Wuu kyaage kwú wuye e Yesu fiige
12
Wuu pi ke,
pire sùpyiibii puni pi mpyi a dá Kile na ke,
pirʼà pyi yyecyeenɛ maa wuu kwûulo,
wuu Kile kuni tafɛɛre e.
Lire kurugo tuguro maha tuguro ti ɲyɛ wuu ɲuŋʼi maa wuu sige tire tafɛɛre na ke,
wuu ɲùɲyi wwû tire puni ɲwɔhʼi,
wuu u kapegigii ɲwɔ yaha,
cyire cyi maha wuu pyi wuu u búruge.
Tafɛɛre na Kile à wuu yaha ke,
wuu wuye waha wuu u tire fê fèŋkanna niɲcɛnnɛ na.
2 Wuu a Yesu wíi,
uru u à wuu pyi wuu à dá Kile na,
uru mú u sí wuu pyi wuu u nɔ tɛgɛni na.
U à ɲɛɛ,
ka pi i u kwòrʼa bò cige na.
U ɲyɛ a kuru silege wíi yaaga mɛ,
ɲaha na yɛ funntange Kile mpyi a bégelʼa yaha u mɛɛ na ke,
kuru u mpyi na wíi.
U à tɛ̀ɛn numɛ saanre e Kile kàniŋɛ cyɛge na.
3 Kapimpyiibilʼà ntùŋke taha u na maa u kyérege sèlʼe,
u à lire kwú uye e pyiŋkanni ndemu na ke,
yii funŋɔ cwo lire na,
bà li si mpyi yii àha ŋkànha mɛ,
yii yatanɲyi kà ŋkwû mɛ.
4 Ɲaha kurugo yɛ yoge yii ɲyɛ na ŋkwùun kapegigii na ke,
yii wà sàha jà a ku kwɔ̀n a nɔ u shìŋi tɛgɛni na mɛ.
5 Yii pi ɲyɛ Kile pyìibii ke,
yɛrɛge Kile à kan yii á maa màban le yii e ke,
yii funŋʼà wwɔ̀ kuru na la?
U à jwo:
«Mii jyaŋi,
Kafooŋi ká mu kíbe,
ma hà lire wíi ɲcwo mɛ.
U aha mu cɛ̂ɛgɛ mú,
lire kà ma yatanɲyi bò mɛ.
6 Ɲaha na yɛ shinŋi u à táan Kile á ke,
uru u maha ŋkíbili.
U à ŋgemu cè u pyà ke,
uru u maha bwùuna.»
7 Yii Kile ŋkìbiŋi kwû yiye e,
ɲaha kurugo yɛ Kile à yii cû mu à jwo u pyìi,
lire kurugo u maha yii kíbili.
Pyàŋi ŋgire u ɲyɛ ná u tuŋi ɲyɛ na u kíbili mà yɛ?
8 Kile maha u pyìibii puni kíbili.
U aha mpyi u ɲyɛ a yii kíbe mɛ,
lirʼà li cyêe na yii ɲyɛ u pyìi sèeŋi na mɛ,
ŋka kàsɔɔgɔ kùŋɔ pyìi pi ɲyɛ yii.
9 Tii na ɲyɛ wuu na naha ɲìŋke na,
pi maha wuu kíbili,
ŋka wuu maha pi pêre.
Lire e ke wuu Tuŋi nìɲyi wuŋi ká a wuu kíbili,
tá wuu ɲyɛ a yaa wuu ɲɛɛ lire na sèe sèlʼe,
bà wuu si mpyi si shìŋi niŋkwombaaŋi ta mɛ?
10 Wuu tiibii maha wuu kíbili tère nimbilere funŋʼi maha ntàanna ná pi sɔ̀nŋɔŋkanni i.
Ŋka Kile ká a wuu kíbili,
u maha li pyi,
bà wuu si mpyi si mpyi shincɛnmii uru yabiliŋi fiige mɛ.
11 Sèe wi,
mu aha a si sùpyaŋi kíbe,
li tasiige maha mpyi u á yyetanha kyaa,
funntanga kyaa bà mɛ.
Ŋka urufoo ká kàla ta ŋkìbiŋi funŋke e,
li maha mpa ɲùŋɔ kuu yyeɲiŋke ná ntìiŋi na.
12 Lire kurugo yii yii cyeyi fànha baa wuyi yîrige,
yii niŋkunɲyi yi ɲyɛ na ɲcyɛ̂ɛnni ke,
yii i yire tígilʼa yyéeŋɛ.
13 «Yii a ɲaare kuntiile eb.»
Lire e shinŋi u ɲyɛ na sêgere ke,
uru lògoɲcini sì n‑fɛ̂ɛn mɛ,
u bá a yaa u cùuŋɔ.
14 Yii yiye waha yii raa yyeɲiŋke caa yii ná sùpyire puni shwɔhɔlʼe.
Yii raa ɲaare fyìnmpe e,
ɲaha kurugo yɛ sùpya sì n‑jà Kafooŋi ɲya mà ta u ɲyɛ na ɲaare fyìnmpe e mɛ.
