Cyelentiibii kafinivinibii kani
2
Bà kafinivinibii pìi mpyi a piye pyi Kile tùnntunmii Izirayɛli shiinbii shwɔhɔlʼe mɛ,
amuni li mú sí n‑pa n‑pyi yii á.
Cyelentiibii kafinivinibii pìi sí n‑pa n‑yîri yii shwɔhɔlʼe,
pi jwumpe sí n‑pyi kafinara,
sʼa kakyaare pyi.
Kafooŋi u à pi ɲùŋɔ wwû ke,
pi sí uru cyé,
ŋka pi yabilimpii nimpyiini sí kakyaare pyi ti pâlʼa nɔ pi na.
2 Shinɲyahara sí n‑taha pi fye e pi silege baa karigilʼe.
Pi kapyiiŋkii sí sèeŋi kuni mɛge pɛn.
3 Nàfuuŋi kani sí tatɛɛngɛ fô pi na,
lire kurugo,
pi sí raa yii cyeyaayi fɔ̀ɔnŋi raa shuu yii na ná pi ɲwɔtanyi i.
Ŋka mà lwɔ́ fo tèemɔni i,
Kile à bégele si pi sâra si ntàanna ná pi kapyiiŋkilʼe.
Li saha sì mɔ mɛ,
Kile sí pi shi bò.
4 Yii li cè na mɛ̀lɛkɛɛbii pi mpyi a kapegigii pyi ke,
Kile ɲyɛ a li táan pire na mɛ.
Ŋka u à pi wà Jahanamaŋi numpini i,
canŋke u sí pi sâra si ntàanna ná pi kapyiiŋkilʼe ke,
na kuru canŋke sigili,
pi sì n‑jà piye shwɔ lire numpini na mɛ.
5 Yii li cè na mpii pi mpyi pi mpyi na fyáge Kile na Nuhu tèni i mɛ,
Kile ɲyɛ a li táan pire na mú mɛ,
u à lùbwooni tɛ̀gʼa pire puni shi bò.
Ŋka Nuhu u mpyi maha yi yu lire tèni sùpyirʼá na pi a katiigii pyi ke,
Kile à uru shwɔ tire kakyaare na,
mà bâra shiin baashuunni na.
6 Yii li cè mú na u à Sɔdɔmu ná Gɔmɔri kànyi shi tò,
maa yi súugʼa pyi cwɔnrɔ yi kapegigii kurugo.
Mpii pi ɲyɛ pi sì n-pa raa fyáge Kile na mɛ,
u à nde pyi mà tɛ̀gʼa pire yɛrɛ.
7 Ŋka Loti u mpyi a tíi,
ná u mpyi pire silege baa shiinbii shwɔhɔlʼe,
ná pi kapyiiŋkii mpyi a u tɛgɛlɛ ta ke,
Kile à uru shwɔ tire kakyaare na.
8 Uru u mpyi a tíi maa mpyi tɛɛnni i ná tire sùpyire e ke,
u mpyi maha ti ɲaa silege baa karigii tapyige e,
maa ti laaga baa jwumpe niɲjwumpe núru canŋa maha canŋa.
Lire mpyi a pyi u á kayana.
9 Ɲyɛ ɲcyii karigii punʼà li cyêe wuu na na mpii pi à piye pwɔ Kafooŋi Kile na ke,
u sí n‑jà pire yige kawagilʼe,
si shinpiibii yaha raa canŋka sigili,
kuru canŋke u sí pi sâra si ntàanna ná pi kapyiiŋkilʼe,
si ŋgaha nɔ pi na.
10 Mpii pi ɲyɛ na dìrili pi yabilimpii ɲyii karigii kurugo,
maa katupwɔhɔyi pyi,
maa Kafooŋi fànhafente ɲjini fare ke,
nde li sí n‑pa pire ta ke,
lire lempʼà pi a tòro.
Pire cyelentiibii kafinivinibii ɲyɛ na fyáge mɛ,
pi maha piye pêre.
Yaayi yi ɲyɛ ná pèente e nìɲyiŋi na ke,
pi maha yire fare.
