Yɛrɛŋkanni na Timɔti à yaa u a dánafeebii yɛrɛge ke
5
Ma hà raa jwuɲjwumbaama yu nàŋkolyeebii na mɛ,
ŋka ta pi yɛrɛge ná lùtaanni i mu à jwo mu tii pi.
Lire pyiŋkanni na mú,
ta nàɲjiibii yɛrɛge mu à jwo mu cìnmpyii.
2 Ciɲjyeebii pi ke,
ta pire yɛrɛge mu à jwo mu nɛɛ pi.
Cipyire mú ti ke,
ta tire yɛrɛge mu à jwo ma cìnmpyicyee,
ŋka ná zòvyinre e.
Leŋkwucyeebii pi à yaa ná ntɛ̀gɛŋi i ke
3 Tɛgɛfee ɲyɛ leŋkwucyeebii mpiimu na mɛ,
pire pi à yaa ná ntɛ̀gɛŋi i.
4 Ŋka pyìi,
lire ɲyɛ mɛ ɲampyire ká mpyi leŋkwucwoŋi ŋgemu á ke,
pirʼà yaa pi Kile yyaha fyagare ntaanniŋi sìi pi pyɛnyi na,
pi i pi sifeebii tugure lwɔ́,
bà pi sifeebilʼà fyânha a pi woore lwɔ́ mɛ.
Lire lʼà táan Kile á.
5 Leŋkwucwoŋi u ɲyɛ uye kanni na,
ná sùpya ɲyɛ u á,
ŋgemu u sí u tugure lwɔ́ mɛ,
urʼà Kile pyi u cyɛge tatahage,
marii u ɲáare pìlaga bâra canŋa na,
bà Kile si mpyi si u tɛ̀gɛ mɛ.
6 Ŋka leŋkwucwoŋi u ɲyɛ mayaare e ke,
uru niŋkwuŋi u ɲyɛ,
ali mà li ta u ɲyɛ ɲyii na.
7 Ta dánafeebii kâlali ɲcyii karigii na,
bà pi si mpyi sʼa cyi kuni ɲaare,
si mpyi tìgire cyaga baa mɛ.
8 Shin maha shin à yaa u u cìnmpyiibii tugure lwɔ́,
ŋka u pyɛngɛ shiinbii wuuni lʼà lyɛ.
Ŋgemu ká mpyi u ɲyɛ a lire pyi mɛ,
urufolʼà fworo Kile kuni i feefee.
Kilecembaabii mú bá à pwɔ́rɔ urufoo na.
9 Leŋkwucyeebii pi à nɔ yyee beetaanre (60) na ke,
lʼaha nta pi mpyi a kúu pi nàmbaabii na,
pire mpii mɛyi yʼà yaa yʼa sémɛni dánafeebii sʼa pire tɛ̀re.
10 Pi à yaa pi pyi mɛtangafee pi kacɛnŋkii cye kurugo,
pi à yaa pi ta pi à pi pyìibii byé byíŋkanna niɲcɛnnɛ na,
pi à yaa pi ta pi à nàmpwuun mâra,
maa dánafeebii tooyi jyé múa,
pi à yaa pi ta pi à kanhamafeebii pìi tɛ̀gɛ,
pi à yaa pi ta pi à kacɛnŋkii shiŋi puni pyi.
Ɲyɛ leŋkwucyeebii pi ɲyɛ amuni ke,
pire mɛyi yʼà yaa yʼa sémɛni.
11-12 Ŋka leŋkwucyeebii pi ɲyɛ cipyire ke,
ma hà raa pire mɛyi sémɛni mɛ.
Shwɔhɔlʼe nàmbajyiini lage sí n‑pa pi ta.
Lire ká mpyi,
ɲwɔmɛɛni pi maha lwɔ́,
na pire sí raa báare Kirisita kannʼá ke,
pi sí lire kɛ̀ɛge si kàntugo wà u á.
