Poli à lɛtɛrɛŋi shɔnwuŋi ŋgemu tun Timɔti á ke
Poli à Timɔti shɛ́ɛre
1
Mii Poli u ɲyɛ Yesu Kirisita tùnntunŋɔ mà tàanna ná Kile ɲyii wuuni i ke,
shìŋi ɲwɔmɛɛni Kile à lwɔ́ ná uru maha ntaa Yesu Kirisita wwoɲɛɛge cye kurugo ke,
u à mii tun mii u sà a uru jwumpe yu.
2 Mii à ŋge lɛtɛrɛŋi tun mu á Timɔti,
mu u ɲyɛ mii ntàannamajyaŋi mà tàanna ná Kile kuni i ke,
wuu Tuŋi Kile ná wuu Kafooŋi Yesu Kirisita pi ɲwɔ ma na,
pi i ɲùɲaara ta ma na,
pi i yyeɲiŋke kan ma á.
Poli à màban le Timɔti i Kile jwumpe ɲjwuŋi na
3 Mii à Kile shɛ́ɛre,
uru ŋgemu á mii na báaraŋi pyi ná funvyinge e,
na tulyeyi fiige ke.
Pìlaga bâra canŋa na,
mii aha a Kile ɲáare,
mii funŋɔ ɲyɛ na wwùu mu na mɛ.
4 Canŋke wuu à láha wuye na ke,
mu à mɛɛ sú sèlʼe,
mii funŋɔ ɲyɛ a wwɔ̀ lire na mɛ.
Lire e mii la ɲyɛ si núru mu ɲya,
bà mii funŋke si mpyi si ntáan sèlʼe mɛ.
5 Mii funŋɔ sàha wwɔ̀ mu Kile kuni ɲaaraŋkanni niɲcɛnni na mɛ,
mu nulyage Loyisi ná mu nuŋi Enisi à lire ndemu ɲaara mu yyaha na ke.
Mii mú sʼà tɛ̀ɛn ná lʼe na mu à kwôro lire kuni i.
6 Lire kurugo tèni i mii à na cyeyi taha mu ɲùŋke na maa Kile ɲáare,
ka mu u Kile màkange ŋkemu ta u báaraŋi mɛɛ na ke,
maye pwɔ bà kuru si mpyi si ŋkwôro mu cye e mɛ.
7 Kile Munaani ká wuu yyaha cû,
wuu saha ɲyɛ a yaa wuu a fyáge mɛ,
ɲaha na yɛ li sí fànha kan wuu á,
si tàange le wuu zòmpyaagilʼe,
si wuu pyi wuu cû wuye na.
8 Lire kurugo ma hà raa silege sʼa wuu Kafooŋi Yesu kyaa yu sùpyirʼá mɛ.
Mii mɛ́ɛ ɲyɛ kàsuŋi i u mɛge kurugo ke,
lire kà mpyi ma á silege kyaa mɛ.
Ŋka maye pwɔ Kile fànhe niŋkange na,
ma a ma nàzhan lwɔ́ kyaage e mii fiige Jwumpe Nintanmpe ɲjwuŋi kurugo.
9 Kile u à wuu shwɔ,
maa wuu yyerʼa pyi sùpyii fwɔnrɔ baa wuu.
Wuu kacɛnŋkii kurugo bà u à lire pyi mɛ,
wuu ná Yesu Kirisita wwoɲɛɛge kurugo,
u à ɲwɔ wuu na maa lire pyi mà tàanna ná u ɲyii wuuni i,
mà diɲyɛŋi ta u sàha sìi mɛ.
10 Numɛ u à lire kacɛnni cyêe wuu na wuu Shwofooŋi Yesu Kirisita mpaŋi cye kurugo.
Uru u à fànha ta kwùŋi na,
maa li cyêe na wuu aha ɲɛɛ Jwumpe Nintanmpe na,
wuu sí shìŋi niŋkwombaaŋi ta.
11 Puru Jwumpe Nintanmpe ɲjwuŋi kurugo Kile à mii pyi u tùnntunŋɔ.
Mii na puru jwumpe yu sùpyirʼá marii pi kâlali pu na.
12 Lire kurugo ŋke yyefuge puni ɲyɛ mii ɲuŋʼi.
Ŋka lire ná li wuuni mú i,
lire ɲyɛ mii á silege kyaa mɛ,
ɲaha na yɛ ŋgemu na mii à na cyɛge taha ke,
mii à uru cè,
mii mú à tɛ̀ɛn ná lʼe,
nde mii à kan u á ke,
li síŋi ɲyɛ u na mà lire mâra fo diɲyɛ canŋkwɔge.
13 Ɲyɛ Timɔti,
jwumpe sèe wumpe mii à jwo mu á ke,
puru yaha maye funŋʼi,
maa maye pwɔ Kile kuni ɲaaraŋi na.
Ntàannamagare ti ɲyɛ na ntaa Yesu Kirisita wwoɲɛɛge e ke,
ta ma karigii pyi ma a ntàanni ná tire e.
14 Jwumpe Nintanmpe pʼà jwo mu á ke,
ma hà wà yaha u a pu labali u a yu mɛ.
Pu mâra ná Kile Munaani fànhe e,
lire ndemu lʼà tɛ̀ɛn wuu e ke.
15 Mu à cè na Azi kùluni dánafeebii punʼà kàntugo wà mii na,
Fijɛli ná Ɛrimɔjɛni mú na ɲyɛ pire e.
16 Ŋka Onɛzifɔri wi ke,
u à mii funŋke ɲíŋɛ karii niɲyahagilʼe.
Mii kàsujyiini ɲyɛ a pyi u á silege kyaa mɛ.
Kafooŋi u ɲùɲaara ta u pyɛngɛ shiinbii na.
17 Tèni i u à pa naha Ɔrɔmu kànbwɔhe e ke,
u à mii cya fo mà mii ɲya.
18 Kafooŋi Kile u ɲùɲaara ta u na diɲyɛŋi canŋkwɔge Kafooŋi Yesu mɛge na.
U à kacɛnŋkii ɲcyiimu pyi mii na mà mii yaha Efese kànhe e ke,
mu Timɔti à cyire cè mà tòro sùpyire puni na.