Abhatöörrya abha abhatomwa bharashaaghorwa
6
Ku-sinsikö siyö,
abhasoorani abha Yëësu bhaaghëndërrëëyi ukwaruha bhököngʼu.
Mo-bhayö bhaarenga-mo Abhayahudi bhano bhaashumaashanga ekeghambo ikya Ikiyunaani,
na Abhayahudia bharikyabho bhano bhaashumaashanga Ikiaraamu.
Mbe,
Abhayahudi abha Ikiyunaani bhakaibhëmbëërya igha,
Abhayahudi abha Ikiaraamu tebhatweneranga Abhayahudi abhasinö abha Ikiyunaani ibhyakorya ibhya kera urusikö.
2 Ku bhuyö abhatomwa ikömi na abhabhërë,
bhakakomania abhasoorani bhonswe igho,
bhakabhatëëbhya igha,
“Ti-bhuuya igha bhëëtö tutighe ukwëghya abhantö engʼana iya Waryobha,
twikarre ukutwenania abhantö ibhyakorya.
3 Bhoono abhakumya bharikyëtö,
engʼana eno eeho ni-igha,
mushaaghore abhashaasha muhungatë mö-bhëënyu muyö,
bhano bhaana eteemo inshiiya,
bhano bhaishööyë Umwika Ömöhörëëru,
na obhongʼaini.
Abhantö kya bhayö,
mbo toraaghööti omoremo ghuyö,
bhaghwimererre,
4 okore bhëëtö tosaasaamenga Waryobha,
na ukwëghya abhantö engʼana iyaaye.”
5 Obhoghambi bhuyö,
bhokatëghërya abhasoorani bhonswe igho bhano bhaarë hayö.
Ku bhuyö bhakashaaghora Sitefaano,
ömöntö ono yaaishööyë Umwika Ömöhörëëru,
kora m-möntö wa umukumo omonene yaarë.
Ghwiki bhakashaaghora Firipö,
Porokoro,
Nikanööri,
Timoni,
Parimena,
na Nikorao uwa mu-mughi ughwa Antiökia,
b ono yaasöhirë kare mu-diini iya Ikiyahudi.
6 Abhashaasha muhungatë bhayö,
bhakahirwa ko-bhatomwa.
Abhatomwa bhakabhasabhera,
bhabhatöörëëyë amabhoko.
7 Engʼana iya Waryobha,
ekaghëndërrya okoromaana mo-bhantö.
Ekerengere ikya abheegha abha Yëësu,
kekaaruha bhököngʼu Yërusarëëmu hayö.
Kora abhasëngëri abhaaru bhakaighwera Waryobha,
na ukwikërrya Omonene Yëësu.
Okoghootwa ukwa Sitefaano
8 Sitefaano nö-möntö ono yaahaaywë örööbhö oronene bhököngʼu na obhotoro ubhwaru na Waryobha.
Kiyö nkyo kyaagheranga arakora amakono na ebhemanyërryö mo-bhantö.
9 Kasi Abhayahudi abhandë bhakashaashya okohanerrania amangʼana na Sitefaano.
Abhayahudi bhayö,
bhaarwërëëyë mu-nyumba iya esango iya Abhayahudi,
c eno yaabherekerwanga igha,
Inyumba iya Abhantö Abhatöönööni.
Abhandë bhaarwërëëyë mu-mughi ghono ghwaabherekerwanga igha Kirene,
na ughwa Arekisandiria.
Abhandë okanyoora bhaaruurë mu-kyaro ikya Kirikia,
na ikya Asia Enke.
10 Kasi Sitefaano akabhakera ko okoghamba amangʼana agha obhongʼaini,
ko obhotoro ubhwa Umwika Ömöhörëëru.
11 Mbe,
bhakangʼënërrya abhantö nyabhorebhe,
okore bharongohe igha,
“Twaaighuurë Sitefaano aratoka Mosa na Waryobha.”
12 Bhakasëëghërrya bhököngʼu abhantö,
hamwë na abhaghaaka abha Ikiyahudi,
na abhëëghya abha amaraghërryö agha Mosa.
d Bhakaghya ku-Sitefaano,
bhakamoghoota,
bhakamuhira mo-bharasa iya abhanene abha Abhayahudi.
13 Bhakareeta-ho abhaimërërri abha obhorongo,
bhakahaamërrya Sitefaano bharaghamba igha,
“Ömöntö ono,
tiyaakatighirë okoghamba obhoghogho amaraghërryö agha Mosa,
na inyumba ëhörëëru eno iya Waryobha!
14 Kora tokamwighwa araghamba igha,
Yëësu uwa Nazarëëti,
naaretemora risengerro irya Waryobha reno,
kora asyöri seteemo seno Mosa yaatoraghërrëëyi.”
15 Abhantö bhonswe igho mo-bharasa muyö,
bhakatongʼaarra Sitefaano,
bhakamaaha ubhusyö ubhwaye,
bhutuubhaini kya ubhwa maraika.