Ritashandighi irya Pauro
ko-Bharuumi
Amakëërërryö
1
Ritashandighi reno,
nku-öni Pauro omoghorwa uwa Yëësu Kiristo riruurë.
Naabherekerwa igha mbe omotomwa,
nkaahorwa igha,
ndaarekenga Amangʼana Amaiya agha Waryobha.a
2 Amangʼana Amaiya ghayö,
ngo Waryobha yaaraghaini ukurwa kare,
okohetera ko-bharööti abhaaye bhano bhaandëkirë Amaandeko Amahörëëru.
3 Amangʼana Amaiya ghayö,
na-agha Omoona uwaaye.
Omoona uwaaye uyö kinyabhantö,
nu-muhiiri uwa omokama Daudib yaarë.
4 Nokaanyoora igha ni-igho yaarë,
kasi ko okohetera Umwika Ömöhörëëru,
Waryobha yaamwahööyë igha abhe Omoona uwaaye uwa obhotoro bhwonswec igho,
hano yaamuryökëri ukurwa mo-bhaku.
Yëësu Kiristo uyö,
we Omonene uwëëtö.
5 Waryobha yaangʼaayë örööbhö mbe omotomwa,
okohetera ku-uyö.
Yaakörrë igho,
okore ntëëbhi Abhakyaro bhonswe igho,
bhakumi Yëësu,
kora bhatööni iriina iryaye.
6 Bhëënyu bhonswe,
mörëngë mo-bhantö bhano bhaabherekerwa igha,
bhasoorane Yëësu Kiristo.
7 Abhakumya bharikyane bhonswe igho bhano mörëngë Ruumi hayö,
m-bëënyu nkwandekera.
Waryobha nabhahanshirë bhököngʼu,
nkyo kyaaghërrë akabhashaaghora igha mobhe abhantö abhaaye abhahörëëru.
Örööbhö na omorembe ukurwa ku-Waryobha Taata uwëëtö,
na ko-Monene uwëëtö Yëësu Kiristo,
bhebhe hamwë na bhëënyu.
Pauro aratuna ukughya Ruumi
8 Engʼana enene ni-igha,
nkukumya ndë Waryobha okohetera ku-Yëësu Kiristo,
ko okoghera iya bhëënyu bhonswe igho,
ko bhoora umukumo ughwënyu,
ngomanyekaini ko-kebhara kyonswe igho.
9 Waryobha ono nkutighinkanera kwa nkoro ëmwë igho,
hano naraarekera abhantö Amangʼana Amaiya agha Omoona uwaaye,
namanyirë kya bhono nkobhasabhera nkaagha syonswe igho.
10 Nkosabha ndë nkaagha syonswe igho,
igha hano Waryobha akahansha bhoono igho,
angʼaane umweya niishe mbamaahe.
11 Nkoghamba ndë igho,
ko bhoora amaigha ghandëëyë agha okomaahana na bhëënyu,
okore mbahaane ituho iya ökötërëmya senkoro isyënyu.
12 Keno nkutuna ni-igha,
umukumo ughwënyu ghöntërëmi,
na umukumo ughwane ghonswe ghobhatërëmi.
13 Abhakumya bharikyëtö,
nkutuna ndë momanye igha,
naatunanga bhököngʼu igha niishe mbamaahe,
kasi nanyabhoono,
nkorebherrwa nkërë.
Nkutuna ndë niishe kö-bhëënyu iyö,
okore ndute abhantö bhakumi Omonene Yëësu,
kya bhoora naakörrë mo-Bhakyaro abhandë.
14 Naatëëbhibhwa na Waryobha igha,
ndaarekenga Amangʼana Amaiya ko-bhantö bhonswe igho.
Ndaarekere Abhayunaani na bhano bhatarëngë Abhayunaani,
d abhasömi na bhano bhataasoma.
15 Kiyö nkyo kekoghera ndatuna bhököngʼu igha,
niishe ndaareke Amangʼana Amaiya kö-bhëënyu bhano mörëngë Ruumi hayö.
Obhotoro ubhwa Amangʼana Amaiya agha Waryobha
16 Amangʼana Amaiya ghayö,
ngo obhotoro ubhwa Waryobha bhono bhököhönia abhantö bhonswe igho,
bhano bhakukumya Yëësu.
Nkusimirya bhörë ko-Bhayahudi,
bhughya igho bhohekeera abhantö bhano bhatarë Abhayahudi.
Ku bhuyö öni tenkosooka okoraareka Amangʼana Amaiya ghayö hë.
17 Amangʼana Amaiya ghayö,
nkwörökya gharë bhuuya kya bhono Waryobha akobhara abhantö igha m-ba heene.
Nkobhara arë abhantö igha m-ba heene,
ko okohetera umukumo ughwabho ughwene igho.
N-kya bhono Amaandeko Amahörëëru ghakoghamba igha,
“Ömöntö uwa heene,
naremenyanga mu-mukumo ughwaye ghono aanagho.”e
Ubhushibhu ubhwa Waryobha ko-bhantö
18 Waryobha umwene,
nkwörökya arë harabhu igho ukurwa mu-ryobha igha,
abhantö abhaghogho bhano bhakumwanga,
nkobhashibhya arë.