11 Mà li ta ali mɛ̀lɛkɛɛbii pi ɲyɛ ná Kile e ná pi tayyéregʼà fànha tò pire kafinivinibii woge na fànhe ná sífente e ke,
pire ɲyɛ a sìi na ɲɛɛgʼa pire cyahala mɛ.
12 Ŋka pire cyelentiibii kafinivinibii na ɲyɛ funŋɔ baa sige yaaya fiige,
ɲjemu yi ɲyɛ ɲcùŋi ná mbòŋi laage e ke,
yaayi yʼà fànha tò pi taceŋke na ke,
pi maha yire ɲjini fare.
Pi shi sí n‑pa n‑tò sige yaare fiige.
13 Lire e kapiini pi à pyi ke,
kapii li sí n‑tɛ̀gɛ lire fwooni tò pi á.
Na silege baa karigii pyi sùpyire ɲyii na,
ali canŋke e,
lire lʼà táan pi á.
Kɛgɛmpe karigii ná ɲwɔhɔmpe karigii kanni cyi à pi yyaha ɲî.
Cyire maha sùpyire wuruge,
pi aha a wwùu ná yii e kataangii na,
pi maha yii mɛyi kɛ̀ɛge.
14 Jacwɔɔre kanni tʼà pi yyaha ɲî,
pi ɲyɛ na ŋkànre kapegigii mpyiŋi taan mɛ.
Mpii pi ɲyɛ pi sàha fànha ta Kile kuni i mɛ,
pi maha pire yákilibii kɛ̂ɛnŋi ná pi ɲwɔtanyi i.
Pi yákilibii punʼà taha nàfuuŋi na,
pi à láŋa.
15 Pi à kuni niɲcɛnni yaha maa kumpiini lwɔ́ Beyɔri jyaŋi Balamua fiige.
Wyɛ́rɛŋi lage mpyi maha uru yaha ntiimbaaŋi karigii na.
16 Ŋka Kile à u faha u ntiimbaaŋi kurugo,
maa dùfaanŋa pyi kʼà sùpyii mɛɛ jwo ná u e.
Ka lire si mpyi kaɲuŋɔ mà Kile tùnntunŋi Balamu pyi u à láha u funŋɔbaara karigii na.
17 Ɲyɛ pire cyelentiibii kafinivinibii na ɲyɛ laaga baa,
pi na ɲyɛ mu à jwo lwɔhɔ baa lùbilii,
pi na ɲyɛ mu à jwo kilewwoo kafɛɛgʼà ndemu fwɔ a tòro ke,
kyaage ku ɲyɛ na pi sigili numpini cyage e.
18 Jwumbwompe laaga baa wumpe pi maha yu.
Mpii pi à fworo kumpiini ɲaarafeebii ŋgwòŋi i kàavo ke,
pi maha pire yákilibii kɛ̂ɛnŋi ná pi silege baa karigilʼe,
cyire cyi à táan pi á.
19 Pi maha jwo na pire sí pi yige bilere e,
mà li ta pi yabilimpii na ɲyɛ kapegigii bilere e,
tire ntemu ti sí kakyaare nɔ pi na ke.
Yii li cè na yaaga maha yaaga kʼà fànha ta mu na ke,
mu maha mpyi kuru biliwe.
20 Sèeŋi na,
wuu Kafooŋi u ɲyɛ wuu Shwofooŋi Yesu Kirisita ke,
mpii pi à fworo diɲyɛŋi katupwɔhɔyi i uru kani ɲcèŋi cye kurugo ke,
cyire karigii ká núrʼa pi cû maa fànha ta pi na,
nde li sí n‑pa pirefee ta ke,
lirʼà pi mà tòro niɲcyiini na.
21 Li mú bá mpyi a pwɔ́rɔ pi á,
pi àha kuni nintiini cè mɛ,
mà tòro pi li cè pi i núrʼa kàntugo wà Kile toŋi na,
u à uru ŋgemu kan pi á ke.
22 Tàanlini sùpyire maha yu na:
«Pwunŋʼà núru u tùgurʼá» ke,
ná nde pi maha yu na:
«Caaŋʼà wùli,
maa ntílʼa sà uye máaŋa yɔ̀ɔge e» ke,
lire li ɲyɛ mpii shiinbii wuuni.