Yuhana lɛtɛrɛŋi tanrewuŋi
Jwumpe tasiige
1
Mii u ɲyɛ dánafeebii kacwɔnrɔŋi ke,
mii u ɲyɛ na ŋge lɛtɛrɛŋi sémɛni si ntun mii ntàannamacinmpworoŋi Gayusi á.
Sèeŋi na,
mu kyalʼà táan mii á.
2 Mii ntàannamacinmpworoŋi,
mii na li ɲáare Kile á,
u u ma wuuni ɲwɔ,
u u ma yaha ticuumpe e,
bà mu ɲyɛ na sì yyaha na Kile kuni i mɛ.
3 Mii funŋkʼà táan sèlʼe,
ɲaha na yɛ pyiŋkanni na mu à maye pwɔ sèeŋi na,
ná pyiŋkanni na mu ɲyɛ na ɲaare u ɲuŋʼi ke,
cìnmpyiibii pìlʼà pa yire jwo mii á.
4 Mà lógo na mii pyìibii wá na ɲaare sèeŋi ɲuŋʼi,
funntanga nimbwɔhɔ ɲyɛ a tòro kuru na mii á mɛ.
Gayusi kani
5 Mii ntàannamacinmpworoŋi,
kyaa maha kyaa mu ɲyɛ na mpyi cìnmpyiibilʼá fo mà sà nɔ nàmpwuunbii na ke,
mu à li cyêe na mu na ɲyɛ ɲwɔmɛɛ niŋkinfoo cyire karigii cye kurugo.
6 Pyiŋkanni na mu à li cyêe pi na na pi kyalʼà táan mu á ke,
pi à pa lire jwo naha dánafeebii kuruŋkʼá.
Mu aha yákili yaha pi na,
maa pi tɛ̀gɛ pi kùsheeni i mà tàanna ná Kile ɲyii wuuni i,
lire sí n‑yaa.
7 Li cè na Kirisita mɛge kurugo pi à nde kùluni tɔɔge lwɔ́,
mpii pi ɲyɛ pi ɲyɛ Kile kuni i ná wuu e mɛ,
pi ɲyɛ a pire cyeyaage kà tufiige ɲáare mɛ.
8 Ɲyɛ wuu à yaa wuu a tire sùpyire shiŋi tɛ̀re.
Wuu aha a lire pyi,
lire li sí li cyêe na wuu à cyeyi kan wuyʼá maa báare,
bà sèeŋi jwumpe si mpyi si nɔ taɲyahayʼe mɛ.
Jwotɛrɛfu ná Demɛtirusi kani
9 Mii à ɲwɔɲyɛya sémʼa tùugo dánafeebii kuruŋkʼá wani,
ŋka Jwotɛrɛfu à wuu jwumpe cyé,
u la ɲyɛ si uye pyi dánafeebii puni ɲùŋufooŋi.
10 Lire e mii aha nɔ wani,
kapyimbaagilʼe u à cye le,
maa wuu ɲùɲyi tare ke,
mii sí cyire puni tɛ̀gɛ yii niŋgyigigii na.
Lire kanni bà mɛ,
u ɲyɛ na ɲɛɛge cìnmpyiibii sunmbage na mɛ,
mpiimu la si ku ɲyɛ sʼa pi sunmbage lèŋi ke,
u maha núru na pire sigili lire na,
maa pi kɔ̀re na yige dánafeebii kuruŋke e.
11 Mii ntàannamacinmpworoŋi,
ma hà raa dìrili kapiini kurugo mɛ,
ta dìrili kacɛnni kurugo.
Shinŋi u ɲyɛ na kacɛnni pyi ke,
urufoo na ɲyɛ Kile wu.
Ŋka shinŋi u ɲyɛ na kapiini pyi ke,
urufoo ɲyɛ a yafyin cè Kile e mɛ.
12 Demɛtirusi wi ke,
dánafeebii puni na uru mɛtanga yu,
sèeŋi ɲuŋʼi u ɲyɛ na ɲaare ke,
uru mú à li cyêe na u mɛgʼà táan.
Wuu na u mɛtanga yu mú,
mu sʼà li cè na ɲje wuu à jwo u kyaa na ke,
yire na ɲyɛ sèe.
Jwumpe nizanmpe
13 Karii niɲyahagii saha na naha mii á si ɲjwo mu á,
ŋka mii la nàha si cyi sémɛ mɛ.
14 Mii na sɔ̂nŋi li saha sì mɔ mɛ,
wuu sí wuye ɲya,
si jwo ná wuye e.
15 Kile u yyeɲiŋke kan ma á.
Mu ceveebilʼà mu shɛ́ɛre.
Wuu ceveebii puni niŋkin niŋkinŋi shɛ́ɛre wani.