Abhantö bhayö nkwanga bharë obhoheene ubhwaye,
ko okoghera iya okokora amangʼana aghaabho amaghogho.
19 Ti-igha tebhamanyirë amangʼana agha Waryobha hë,
ko bhoora Waryobha yaatoora harabhu igho amangʼana ghonswe igho,
agha okoghera amanywe na abhantö.
20 Abhantö bharatora okomanya Waryobha kya bhono arë,
ukurwa haara yaabhömbirë ëbhëntö bhyonswe igho.
Nokaanyoora igha tebhakomomaaha hë,
kasi ëbhëntö bheno yaabhömbirë,
nkwörökya bhërë igha,
Waryobha naana obhotoro bhwonswe igho,
ghwiki igha,
we Waryobha umwene igho,
uwöndë taayo hë.
Ku bhuyö taaho ömöntö ono akotora ukwitaamërrya igha,
tamanyirë Waryobha hë.
21 Nokaanyoora abhantö mbamanyirë Waryobha kya bhono arë,
kasi tebhakömötöönia hë,
handë ukumukumya kya bhono aingʼarëëyë.
Bhaana amaitegherro amaghogho,
na sehakëri isyabho mu-kisuntë sërë.
22 M-bakangi,
kasi bharaihasha igha m-bangʼaini.
23 Bhaatigha okosengerra Waryobha Ömöhörëëru uwa amakora ghonswe igho,
kasi bharasengerra ëbhëtöndö ibhya amasambwa ghano ghatuubhaini kya abhantö bhano bhakukwa kya abhandë.
Amasambwa aghandë ngatuubhaini kya sityënyi,
aghandë kya ibhinyönyi,
na aghandë kya sityënyi seno sikwingʼuura.
24 Ku bhuyö Waryobha yaabhatigha bhasooranenga oronamba urwabho,
kora bhakorranenga amangʼana agha sënsöni kö-mëbhërë ighyabho.
25 Bhaatigha ukukumya obhoheene ubhwa Waryobha,
kasi bharaghoota amangʼana agha obhorongo.
Bharasengerra ëbhëntö bheno bhyaabhombwa na ukubhitighinkanera,
bhatigha okosengerra Waryobha Ömöbhömbi,
ono aingʼarëëyë ukukumibhwa amakora ghonswe igho!
Amina.
26 Mbe,
Waryobha akabhatigha bhakorenga amangʼana aghaabho agha sënsöni ghayö bhaatunanga.
Abhakari bhakatigha okokora amangʼana kya bhono ëmëbhërë ighyabho ghyaabhömbirwë ukurwa okosemoka igha ghekore,
f kasi bhakakora bhöndë igho.
27 Abhashaasha bhonswe,
bhakatigha okokora amangʼana kya bhono ëmëbhërë ighyabho ghyaabhömbirwë ukurwa okosemoka igha ghekore,
amangʼana agha omokari na umushaasha.
Kasi abheene nkokora bharë amangʼana agha sënsöni,
agha oronamba urwa okotetana abhashaasha abheene ko abheene.
Ko okoghera iya engʼana iyö,
bhaashaaghora abheene ubhushibhu bhono bhorengʼaini na amangʼana aghaabho amaghogho ghayö.
28 Mbe,
ko bhoora bhaanga okoghoota amangʼana agha Waryobha,
Waryobha wonswe yaabhatigha bhakore bhono bhakutuna.
Ku bhuyö nkokora bharë amangʼana amaghogho ghano bhaanagho mo-maitegherro aghaabho.
Amangʼana ghayö,
kora teghaana ubhwera hë.
29 M-baköri abha ëbhëbhë ibhya seteemo syonswe igho,
obhoghogho bhwobhwonswe igho,
kora m-bahiti abha ëbhëntö bhyonswe igho,
mbaana orongʼeera.
Bhahanshirë riihë,
m-baiti abha abhantö,
m-basëëghërrya,
m-barongo,
m-ba amaitegherro maghogho,
m-baghambi abha abhantö.
30 Ghwiki ni-igha,
nkohanga bharë abhantö amangʼana,
mbarëghirë Waryobha,
m-batöki abha abhantö,
mbaana ekeghaaka na ikiheemere.
Keno bhakutuna nkaagha syonswe igho,
nu-kutuna enshera eehya iya okokora amangʼana amaghogho,
ghano ghatakaakörrwë na ömöntö uwöndë.
Abhantö bhayö,
tebhakosooka abhaibhöri abhaabho hë.
31 M-bakangi,
nkwanga bharë amaraghano aghaabho,
tebhaana righonshe,
kora amaabhë ghoghonswe hë.
32 Abhantö bhayö,
mbamanyirë bhuuya igha,
ömöntö ono akokora amangʼana amaghogho kya ghayö,
naingʼarëëyë ukusikibhwa na Waryobha.
Nokaanyoora ni-igho ërë,
kasi abheene tebhatöniibhwi hë!
Nköghëndërrya bharë okokora amangʼana amaghogho ghayö,
kora nkwikererrania bharë na abhaköri abha amangʼana amaghogho kya ghayö.