Poli à Timɔti pyi u yyaha le Kile jwumpe ɲjwuŋi na
4
Mii sí yi jwo n‑waha mu á,
Kile ná Yesu Kirisita ɲyii na,
uru ŋgemu u sí núru n‑pa saanwa,
si mpyi sùpyire ɲùŋɔ na,
si kwùubii ná ɲyii wuubii sâra si ntàanna ná pi kapyiiŋkilʼe ke,
2 na mu à yaa mu u a Kile jwumpe yu ma a fíniŋɛ sùpyirʼá tèrigii puni i,
tèewaa bâra tèetaan na.
Pi aha kyaa pyi ndemu lʼà para ná Kile kuni i ke,
li jwo pi á.
Ta pi yɛrɛge ma a màban leni pi e sèlʼe,
ma a pi taanni Kile kuni ɲaaraŋkanni na ná lùtaanni i.
3 Ɲaha kurugo yɛ tèni là na ma,
sùpyire sí n‑pa raa ɲcyíge kàlaŋi niɲcɛnŋi lógogo,
sʼa pi ɲyii karigii pyi si ntaha cyelentiibii kafinivinibii pìi ɲwɔhʼi mpiimu jwumɔ pʼà táan pi niŋgyigigilʼá ke.
4 Pi sí raa ɲcyíge sèeŋi lógogo,
jwuɲjyempe laaga baa wumpe pu sí n‑táan pi niŋgyigigilʼá.
5 Ŋka mu wi ke Timɔti,
cû maye na tèrigii puni i,
ma a kyaage kwú maye e,
ma a Jwumpe Nintanmpe yu sùpyirʼá.
Báara maha báara Kile à le mu cye e ke,
ma a uru pyi ma nɔ u tɛgɛni na.
Poli à jwo u mbòŋi kyaa na
6 Mii wi ke,
li saha sì mɔ mɛ,
mii sí n‑kwû.
Mii sìshange sí n‑wu n‑pyi sáraga fiige.
7 Mii à báaraŋi pyi Yesu Kirisita á ná na zòmbilini puni i,
bà zhìleŋɛ niɲcɛnŋɛ maha zhì leni mɛ.
Báaraŋi Kile à kan mii á ke,
mii à uru pyi a nɔ u tɛgɛni na.
Mii tafɛɛrʼà nɔ ti tɛgɛni na,
mà mii ta mii à kwôro Kile kuni i.
8 Numɛ Kafooŋi Yesu à mii tafɛɛre sàraŋi yaha mii yyaha na nìɲyiŋi na,
mii sí ntìiŋi kajaɲjwooni ta.
U à tíi,
u sí sùpyire puni sâra sí n‑tàanna ná pi kapyiiŋkilʼe diɲyɛŋi canŋkwɔge.
Mii kannʼá bà u sí uru sàraŋi kan mɛ,
shin maha shin u à bégelʼa u tèenuruni sige ná funntange e ke,
pire puni sí uru sàraŋi ta.
Poli yɛrɛyi nizanɲyi Timɔti á
9 Timɔti,
maye waha ma a mpa na yyére numɛ sasa,
10 ɲaha na yɛ mii wwoɲɛɛŋi Demasi à kàntugo wà mii na,
u funzɔnŋɔre punʼà taha diɲyɛŋi karigii na,
lire e u à kàre Tesaloniki kànhe e.
Kerezansi à kàre Galati kùluni i,
Titi mú sʼà kàre Dalimasi kùluni i.
11 Luka kanni u à kwôro ná mii i naha.
Mu aha a si raa ma,
yi jwo Marika á yii raa ma siɲcyan,
ɲaha na yɛ u tayyéregʼà pêe mii báaraŋi i.
12 Mii à Tisike tun Efese kànhe e.
13 Mu nimpaŋi,
ma a ntòro Torasi kànhe e Karipusi yyére,
ma a na vàanntinmbwɔhe shwɔ ma a ma,
ná mii sémɛbii,
ŋka sɛɛge wuubii kyaa li ɲyɛ mii na sèlʼe.
14 Tunntunnaŋi Alɛzandiri à kapii pyi mii na.
Ŋka Kafooŋi sí li fwooni tò u na.
15 Ta maye kàanmucaa u na mú,
ɲaha na yɛ u à ntùŋke taha wuu na wuu jwumpe kurugo.
16 Toɲcyiige e mii à kàre yukyaala bage e ke,
sùpyaŋi wà tufiige ɲyɛ a ɲɛnʼa mii tɛ̀gɛ jwumpe na mɛ.
Pi punʼà kàntugo wà mii á,
maa mii yaha naye niŋkin.
Ŋka Kile kà lire kapiini fwooni tò pi na mɛ.
17 Ŋka Kafooŋi Yesu à mii tɛ̀gɛ maa fànha kan mii á,
ka mii i jà a Kile Jwumpe jwo sèlʼe,
mpii pi ɲyɛ pi ɲyɛ Yahutuu mɛ,
pire punʼà pu lógo.
Sitaanniŋi na ɲyɛ mu à jwo cànraga,
ŋka Kafooŋi à mii shwɔ ku na.
18 Mii à li cè na Kafooŋi sí mii shwɔ si mii pyi mii u láha kapegigii mpyiŋi na,
si mii le u saanre e nìɲyiŋi na.
U à yaa ná pèente e fo tèekwombaa.
Amiina
Fwùŋi nizanŋi
19 Pirisili ná Akilasi shɛ́ɛre ma a Onɛzifɔri pyɛngɛ shiinbii shɛ́ɛre mú.
20 Erasiti wi ke,
urʼà tɛ̀ɛn Kɔrɛnti kànhe e.
Torofimu sí wi ke,
mii à yîri u yaŋgwuŋi taan Milɛti kànhe e.
21 Maye waha,
ma a mpa na yyére mà jwo wyeere tèni li nɔ ke.
Ebulusi ná Pudɛnsi ná Linusi ná Kolojya ná dánafeebii sanmpii punʼà mu shɛ́ɛre naha.
22 Kafooŋi Yesu u kwôro ná mu i,
u u ɲwɔ yii na,
u u jwó le yii á.