Yesu à uye pyi sáraga
10
Musa Saliyaŋi mpyi yaayi niɲcɛnɲyi nimpayi nàɲjaŋi kanna,
u mpyi a fûnŋɔ mɛ.
U mpyi a jwo na sárayi ninuyi yʼà wwû yyee maha yyee.
Lire e sùpyiibii pi ɲyɛ na bârali Kile na ke,
u sì n‑jà pire fíniŋɛ n-fûnŋɔ mɛ.
2 Kàmpyi u mpyi na sí n‑jà lire pyi,
pi mpyi na sí n‑kwôro sʼa yi wwû mɛ.
Ɲaha na yɛ kàmpyi vìniŋi kurugo yi maha wwû,
mpii pi maha yi wwû ke,
li mpyi na sí n‑pyi mu à jwo pirʼà fíniŋʼa kwɔ̀,
pi sàha mpyi na sí piye ɲya kapimpyii mɛ.
3 Ŋka lire bà li mpyi li li mɛ.
Yyee maha yyee,
sárayi mpyi maha wwû si sùpyire funŋɔ cwo ti kapegigii na.
4 Ɲaha na yɛ nupyahigii ná sikapɛrigii sìshange sì n‑sìi n‑jà sùpya kapegii yàfa u na mɛ.
5 Lire kurugo tèni i Kirisita mpyi na ma diɲyɛŋi i ke,
u à jwo Kile á:
«Mu à jwo na mu ɲyɛ na ɲcaa yatɔɔre sárayi na mɛ,
mu ɲyɛ a ɲɛɛ sùpya si yaaga kan mu á mɛ,
ŋka mu à cyere yaa mii na.
6 Yatɔɔre ti ɲyɛ na súuge sárayi tasogoge e,
lire ɲyɛ mɛ sárayi sanɲyi yi ɲyɛ na ŋkaan mu á kapegigii yàfaŋi kurugo ke,
kuru kà ɲyɛ a mu funŋke ɲíŋɛ mɛ.
7 Lire kurugo mii à jwo
“Kile,
mii u ŋge,
mii à pa si mpa mu ɲyii wuuni pyi,
bà yʼà sémɛ mii kyaa na Kile Jwumpe Semɛŋi i mɛa.”»
8 Bà wuu à li ɲya mɛ,
Kirisita à fyânha a jwo Kile á:
«Mu à jwo na sárayi ná yakanyi ná sárayi nizogoyi ná kapegigii yàfaŋi sárayi ɲyɛ a táan mu á mɛ,
na yire na bà mu ɲyɛ na ɲcáa mɛ.»
U à yire puni jwo mà li ta Musa Saliyaŋi à jwo na yire puni yʼa mpyi.
9 Ɲyɛ ka Kirisita si núrʼa jwo:
«Kile,
mii u ŋge,
mii à pa si mpa mu ɲyii wuuni pyi.»
Puru jwumpʼà li cyêe na sáraga nivɔnŋʼà tɛ̀gʼa sárayi niɲjyeyi fáa.
10 Yesu Kirisita à Kile ɲyii wuuni pyi.
U yabiliŋʼà uye kan mà pyi sáraga tɔɔgɔ niŋkin tèrigii puni mɛɛ na,
lire pyiŋkanni na wuu kapegigilʼà jyé a láha wuu na.
11 Kuni niɲjyeeni tèni i,
canŋa maha canŋa,
sáragawwuubii mpyi maha sárayi ninuyi wwû Kile á,
ŋka yire sárayi mpyi na sì n‑sìi n‑jà wà kapegigii yàfa u na mɛ.
12 Ŋka Kirisita wi ke,
urʼà uye kan mà pyi sáraga tɔɔgɔ niŋkin,
kuru sárage na ɲyɛ tèrigii puni wogo.
U à lire pyi kapegigii yàfaŋi kurugo,
lire kàntugo maa ŋkàrʼa sà ntɛ̀ɛn Kile kàniŋɛ cyɛge na.
13 Tèni i Kile sí n‑pa u zàmpɛɛnbii pyi u tooyi tatahage ke,
u à tɛ̀ɛn wani kuru cyage e na lire sigili.
14 Yii li cè,
kuru sárage niŋkinŋi cye kurugo,
Kile à mpiimu fíniŋɛ ke,
u à pire pyi ɲcɛ̀ɛgɛ cyaga baa fo tèekwombaa.
15 Kile Munaani mú à yire fíniŋʼa jwo wuu á.
Lʼà jwo na:
16 «Kafooŋi Kile à jwo “Tunmbyaare mii sí n‑le ná pi e canɲyi nimpayi i ke,
tire ti ɲyɛ:
‘Mii sí na Saliyaŋi le pi zòompilʼe,
si u jwumpe sémɛ pi yákilibii nab.ʼ”»
17 Maa núrʼa jwo:
«Mii saha sì na yákiliŋi yaha pi kapegigii ná pi ntiimbaaŋi karigii na mɛc.»
18 Ɲyɛ kapegigilʼà yàfa cyage ŋkemu i mà kwɔ̀ ke,
ɲùŋɔ saha na ɲyɛ mà sáraga wwû cyi kurugo la?
Wuu yákilitɛɛnrɛ wuubii pi file Kile na
19 Lire pyiŋkanni na,
mii cìnmpyiibii,
Yesu sìshange cye kurugo,
wuu sí n‑jà n‑jyè Kile bage sèesee cyage e fyagara baa.
