Pauro araghya Ëfësö
19
Mbe,
enkaagha eno Apöörö yaarenga Körintö,
Pauro akahetera mu-mighi ighya mu-singuku,
akangʼaaraara igho,
akahika Ëfësö.
Hano yaarë Ëfësö hayö,
akasikana-ho na abheegha abhandë abha Yëësu.
2 Akabhabhöörya igha,
“Hano mwaakumiri Yëësu,
mwaanyöörrë Umwika Ömöhörëëru?”
Bhakamohonshora igha,
“A a,
kora tetwakaighuurë igha aaho hë.”
3 Ho,
ghwiki yaabhabhöörri igha,
“Bhoono m-bobhatiisyö kë mwaabhatiisiibhwi?”
Bhakamohonshora igha,
“M-boora Yohana yaabhatiisyanga.”
4 Mbe,
Pauro akabhatëëbhya igha,
“Yohana yaabhatiisyanga abhantö bhano bhaarenga bhahöngööyë ëbhëbhë ibhyaho.
Akabhatëëbhya igha,
bhakumi ono ariisha.
Ömöntö uyö,
n-Yëësu.”
5 Hano bhaaighuurë amangʼana ghayö,
bhakabhatiisibhwa ku iriina irya Omonene Yëësu.
6 Pauro akabhatoorra amabhoko.
Ni-igho yaabhatöörëëyë amabhoko igho,
Umwika Ömöhörëëru akabhaitoomera.
Bhakashumaasha ebheghambo ebhehya,
bharaghamba amangʼana agha öbhörööti.
7 Abhantö bhayö bhonswe igho,
mbaarë mona ikömi na bhabhërë.
8 Mbe,
ku-ribhagha irya imyëri etatö,
Pauro akabha arasoha mu-nyumba iya esango iya Abhayahudi,
arashumaasha na abhantö ko obhokarë,
akaiköngʼërrya igha abharute ko amangʼana agha Obhokama ubhwa Waryobha.
9 Kasi abhandë bhakabha na emetwe ëmëköngʼu,
bhakaanga ukukumya,
kora bhakanyeera senkaani amangʼana agha Omonene Yëësu harabhu igho.
Bhakaghasera mo-bhantö,
ku bhuyö Pauro,
akahaaterana nabho.
Akaahora abheegha abha Yëësu,
akabhahira mu-shuurë iya umwëghya Tirano.
Akabha arashumaasha nabho iyö amangʼana agha Yëësu.
10 Pauro yaaghëndërrëëyi na emeremo ghiyö,
imyoka ibhërë.
Ekahekera-ho enkaagha eno abhamënyi abha ikyaro ikya Asia Enke,
Abhayahudi,
na abhantö bhano bhatarë Abhayahudi bhonswe igho,
bhakaighwa engʼana iya Omonene Yëësu.
Bhamura abha Sikewa bharatemwa na risambwa
11 Waryobha yaahaayë Pauro obhotoro ubhwa okokora amakono amanene,
agha ököröghöörya.
12 Kora ebhetambaara na singibho isya Pauro hano bhyaahirwanga ko bharööyë,
mbaahwenanga.
Na bhano bhaarë na amasambwa,
ngaabhahaateranga.
13 Bhaare-ho Abhayahudi abhandë abhërëëri,
bhano bhaashaashyanga ukwata amasambwa okohetera ku iriina irya Omonene Yëësu.
Bhaaghatëëbhyanga igha,
“Ndabhahamera,
more masambwa,
okohetera ku ubhwera ubhwa Yëësu oora Pauro akoraarekanga,
murwe kö-möntö ono!”
14 Mo-bhano bhaakoranga igho,
bhaare-mo abhaana muhungatë abha Sikewa,
omonene uwa abhasëngëri abha Ikiyahudi.
15 Kasi risambwa rekabhahonshora igha,
“Yëësu nemomanyirë,
Pauro wonswe nemomanyirë,
bhoono bhëënyu m-baabho wë?”
16 Ömöntö uyö yaarë na risambwa,
akabhaibhorrokera,
akabharöönia,
akabhahengera singuru bhonswe igho.
Bhakangʼosa ukughya kebhara bharëngë kengʼaabhi na eno bhanyahaarrwë.
17 Mbe,
amangʼana ghayö ghakaromaana mo-Bhayahudi na mo-bhantö bhano bhatarë Abhayahudi bhonswe igho abha Ëfësö hayö.
Abhantö bhonswe igho bhakahaha,
bhakakumya bhököngʼu iriina irya Omonene Yëësu.
18 Abhantö abhaaru bhano bhaakumiri Yëësu,
bharaghamba harabhu igho mo-bhantö amangʼana aghaabho amaghogho ghano bhaakoranga.
19 Abhantö abhaaru bhano bhaaraghoranga,
bhakareeta ebhetabho ibhyabho ibhya obhoraghöri,
bhakabhesamba harabhu igho.
Bhakakora risaabhu irya öbhöghöri ubhwa ebhetabho bhiyö,
bhakamaaha igha bhyahikyanga ëbhëkwë na ëbhëkwë ibhya seehera.a
20 Ko nshera iya obhotoro bhuyö,
engʼana iya Omonene Waryobha,
ekaromaana bhököngʼu mo-bhantö.
Riihë mu-mughi ughwa Abhaëfësö
21 Hano amangʼana ghayö ghonswe igho ghaahööyë,
Pauro akaighambera mo-motwe ughwaye igha,
naraaghi Makedonia na Akaaya ataraaghya Yërusarëëmu.
Na hano arihika Yërusarëëmu,
ni-igha aashe okotasha kora Ruumi honswe.
