Yuhana lɛtɛrɛŋi shɔnwuŋi
Jwumpe tasiige
1
Mii u ɲyɛ dánafeebii kacwɔnrɔŋi ke,
mii u ɲyɛ na ŋge lɛtɛrɛŋi sémɛni si ntun cìnmpworocwoŋia ná u pyìibilʼá,
Kile à uru ŋgemu cwɔɔnrɔ ke.
Yii kyalʼà táan mii á sèeŋi na.
Mii kannʼá bà yii kyalʼà táan mɛ,
ŋka mpii puni pi à sèeŋi cè ke,
yii kyalʼà táan pire punʼá.
2 Yii kyalʼà táan wuu á,
ɲaha na yɛ wuu à sèeŋi cè,
u mú sí n‑kwôro ná wuu e,
fo tèekwombaa.
3 Tufooŋi Kile ná u Jyaŋi Yesu Kirisita sí ɲwɔ wuu na,
si ɲùɲaara ta wuu na,
si yyeɲiŋke kan wuu á,
bà wuu si mpyi sʼa ɲaare sèeŋi ɲuŋʼi,
si wuye kyaa táan wuyʼá mɛ.
Wuu à yaa wuu a ɲaare sèeŋi ɲuŋʼi, wuu u wuye kyaa táan wuyʼá
4 Lʼà pyi mii á funntanga nimbwɔhɔ,
mà li ɲya na mu pyìibii pìi na ɲaare sèeŋi ɲuŋʼi,
bà Tufooŋi à li cya wuu á mɛ.
5 Ɲyɛ mii cìnmpworocwoŋi,
ɲje mii ɲyɛ na sémɛni si ntun mu á numɛ ke,
to nivɔnŋɔ bà mɛ.
Uru toŋʼà le wuu á,
canŋke wuu à jyè Kile kuni i ke,
uru u ɲyɛ:
wuu wuye kyaa táan wuyʼá.
6 Wuu aha a Kile toŋi kurigii ɲaare,
lire li ɲyɛ tàange.
Yire yi ɲyɛ na yu yii á,
mà lwɔ́ fo yii canɲjyige Kile kuni i,
yii a lire pyi.
7 Mpii pi ɲyɛ na sùpyire ɲwɔ fáanŋi na leni kumpiini i ke,
pirʼà ɲyaha diɲyɛŋi yyaha kurugo numɛ.
Pi ɲyɛ na ɲɛɛgʼa tɛ̀ɛn li taan na Yesu Kirisita à pa diɲyɛŋi i ná supyicyeere e mɛ.
Shin maha shin u ɲyɛ amuni ke,
urufoo na ɲyɛ kafiniviniwe,
maa mpyi Kirisita zàmpɛn.
8 Yii a yiye kàanmucaa,
bà li si mpyi yii àha ŋkwɔ̀ wuu báaraŋi kapyiini yaha li pyi laaga baa mɛ,
yii yiye waha bà yii si mpyi si u tɔ̀ɔnŋi puni ta mɛ.
9 Kàlaŋi u à yyaha tíi ná Kirisita kani i ke,
shin maha shin u ɲyɛ u ɲyɛ a uye pwɔ uru na mɛ,
maa laaga tɔɔn uru na ke,
urufoo ɲyɛ ná Kile e mɛ.
Ŋka shinŋi u à uye pwɔ uru na ke,
urufoo ɲyɛ ná Tufooŋi ná Jyafooŋi i.
10 Wà ha mpa yii á ná kàlaŋi wabɛrʼe,
ŋgemu u ɲyɛ u ɲyɛ a yyaha tíi ná Kirisita kani i mɛ,
yii àha ɲɛɛ urufoo yaha u sunmbage lèŋɛ yii pyɛnge eb mɛ.
Yii àha urufoo shɛ́ɛre bá mɛ,
11 ɲaha na yɛ ŋgemu ká urufoo shɛ́ɛre ke,
u à wwɔ̀ ná urufolʼe kuru báarapege na.
Jwumpe nizanmpe