20 Bage táataa vàanŋke ku mpyi wuu yyaha na ke,
bà kurʼà cwɔn mɛ,
amuni pi à Yesu cyeere pyi,
ka lire si kuro nivɔnnɔ múgo wuu á ndemu li sí wuu nɔ Kile na,
si shìŋi sèe wuŋi kan wuu á ke.
21 Uru u ɲyɛ wuu sáragawwuɲuŋufembwɔhe maa mpyi Kile bage ɲùŋɔ na.
22 Numɛ,
wuu zòompilʼà jyé a yige kaɲwɔhɔyi puni i ɲjemu yi ɲyɛ na wuu cɛ̂ɛge ke,
wuu cyeere sʼà jyé ná lùcɛnŋke e.
Lire e wuu àha núru raa fyáge mɛ,
wuu sàa dá Kile na,
wuu u file u na ná funŋɔ niŋkin i.
23 Wuu a yi yu ɲwɔfyinge na,
na wuu à wuu sɔ̀nŋɔre taha Kile ɲwɔmɛɛni na.
Wuu àha wuu funɲyi cɛɛnnɛ mɛ,
ɲaha na yɛ u aha ndemu jwo ke,
u maha lire pyi.
24 Wuu yaha wuye na wuu raa màban leni wuye e,
bà wuu si mpyi sʼa sì yyaha na tàange ná kacɛnmpyiini i mɛ.
25 Wuu àha wuye mbìnniŋi ɲwɔ yaha bà pìlʼà li pyi mɛ,
ŋka wuu a màban leni wuye e,
ɲaha na yɛ yii à li ɲya na Kafooŋi tèepanʼà byanhara.
26 Wuu aha sèeŋi kuni cè maa ɲcwɔ́ maa ŋkwôro na kapegigii pyi,
sáraga saha ɲyɛ ŋkemu ku sí cyire yàfa wuu na mɛ.
27 Shinŋi u ɲyɛ na lire pyi ke,
urʼà yaa u a fyáge Kile yibige ná nabwɔhe yyaha na.
Mpii pi à cyé Kile na ke,
kuru ku sí pire súugo.
28 Wà nʼa mpyi a Musa Saliyaŋi kafuun pyi shiin shuunni taanre ɲyii na,
ka pire si yi jwo,
pi mpyi maha urufoo bò ɲùɲaara baa.
29 Numɛ,
shinŋi u ɲyɛ na Kile Jyaŋi fare ke,
Kile ɲyɛ a yaa u kyaa pyi uru na ndemu lʼà fànha tò mbòŋi na mà?
Sèeŋi na,
sìshange kʼà tɛ̀gʼa tunmbyaare le maa urufoo kapegigii yàfa ke,
u ɲyɛ a pèenɛ taha kuru na mɛ.
Kile Munaani li maha wuu pyi wuu à Kile ticɛnmpe cè ke,
u bá à lire cyahala.
30 Ɲyɛ Kile yabiliŋʼà jwo:
«Mii u sí na ŋkooŋi wwû.
Mii u sí katupwɔhɔyi pyifeebii sârad.»
Yi mú à sémɛ na:
«Kafooŋi Kile sí u wuubii yíbe pi kapyiiŋkii nae.»
Ɲyɛ wuu à li cè na nde u à jwo ke,
u sí lire yige li kuni i.
31 Fyagara kyaa li ɲyɛ li li wà u cwo Kile ɲyii wuŋi cyeyi i.
32 Nde lʼà pyi yii na taɲjaaŋi i ke,
yii funŋɔ cwo lire na.
Yii à Kile bɛ̀ɛnmpe ta tèni ndemu i ke,
yyefugʼà yii kànha sèlʼe cyire canmpyaagilʼe,
ŋka lire ɲyɛ a yii yatanɲyi bò mɛ.
33 Tèrigii cyìlʼe,
pi mpyi maha yii cyere,
maa yii kyérege sùpyire ɲyii na.
Tèrigii cyìlʼe,
mpii pi mpyi maha ŋkyérege yii fiige ke,
yii mpyi maha pire tɛ̀re.
34 Mpii pi mpyi a le kàsuŋi i ke,
yii à pire tɛ̀gɛ pire yyefugo karigilʼe.
Pi à yii cyeyaayi cyán a shwɔ yii na,
ka yii i li kwú yiye e ná funntange e,
ɲaha na yɛ yii à li cè na yaage ku ɲyɛ yii á ke,
kurʼà fànha tò yire puni na,
ku mú ɲyɛ na ŋkwùu mɛ.
35 Lire e ke yii àha yii dániyaŋi láha Kile na mɛ,
lire sí yii pyi yii tɔ̀ɔn nimbwo ta.
36 Yii yiye waha numɛ,
yii raa sì yyaha na Kile ɲyii wuuni mpyiŋi i,
lire ká mpyi,
yaage ɲwɔmɛɛni u à lwɔ́ ke,
yii sí kuru ta.
37 Yʼà sémɛ Kile Jwumpe Semɛŋi i na:
«Ɲcyɛ̀rɛ,
ŋgemu u à yaa u pa ke,
uru sí n‑pa,
u sì mɔ mɛ.»
38 Kile à jwo:
«Shinŋi u à tíi ke,
dániyaŋi cye kurugo uru maha mpyi ɲyii na.
Ŋka wà ha kàntugo wà mii á,
mii funŋke sì n‑táan ná urufolʼe mɛf.»
39 Mii à tɛ̀ɛn ná lʼe,
mpii pi maha ntɛ̂rʼa núru maa ŋkàre tapinnage e ke,
wuu ɲyɛ pire e mɛ.
Nùmpanŋa tafeebii pi à dá Kile na ke,
pire e wuu ɲyɛ.