22 Ku bhuyö akatoma abhatöörrya abhaaye bhabhërë,
Timoteo na Erasito,
igha bhatangate ukughya Makedonia,
we akatighara Asia Enke hayö sinsikö nke igho.
23 Ku-sinsikö siyö,
riihë rinene bhököngʼu rekeebhoka Ëfësö hayö,
ko okoghera iya amangʼana agha Omonene Yëësu.
24 Mu-mughi ghuyö,
yaare-mo ömöntö ono yaabherekerwanga igha Demetirio,
ömöntö uyö,
yaaturanga ëbhëtöndö ibhya seehera bheno bhyaatuubhananga na risengerro irya risambwa iryabho rikari,
reno ryaabherekerwanga igha Aritëmi.
b Ubhuturi bhuyö,
bhwaahaananga abhaturi bharikyaye ehoorohooro insharu.
25 Mbe,
Demetirio akakomania abhaturi bharikyaye bhayö,
na abhantö abhandë bhano bhaakoranga emeremo ghiyö.
Akabhatëëbhya igha,
“Bhamurë,
bhëënyu mmomanyirë bhuuya igha,
mo-meremo gheno,
mo tukwamehera.
26 Kasi bhoono nkwighwa mörë,
na ukwimaahera bhono Pauro akuruta abhantö abhaaru abha Ëfësö hano,
na mo-sembaara syonswe igho isya ikyaro ikya Asia Enke.
Ko bhono akobhatëëbhya igha ëbhëtöndö,
na-bhantö bhakobhekora,
ku bhuyö te-waryobha uwa heeneheene hë.
27 Obhoghogho ubhwa engʼana iyö ni-igha,
emeremo ighyëtö gheno,
ngeserwa.
Kora risengerro irya risambwa iryëtö rikari,
Aritëmi rinene,
ryonswe nderaaserwe.
Kora Aritëmi umwene wonswe taabhe na ubhuhika ubhwaye hë,
na we akosengerrwa ku-kyaro keno ikya Asia Enke,
kora na ko-kebhara kyonswe igho.”
28 Mbe,
hano bhaaighuurë amangʼana ghayö,
bhakarerra bhököngʼu,
bhakakora ikituri bharaghamba igha,
“Aritëmi uwa Abhaëfësö we omonene!”
29 Umughi ughwa Ëfësö ghonswe igho,
ghokaromaana riihë.
Abhantö bhakaghoota Ghaayo bhaana Arisitariko,
Abhamakedonia bhano bhaarë hamwë na Pauro ko-roghendo,
bhakasoha nabho mu-righari reno abhantö bhaakorranga-mo ëmëhöörwë.
30 Pauro akatuna igha wonswe asohe emerre mbere iya abhantö bhayö,
kasi abheegha abha Yëësu bhakamorebherra.
31 Kora abhanene abha Asia Enke hayö bhano bhaarë abhasaani abha Pauro,
bhonswe bhakamorekerra amangʼana,
bharamosaasaama igha,
atakaasoha mu-righari irya abhantö bhayö.
32 Mbe,
enkaagha iyö abhantö bhayö bhataniatanianga timburisisi timburisisi,
okohekera hano Ikiikaro kiyö kyaanyaraghaini.
Abhaaru,
tebhaamanyirë engʼana eno yaaghërrë bhakaikomania hayö hë.
33 Abhayahudi bhakahira Arekisanda mbere iya abhantö bhayö,
bhakamötëëbhya amangʼana ghano araaghambe.
Arekisanda akabhainyökërya okobhoko igha bhakire,
okore aikoorerre ku-rikomo riyö.
34 Kasi hano bhaamanyirë igha Arekisanda m-Muyahudi yaarë,
bhakakongera hamwë bhököngʼu bharaghamba igha,
“Aritëmi uwa Abhaëfësö we omonene!”
Bhakamara ribhagha kya seesa ibhërë bharaghamba igho.
35 Mbe,
omokaraani omonene uwa umughi ghuyö,
akakirya abhantö.
Akabhatëëbhya igha,
“Bhëënyu bhare abhantö abha Ëfësö,
mu-bhyaro bhyonswe igho nawë ono atamanyirë igha,
umughi ghono ngwo ghonaghëri risengerro irya risambwa rikari rinene reera igha,
Aritëmi?
Ëfësö keno,
te-kyo kekonaghya kora ekesosa ikyaryo keno kyaaghööyë hansë ukurwa mu-ryobha?
36 Ko bhoora igha taaho ömöntö ono akwanga amangʼana ghano,
motereme,
motakaaheeta okokora engʼana yoyonswe igho iya obhokangi.
37 Abhantö bhano mörëëtirë hano,
tebhaibhirë ëkëntö mu-risengerro,
kora tebhatökirë risambwa iryëtö rikari Aritëmi hë.
38 Nyoore Demetirio na abhaturi bharikyaye bhaana engʼana ko-bhantö bhayö,
bhaghende bhabhashongere!
Ko bhoora ahasë aha ukwahokanërya amaraghërryö,
na abhaahokania abha amaraghërryö hobharë.
39 Kasi nyoore eeho engʼana iyëndë,
mughihirë mu-bhiikaro bheno bhikwikërribhwa na amaraghërryö aghëëtö.
40 Amangʼana ghano tökörrë reero,
gharatora koghera tushongerwe igha tökörrë riihë.
Tetoona engʼana eno turitaamërri,
ituruusi mu-kiina kiyö hë.”
41 Omokaraani omonene uyö hano yaamarrë okobhatëëbhya amangʼana ghayö,
akanyaraghania esango iyö.