15 Kile à ɲwɔ yii na maa yii shwɔ.
Yii a yiye kàanmucaa,
wà kà ŋkwɔ̀ ɲcyé lire na mɛ.
Wà hà uye pyi cige fiige yii shwɔhɔlʼe ŋkemu bàha kʼà pi,
si kakyaare pyi ti nɔ shinɲyahara na mɛ.
16 Yii yákili ta,
sùpya kà zìi mpyi jacwɔ yii shwɔhɔlʼe mɛ.
Yii àha ɲcyé pèenɛ tahaga Kile yaayi na Ezawu fiige mɛ.
Urʼà u lyɛge tɔ̀ɔnŋi fáa zànnɛɛgɛ niŋkin kanna kurugo.
17 Yii à li cè na kàntugo,
u la mpyi u tuŋi si jwó le u á,
ŋka tufooŋʼà cyé.
U mɛɛsuwuŋi la mpyi si tufooŋi sɔ̀nŋɔŋkanni kɛ̂ɛnŋɛ,
ŋka u ɲyɛ a jà mɛ.
18 Kile ɲaŋke na wà sí n‑jà n‑bwɔ̀n ke,
tèecyiini i Izirayɛli shiinbilʼà file ku na pyiŋkanni ndemu na ke,
yii ɲyɛ a file Kile na amuni mɛ.
Nabwɔhɔ ná numpilaga ná nimpiriŋɛ ná zànha kafeebwɔhɔ mpyi ɲaŋke na,
19 ka pi i mpuruge tùnmpe ná mɛjwuu nimbwoo lógo.
Lire mɛjwuuni jwumpe ŋgahaŋi kurugo,
pu lógofeebilʼà jwo na pà kà núru mbâra pu na mɛ.
20 Ɲaha na yɛ ɲje yi mpyi a jwo:
«Shin maha shin ká bwɔ̀n ɲaŋke na ke,
ali li mɛ́ɛ ká nta yatɔɔgɔ,
kuru sí n‑wà ná kafaayi i si mbò kec» yire mpyi a fànha tò pi na.
21 Nde pi à ɲya ke,
lire mpyi a sìi fyagara fo Kile tùnntunŋi Musa à jwo:
«Mii naha fyá fo na ɲcyɛ̂ɛnnid!»
22 Ŋka lire ɲyɛ yii wuuni mɛ.
Yii pi ke,
yii à file Siyɔn ɲaŋke ná Kile ɲyii wuŋi kànbwɔhe na,
kuru ku ɲyɛ nìɲyiŋi Zheruzalɛmu,
ŋkemu i Kile mɛ̀lɛkɛɛ kampwɔhii niɲyahaɲyahamii ɲyɛ na kataanni pyi ke.
23 Yii à bâra dánafeebii kuruŋke na,
pire pi ɲyɛ Kile pyìcyiibii.
Pi mɛyʼà sémɛ nìɲyiŋi i.
Yii à file Kile na,
uru u maha sùpyire puni sâra a tàanna ná ti kapyiiŋkilʼe.
Mpii pi à toro ná pi mpyi a tíi,
ka Kile si pi pyi pi à fûnŋɔ ke,
yii à file pire na mú.
24 Yii à file Yesu na.
U à u sìshange wu,
maa ŋkwû wuu kurugo.
U sìshange fànhʼà pêe Abɛli sìshange woge na.
Lire pyiŋkanni na,
Kile à tòro Yesu cye kurugo,
maa tunmbyaare nivɔnnte le ná wuu e.
25 Yii a yiye kàanmucaa,
Kile ká a yii yɛrɛge,
yii àha ɲcyé logogo mɛ.
Musa u mpyi na Kile jwumpe yu mà u yaha ɲìŋke na ke,
Izirayɛli shiinbilʼà cyé uru yɛrɛge logogo,
lire kurugo kakyaarʼà nɔ pi na.
Ɲyɛ Kile ká jwo ná wuu e mà u yaha nìɲyiŋi i maa wuu yɛrɛ,
wuu aha ɲcyé,
di wuu sí n‑shwɔ n‑jwo yɛ?
26 Tèni i Kile à jwo Sinayi ɲaŋke ɲuŋʼi ke,
u jwumpe mpyi a ɲìŋke cyɛ̂ɛnnɛ.
Numɛ,
u à kâa na:
«Tɔɔge kabɛrɛ,
mii sì ɲìŋke kanni cyɛ̂ɛnnɛ mɛ,
mii sí nìɲyiŋi cyɛ̂ɛnnɛ múe.»
27 Lire ɲwɔhe ku ɲyɛ,
yadayi yi sí n‑jà n‑kɛ̀ɛgɛ ke,
yire sí n‑pînni.
Lire ká mpyi,
ɲje yi ɲyɛ yi sì n‑jà n‑kɛ̀ɛgɛ mɛ,
yire kanni yi sí n‑kwôro.