.
3 Ömöntö ono akorya kyokyonswe keera,
atakaasera ono akorya sinyënyi,
na ono akorya sinyënyi wonswe,
atakaabhotorra ikiina ono akorya kyokyonswe keera,
ko bhoora Waryobha nkumwikërrya arë kya igho arë.
4 Uwe toona ubhwera ubhwa okobhotorra ikiina ömököri uwa emeremo uwa ömöntö uwöndë.
Omonene uwaaye we amanyirë nyoore ömököri uwaaye uwa emeremo asarri,
handë igha tasarri hë.
Na ömököri uwa emeremo uyö,
noraanyoore akörrë kya bhoora ikutunwa,
ko bhoora Omonene Yëësu Kiristo naana obhotoro ubhwa okomokora akore bhono Yëësu Kiristo umwene akutuna.
5 Aaho ömöntö uwöndë ono akomaaha igha,
urusikö nyabhorebhe ndoona ubhwera okokera sinsikö isyëndë,
kasi uwöndë nkomaaha arë igha,
sinsikö syonswe igho nsituubhaini.
Kera ömöntö akore kya bhono akomaaha igha m-buuya ërë.
6 Ömöntö ono akomaaha igha urusikö nyabhorebhe ndoona ubhwera okokera sinsikö isyëndë,
nkokora arë igho,
okore atëghëri Omonene Yëësu Kiristo.
Na ono akorya kyokyonswe keera,
wonswe nkokora arë igho,
okore atëghëri Omonene Yëësu Kiristo,
ko bhoora takorya igho atakumiri Waryobha hë.
Ono akwanga okorya ibhyakorya nyabhorebhe,
nkokora arë igho,
okore atëghëri Omonene Yëësu Kiristo,
uyö wonswe nkukumya arë Waryobha.
7 Ngambirë igho,
ko bhoora taaho ömöntö mö-bhëëtö,
ono akwihaana öbhöhöru ko okoghera iya ehoorohooro iyaaye umwene,
handë ukukwa ko okoghera iya ehoorohooro iyaaye umwene.
8 Hano törëngë bhahöru,
öbhöhöru ubhwëtö bhobhe ko okoghera iya okokorra Omonene Yëësu Kiristo emeremo.
Na hano twakwa,
tukwe ko okoghera iya Omonene Yëësu Kiristo.
Ku bhuyö ntokaabha bhahöru handë igha ntokaakwa,
bhëëtö na-bhaaye törë.
9 Ko bhoora Yëësu Kiristo yaakuurë,
akaryoka,
bhoono m-möhöru,
okore abhe Omonene uwa bhonswe igho,
abhaku na abhahöru.a
10 Bhoono uwe,
n-kwakë okobhotorra ikiina umukumya murikyaho?
Uwe!
N-kwakë okosera umukumya murikyaho?
Momanye igha bhëëtö bhonswe igho,
nturyemerra mbere iya ikitumbë ikya ekekama ikya Waryobha ikya okobhotorra ibhiina.
11 Amaandeko Amahörëëru gharaghamba igha,
“M-maheene,
Omonene Waryobha araghamba igha,
‘Kera ömöntö narentemera hansë ibhiru,
kera ömöntö narinkumya ko bhoghambi ubhwaye umwene.’”b
12 Ku bhuyö ni-igha,
kera ömöntö mö-bhëëtö,
nareghamba ku-Waryobha amangʼana aghaaye umwene.
Nyamukumo omonene atakaasera nyamukumo mötëntëëru
13 Ku bhuyö ni-igha,
tutighe okotemana amasoro,
kora totakaakora kyokyonswe igho,
keno keraakore umukumya murikyëtö aituuretuure,
handë ikya okoghera akore ëbhëbhë.
14 Kö-bhömwë bhono neenabho na Omonene Yëësu Kiristo,
nemanyirë igha,
m-maheene tebheeho ibhyakorya bhyobhyonswe bheno nkotora okoghamba igha m-binyanku.
Kasi ömöntö ono akomaaha igha ibhyakorya nyabhorebhe igha m-binyanku,
hayö ho bhikumunyankuhya.
15 Ku bhuyö nyoore okorya ukwaho ibhyakorya nyabhorebhe nkoghera körë murikyaho abhaabhayera,
hayö bhoono uwe noraanyoore toona righonshe ku murikyaho hë.
Otakaikërrya igha ibhyakorya ibhyene igho,
bheghere usiri ömöntö ono Yëësu Kiristo yaakwera!
16 Ëkëntö keno uwe okomaaha igha n-kiiya ku-uwe,
kasi bharikyaho bharakemaaha igha n-keghogho,
otakaakekora.
17 Ko bhoora Obhokama ubhwa Waryobha,
tokorya handë ukunywa hë,
kasi no-kokora amangʼana agha heene,
okobha na omorembe,
na ukushomerwa,
ghayö nku-Mwika Ömöhörëëru ghakurwa.
18 Mbe,
hano ömöntö akörëëyë igho Yëësu Kiristo,
uyö nkötëghërya arë Waryobha,
kora abhantö nkumwikërrya bharë.
19 Mbe,
ku bhuyö ni-igha,
tokorenga amangʼana ghano ghakoreeta omorembe mo-bhantö,
na agha okotoghekana.
20 Otakaasarya emeremo ighya Waryobha,
ko okoghera iya ibhyakorya.
M-maheene ibhyakorya bhyonswe igho,
tebheena mughiro hë,
kasi ti-bhuuya ömöntö okorya ibhyakorya bhyobhyonswe igho,
bheno bheraaghere murikyaho aituuretuure ku-mukumo ughwaye.
21 Nyakara utighe okorya inyama na ukunywa idivai,
c handë okokora kyokyonswe keera kikutimba murikyaho.
22 Umukumo ughwaho ko engʼana iyö,
ghobhe ughwaho na Waryobha.
Ku bhuyö nyakara ömöntö ono atakwibhotorra ikiina mo-nkoro iyaaye hano yakora engʼana eno akomaaha igha,
ya heene.
23 Kasi ömöntö ono aana entarëki na umukumo ughwaye ko-keno akorya,
narebhotorrwa ikiina na Waryobha ko bhoora amanyirë ku umukumo ughwaye igha,
keera akokora,
ti-kiiya ku-Waryobha hë.
Ömöntö wowonswe ono akokora ëkëntö kyokyonswe keera atakukumya igha n-kya heene,
uyö në-këbhë akokora.