Yëësu yaabhaaha obhotoro ubhwa ëbhëbhë
6
Bhoono toghambe iyakë?
Toghambe igha töghëndërri okokora ëbhëbhë,
okore örööbhö urwa Waryobha rwaruhe kö-bhëëtö?
2 A a,
ti-igho hë!
Ko bhoora bhëëtö bhoono igho n-kya abhaku ko-mangʼana agha okokora ëbhëbhë,
ku bhuyö tetootore ghwiki ököghëndërrya okokora ëbhëbhë.
3 Momanye igha,
hano twaabhatiisiibhwi,
ntwaaghootaini hamwë na Kiristo Yëësu okohetera ukukwa ukwaye.
4 Ensonga iyaamo ni-igha,
hano twaabhatiisiibhwi,
ntwaabhaayë kya bhano tukuurë na okobheekwa hamwë nawe.
Yëësu Kiristo yaamarrë akaryoka ko obhotoro obhonene ubhwa Taata Waryobha,
ku bhuyö na bhëëtö bhonswe,
ni-igha tobhe na eteemo iya öbhömënyi obhohya.
5 Mbe,
ko bhoora igha twaghootana na Yëësu Kiristo ko okohetera ukukwa ukwaye,
ni-ighoigho erebha igha,
ntoreghootana nawe ku ukuryökibhwa kya bhono yaaryökiibhwi.
6 Ntomanyirë igha eteemo iyëëtö iya kare eera,
yaahanëkirwë ko-mosarabha hamwë na Yëësu Kiristo.
Yaabhaayë igho,
okore eteemo iyëëtö iya kare eera,
etakaatobhaaha,
na okotokora tobhe abhaghorwa abha ëbhëbhë.
7 Hano ömöntö yaakwa kya igho,
takomara ghwiki abhaahwe na obhotoro ubhwa öbhököri ubhwa ëbhëbhë hë.
8 Ko bhoora twaakwa hamwë na Yëësu Kiristo,
ku bhuyö ntoona ubhweseghe igha ntoremenya hamwë nawe.
9 Ntomanyirë bhuuya igha,
Yëësu Kiristo yaaryökirë,
tarikwa ghwiki hë.
Uruku,
teroona obhotoro bhwobhwonswe igho ku-Yëësu Kiristo.
10 Yaakuurë kamwë igho,
a akabhaaha ëbhëbhë bhyonswe igho.
Bhoono igho m-möhöru,
nkötëghërya arë Waryobha.
11 Bhëënyu bhonswe mwibhare igha,
mwaakwa hamwë na Kiristo Yëësu,
m-bahöru mörë ku-Waryobha,
ku bhuyö ëbhëbhë tebheetore okobhabhaaha hë.
Bhoono mwibhare igha,
m-bahöru mörë,
na öbhömënyi ubhwënyu,
bhobhe bhono bhökötëghërya Waryobha ko-nshera iya okoghootana na Kiristo Yëësu.
12 Mbe,
motakaahaana ëbhëbhë umweya ughwa okobhaaha ëmëbhërë ighyënyu gheno ghikukwa.
Hano moraahaane ëbhëbhë obhobhaahi bhuyö,
moraarutwe okokora amangʼana amaghogho ghano ëmëbhërë ghikutuna mokore.
13 Motakaikërrya imyaho ighya ëmëbhërë ighyënyu ghekorenga amangʼana amaghogho agha ëbhëbhë.
Kasi mwibhati ku-Waryobha,
ko bhoora mobhaayë kya bhano muryökiibhwi na Waryobha,
kora abhasöhëri mö-bhöhöru obhohya.
Mobhati imyaho ighya ëmëbhërë ighyënyu ku-Waryobha,
okore imyaho ighyënyu ghiyö,
ghekorenga amangʼana agha heene.
14 Hano moraakore igho,
ëbhëbhë tebhebhabhaahe ghwiki hë.
Ko bhoora bhoono bhëënyu,
ta-maraghërryö ghakobhotangata hë,
kasi keno kekobhatangata,
nö-rööbhö urwa Waryobha.
Abhantö abha Yëësu m-baghorwa abha amangʼana agha heene
15 Bhoono toghambe iyakë?
Toghambe igha töghëndërri okokora ëbhëbhë ko bhoora Waryobha atohaayë örööbhö urwaye,
kora tetokotangatwa na ubhwera ubhwa amaraghërryö?
A a,
ti-igho hë.
16 Kasi temomanyirë igha ömöntö nkobha arë omoghorwa uwa keera akwighwera?
Aratora okobha omoghorwa uwa okokora ëbhëbhë,
b bhekamokorerra uruku.
Handë aratora okobha ömöntö ono akwighwera Waryobha,
ku bhuyö abha omoghorwa uwa Waryobha,
uwa öbhömënyi ubhwa heene.
17 Bhëënyu ni-igho mwaarë kare,
ko bhoora m-baghorwa abha ëbhëbhë mwaarë.
Bhoono öni nkukumya ndë Waryobha,
ko bhoora mwikërëëyi amëëghyö agha Kiristo ghano mwëghibhwa,
kora nkoghasoorana mörë bhwaheene.
18 Waryobha akumibhwi,
ko bhoora abhahaayë öbhötöönööni ubhwa ukwanga okobha abhaghorwa abha ëbhëbhë.
Abhakörrë mobhe abhaghorwa abhaaye,
okore mokorenga amangʼana agha heene.
19 Ëkërëngyö ikya omoghorwa kiyö mbarëngëëyi,
nembarëngëëyi okore momanyërri keno nkoghamba.
Hano waanyöörrë motaraamanya Yëësu Kiristo,
mwaakörrë imyaho ighya ëmëbhërë ighyënyu ghekanyankuha,
mokabha abhaghorwa abha ëbhëbhë,
na ëbhëbhë ibhyënyu bhekaaruha bhököngʼu.
Kasi bhoono momanye igha,
ni-igha mobhati imyaho ighya ëmëbhërë ighyënyu ku-Waryobha,
ghemokorre emeremo ighya heene,
okore abhasaabhuure.
20 Enkaagha eno mwaarenga abhaghorwa abha ëbhëbhë,
m-batöönööni abha ukwanga okokora amangʼana agha heene mwaarë.
21 Bhoono mwaanyöörrë ehoorohooro yoyonswe eera,
hano mwaakoranga amangʼana ghano reero eno mokosooka okoghakora?
Obhoheene ni-igha,
amangʼana ghayö teghaana ubhwera bhwobhwonse bhoora hë.
Keno keemo,
nu-ruku urwa amakora ghonswe igho!
22 Bhoono,
mmoona ehoorohooro ko bhoora Waryobha abhahaayë öbhötöönööni,
okore motakaabha abhaghorwa abha ëbhëbhë.
Ku bhuyö bhëënyu mobhaayë abhaghorwa abha Waryobha.
Mmoona ubhwera ubhwa okosaabhuurwa mobhe abhaköri abha emeremo abhaaye.
Ehoorohooro iyaamo,
nö-bhöhöru ubhwa amakora ghonswe igho.
23 Ömöntö wowonswe ono akobha omoghorwa uwa ëbhëbhë,
ehoorohooro iyaaye,
nu-ruku urwa amakora ghonswe igho.
Kasi bhëëtö,
Waryobha nkotohaana arë öbhöhöru ubhwa amakora ghonswe igho.
Öbhöhöru ubhwa amakora ghonswe igho bhuyö,
tebhokohakerwa hë,
kasi nkohaanwa törë ituho iyö,
ko okoghera iya okoghootana ukwëtö na Omonene uwëëtö Kiristo Yëësu.