6
Mii cìnmpyiibii,
yii pi à yiye yaha Kile Munaani li i ŋkɛ̂ɛnŋi ke,
wà ká Kile kafuun pyi,
yii urufoo yɛrɛ ná lùtaanni i,
yii i u le kuni nintiini i.
Yii mú sʼa yiye kàanmucaa lire fiige kà ŋkwɔ̀ yii ta mɛ.
2 Yii yiye tɛ̀gɛ yii i yiye tugure lwɔ́,
lire pyiŋkanni na,
yii sí Kirisita Saliyaŋi fûnŋɔ.
3 Ŋgemu ká a sɔ̂nŋi na urʼà pwɔ́rɔ pi sanmpii na,
mà li ta u ɲyɛ a sìi yafyin mɛ,
urufoo na uye ɲwɔ fáanŋi.
4 Shin maha shin à yaa u uye toroŋkanni kàanmucya sèlʼe.
Lʼaha nta lʼà ɲwɔ,
urufolʼà yaa u pyi funntange e,
u sí ɲyɛ a yaa u wabɛrɛ wuu fwɔ́hɔrɔ mɛ.
5 Ɲaha kurugo yɛ Kile sí shin maha shin yíbe u kapyiiŋkii kyaa na.
6 Ɲyɛ ŋgemu ká a yii kâlali Kile jwumpe na ke,
yii a yii cyeyaayi yà kaan urufolʼá.
Nde mu à pyi ke, lire tɔ̀ɔnŋi mu maha nta
7 Yii àha raa yiye ɲwɔ fáanŋa mɛ,
sùpya sì n‑jà raa Kile fare mɛ.
Sùpyaŋi ká yaage shiŋi ŋgemu nûgo ke,
kuru shiŋi u maha ŋkwɔ̀n.
8 Lire ɲwɔhe ku ɲyɛ na ŋgemu ká a u karigii pyi mà tàanna ná u ɲyii wuuni i ke,
kwùŋi u ɲyɛ na urufoo sigili.
Ŋka ŋgemu ká a u karigii pyi mà tàanna ná Kile Munaani ɲyii wuuni i ke,
Kile Munaani sí urufoo tɔ̂ɔn ná shìŋi niŋkwombaaŋi i.
9 Ɲyɛ lʼaha mpyi amuni,
wuu àha ŋkànha kacɛnŋkii mpyiŋi taan mɛ,
ɲaha kurugo yɛ wuu aha màban le kacɛnŋkii mpyiŋi i,
tèni là na ma,
wuu sí n‑pa li tɔ̀ɔnŋi ta.
10 Lire kurugo wuu a kacɛnŋkii pyi sùpyire punʼá tère o tère e wuu à li laage ta ke.
Ŋka wuu cìnmpyiibii dánafeebii wuuni lʼà lyɛ.
Jwumpe nizanmpe
11 Ɲyɛ yii nte sémɛre nintibuunte wíi,
mii yabiliŋi cyɛge kʼà ti sémʼa tùugo yii á.
12 Mpii la ku ɲyɛ yii raa ŋkwùun fànhe e ke,
pi na lire pyi si nta ntáan sùpyirʼá.
Kabile niŋkin ɲwɔhʼi pi ɲyɛ,
pi la ɲyɛ sùpyire sʼa pi yyaha fwɔ́hɔre na pi na yu na Kirisita kwùŋi kanni u sí n‑jà sùpyaŋi shwɔ mɛ.
13 Mà li ta,
pire pi à kwɔ̀n ke,
pi yabilimpii ɲyɛ na ɲaare mà yyaha tíi ná Musa Saliyaŋi i mɛ.
Pi la ɲyɛ yii i ŋkwɔ̀n si nta raa piye cyêre na yii à ɲɛnʼa taha pire fye e.
14 Mii wi ke,
mii ɲyɛ a sìi na li caa si naye jwo si cye taha yaaga na mà tòro wuu Kafooŋi Yesu Kirisita kworokworocige na mɛ.
Kuru kworokworocige kurugo diɲyɛŋi tɔ̀ɔnŋʼà kwɔ̀ mii á,
mii tɔ̀ɔnŋi mú sʼà kwɔ̀ ŋge diɲyɛŋi i.
15 Wà à kwɔ̀n yo,
wà ɲyɛ a kwɔ̀n mà yo,
yaaga ɲyɛ lire e mɛ,
zòŋi nivɔnŋi Kile maha le wuu e ke,
uru u na wíi.
16 Mpii pi na li kuni ɲaare ke,
Kile u yyeɲiŋke kan pirʼá,
u u ɲùɲaara ta pi na.
Kile sùpyire kyaa na mii ɲyɛ,
tire ti ɲyɛ Izirayɛli.
17 Sùpya kà núru na kànha mɛ,
nɔɔpiiyi yi ɲyɛ mii cyeere na ke,
Yesu kurugo mii à yire ta.
18 Mii cìnmpyiibii,
wuu Kafooŋi Yesu Kirisita u ɲwɔ yii puni niŋkin niŋkinŋi na u u jwó le yii á.
Amiina!