Dánafeebilʼà yaa pi a Kile ɲáare sùpyire puni kurugo
2
Ɲyɛ yaage niɲcyiige mii ɲyɛ na ɲcaa dánafeebilʼá ke,
kuru ku ɲyɛ ŋke:
yii a Kileɲareyi niɲcɛnɲyi shiŋi puni pyi,
yii raa u ɲáare sùpyire puni kyaa na,
yii raa fwù kaan u á ti puni kurugo.
2 Yii a Kile ɲáare saanbii ná shinbwoobii puni kurugo,
bà wuu si mpyi si ntɛ̀ɛn yyeɲiŋke ná fɛrɛmpe e,
sʼa Kile pêre ná ɲaaraŋkanna niɲcɛnnʼi mɛ.
3 Lire lʼà ɲwɔ,
lire mú lʼà táan wuu Shwofooŋi Kile á.
4 U la ɲyɛ sùpyire puni si shwɔ,
ti i sèeŋi cè.
5 Ɲaha kurugo yɛ Kile na ɲyɛ niŋkin,
sìsuruleŋɛ niŋkin mú u ɲyɛ u ná sùpyire puni shwɔhɔlʼe,
sùpya u ɲyɛ u wi,
Yesu Kirisita kyaa li.
6 U à uye kan mà pyi sùpyire puni ɲùŋgwulwɔrɔ ti kapegigilʼe.
Kile ɲyii tènʼà nɔ ke,
u à lire pyi si li cyêe sùpyire na na uru la ɲyɛ ti i shwɔ.
7 Puru jwumpe ɲjwuŋi kurugo,
Kile à mii Poli tìŋʼa pyi u tùnntunŋɔ.
Mii ɲyɛ a finɛ mɛ,
sèe u ɲyɛ u wi,
supyishiŋi sanŋi u ɲyɛ u ɲyɛ Yahutuu mɛ,
Kile à mii tun na mii u sà a pire taanni u kuni ɲaaraŋkanni na,
lire kuni li ɲyɛ sèeŋi.
Pyiŋkanni na nàmbaabii ná cyeebilʼà yaa pi a Kile kuni ɲaare ke
8 Ɲyɛ cyaga maha cyagʼe dánafeebii na bínnini ke,
mii la ɲyɛ nàmbaabii pi a pi cyeyi yîrige,
pi raa Kile ɲáare ná zòvyinre e,
lùyirili ná jwuɲyahama baa.
9 Mii la mú ɲyɛ cyeebii pi pi vàanɲyi nindeyi cè.
Pi à yaa pi a vàanya leni ɲjemu yi ɲyɛ yi sì pi ɲjini faha mɛ.
Pi ɲyɛ a yaa pi a ɲùɲyi pwu sùpyire sʼa pi cyêre kampyahii na mɛ,
pi ɲyɛ a yaa pi a vàanɲyi loŋgara wuyi ná pùcyage yaayi loŋgara wuyi leni mɛ,
mu à jwo sɛɛnŋi wuyi ná ŋkèeɲcurigii loŋgara wogigii.
10 Ŋka pi pùcyage yaleerʼà yaa ti pyi kacɛnmpyiini,
ceewe maha ceewe u ɲyɛ na Kile pêre ke,
amuni u à yaa u pyi.
11 Mà bâra lire na,
cyeebii ká mpyi Kile Jwumpe tajwuge e,
pi à yaa pi tɛ̀ɛn tanuge e,
pi raa pu núru pi raa ɲaare pi a ntàanni ná pʼe.
12 Mii ɲyɛ a ɲɛɛ ceewe u a sùpyire kâlali na cyeebii ɲyɛ nàmbaabii ɲùŋɔ na mɛ,
u à yaa u tɛ̀ɛn tanuge ea.
13 Lire kajwuuni li ɲyɛ,
Kile à Adama dá yyecyiige na,
lire ɲwɔhɔ na maa Awa dá.
14 Adama bà Sitaanniŋi à ɲwɔ fáanŋa yyecyiige na mɛ,
ŋka ceeŋi u à fyânha a ɲwɔ fáanŋa,
ka u u Kile ɲwɔmɛɛni yaha.
15 Ceeŋi pyìisini sì n‑jà u pyi u pɔ̂ɔn u nùmpanŋke e mɛ,
li tɛgɛni li ɲyɛ u kwôro Kile kuni i ná tàange ná tufeempe e,
u uye pɛ̀rɛge cè.