Yɛrɛge kʼà yyaha tíi ná nàfuufeebilʼe ke
5
Ɲyɛ yii pi ɲyɛ nàfuufeebii ke,
yii lógo!
Yyefuge ku ɲyɛ yii yyaha na ke,
yii a myahii súu,
yii raa kwuuyi wàa kuru yyaha na.
2 Yii nàfuuŋʼà fwɔ́nhɔ.
Ntɔɔnŋʼà yii vàanɲyi lyî.
3 Zúnŋʼà yii sɛɛnŋi ná yii wyɛ́rɛŋi cû,
uru zúnŋi u sí yii cɛ̂ɛgɛ.
U sí n‑pyi na fiige sʼa yii cyeere súuge fo si yii shi bò.
Yii a yii nàfuuŋi bínnʼa yaha yiye mɛɛ na,
yii ɲyɛ a li cè na diɲyɛŋi tèekwoonʼà byanhara mà?
4 Mà li ta báarapyiibii pi à yii kɛrɛyi sùmaŋi kwɔ̀n ke,
yii ɲyɛ a pire sàraŋi kan pi á mɛ!
Myahigii pire báarapyiibilʼà sú ke,
cyirʼà nɔ Siŋi Punifoo Kile na.
5 Yii à yii diɲyɛŋi canmpyaagii puni pyi ntàanŋi kanni na,
marii yii ɲyii karigii pyi.
Yii à pêe mu à jwo yatɔɔgɔ,
ŋkemu pi à byé si mbò mpyi kyara ke.
6 Sùpyaŋi u ɲyɛ u ɲyɛ a yaaga pyi yii na mɛ,
yii à uru cɛ̂ɛgɛ,
ka u u uye yaha yii cye e yii à bò,
ɲaha na yɛ sí ɲyɛ u na mɛ.
Funɲiŋke ná Kileɲarege
7 Lire kurugo mii cìnmpyiibii,
yii funɲyi ɲíŋɛ fo Kafooŋi Yesu cannuruge ká nɔ.
Yii ɲyɛ a faapyiŋi kàanmucya mà?
U maha funŋke ɲíŋɛ na zànɲyi niɲcyiiyi ná nizanɲyi sigili,
ɲaha na yɛ yire yi maha sùmaŋi pyi u à ɲwɔ.
8 Yii mú pi funɲyi ɲíŋɛ amuni,
yii i yiye waha,
ɲaha na yɛ Kafooŋi Yesu tèepanʼà byanhara.
9 Mii cìnmpyiibii,
yii àha raa tìgire cyáan yiye na mɛ,
Kile kà ŋkwɔ̀ ntîge yii na mɛ.
Kafooŋi Yesu tèepanʼà byanhara,
uru u sí n‑pa sùpyire sâra si ntàanna ná pi kapyiiŋkilʼe.
10 Kafooŋi Kile tùnntunmpii pi à tòro tèecyiini i ke,
yii pire pyiŋkanni lwɔ́,
yyefugʼà pi ta,
ka pi i ku kwú piye e maa ɲcû piye na.
11 Mpii pi à jà a cû piye na yyefuge e,
maa ntɛ̀ɛn Kile kuni i ke,
pire wuunʼà ɲwɔ.
Yii à yi lógo pyiŋkanni na Zhobu à cû uye na yyefuge e,
ná nde Kafooŋi Kile à pyi u á yyefuge kàntugo ke.
Sèeŋi na,
Kafooŋi Kile maha ɲùɲaara taa sùpyire na sèe sèlʼe.
12 Mii cìnmpyiibii,
mii sí li jwo n‑waha yii á,
yii àha raa ŋkâre Kile na mɛ,
yii àha raa ŋkâre ɲìŋke na mɛ,
yii àha raa ŋkâre yaayi yabɛrɛ na mɛ,
yii ɔɔnŋʼà yaa u pyi ɔɔn,
yii ɔnhɔŋʼà yaa u pyi ɔnhɔ,
bà Kile si mpyi u àha bú ŋkwɔ̀ yii cɛ̂ɛgɛ mɛ.
13 Ɲyɛ wà ha mpyi yyefuge e yii shwɔhɔlʼe,
urufoo u Kile ɲáare.
Wà ha mpyi funntange e,
urufoo u Kile shɛ́ɛre ná myahigilʼe.
14 Kampyi yii wà na yà,
urufoo u dánafeebii kacwɔnribii yyere pi i mpa Kile ɲáare u na,
pi i sìnmpe tìri u naa Kafooŋi mɛge na.
15 Kileɲarege ká mpyi ná dániyaŋi i,
yaŋi sí n‑cùuŋɔ,
Kafooŋi Kile sí u yîrige.
U aha nta u à kapegii pyi,
Kile sí cyi yàfa u na.
16 Lire kurugo mii cìnmpyiibii,
yii a yii kapegigii yu yiyʼá,
yii raa Kile ɲáare yiyʼá,
bà yii si mpyi si ticuumpe ta mɛ.
Sùpyaŋi u à tíi Kile yyahe taan ke,
uru Kileɲarege maha mpyi ná fànhe e sèlʼe.
17 Yii sɔ̂nŋɔ Kile tùnntunŋi Eli na,
u mpyi sùpya wuu fiige.
U à Kile ɲáare ná u zòmbilini puni i,
na zànha kà mpa mɛ.
Ɲyɛ mà lwɔ́ lire tèni na,
mà sà nɔ yyee taanre ná yiɲyɛ baani na,
zànha ɲyɛ a pa mɛ.
18 Lire kàntugo ka u u Kile ɲáare sahaŋki,
ka zànhe si mpa cire ná sùmaŋi na,
ka yi i yasɛrɛ pyi.