13 Mà bâra lire na,
mu aha a pi mɛyi sémɛni,
pi sí n‑pyi sàafee sʼa ɲaare pyɛnyi ná yiye shwɔhɔlʼe laaga baa,
là mpyimbaa.
Lire kanni bà mɛ,
pi sí n‑pyi jwuɲyahamafee,
sʼa pi ɲwɔyi leni sùpyire sannte jwumpe e,
sʼa jwuɲjwumbaampe yu mú.
14 Lire kurugo mii la ɲyɛ leŋkwucipyire ti nàmbaya jyèb,
pi i pyìi si,
pi i yákili yaha pi pyɛnyi na sèlʼe,
bà wuu zàmpɛɛnbii si mpyi pi àha ŋkwɔ̀ tìgire cyaga ta wuu na mɛ.
15 Mii na mpe jwumpe yu ɲaha na yɛ leŋkwucipyire tà à kàntugo wà Kile kunʼá mà kwɔ̀,
maa ntaha Sitaanniŋi ɲwɔhʼi.
16 Dánafeebii shwɔhɔlʼe,
ceeŋi wà cìnmpyicyee ká mpyi leŋkwucyee,
urʼà yaa u pi tugure lwɔ́,
leŋkwucyeebii pi ɲyɛ piye kanni na ke,
bà dánafeebii kuruŋke si mpyi si jà ɲjyére ná pire e mɛ.
Dánafeebilʼà yaa pi a pi kacwɔnribii pêre
17 Dánafeebii kacwɔnribii pi ɲyɛ na pi báaraŋi pyi na ɲwɔge ke,
pire pi à yaa ná pèente e,
yii yaha pire na sèlʼe,
mpiimu bá pi à piye pwɔ Kile jwumpe ɲjwuŋi na ke,
pire kaɲyɛɛ na.
18 Ɲaha kurugo yɛ yʼà jwo Kile Jwumpe Semɛŋi i na:
«Mu aha a sùmaŋi bwùun ná nìiyi i si u pyàŋi wwû,
mu ɲyɛ a yaa mu u yi ɲwɔyi pwɔ mɛc.»
Yi mú à jwo Kile Jwumpe Semɛŋi i na:
«Báarapyiŋʼà yaa ná u sàraŋi id.»
Nde Timɔti à yaa u pyi wà ha dánafeebii kacwɔnrɔŋi wà cɛ̂ɛge u á ke
19 Wà ha dánafeebii kacwɔnrɔŋi wà cɛ̂ɛge kani là na,
ná shiin shuunni taanre ɲyɛ a lire kani ɲya maa li jwo mu á mɛ,
ma hà ndá li na mɛ.
20 Kacwɔnribii pi ɲyɛ na kapegigii pyi ke,
pire yɛrɛ pi sanmpii ɲyii na,
bà pire mú si mpyi sʼa fyáge si kàntugo wà kapegigii na mɛ.
21 Mii sí yi jwo n‑waha mu á,
Kile ná Yesu Kirisita ná u mɛ̀lɛkɛɛbii niɲcwɔnribii ɲyii na,
na mu à yaa mu u maye waha maa ɲcyii karigii puni pyi.
Mu à yaa mu u sùpyire puni cû cùŋkanna niŋkin na,
ma hà sùpya pwɔ́ɔŋɔ sùpya na mɛ.
22 Ma hà funŋke wyɛ̀ɛŋɛ si ma cyeyi taha sùpya ɲùŋɔ na si u pyi dánafeebii kacwɔnrɔwɔ mɛ.
Shinŋi u ɲyɛ na kapegigii pyi ke,
ma hà ŋgwɔ̀ ná urufolʼe mɛ,
mu à yaa mu u pyi ná zòvyinre e tèrigii puni i.
23 Ma hà raa lùtiige kanni byii mɛ,
ta ɛrɛzɛn sinmpe nimbilere byii ma funɲjaŋke kurugo,
bà mu si mpyi si ɲcùuŋɔ mɛ,
ɲaha na yɛ mu ɲyɛ na ɲcùuŋi na ntahali mɛ.