Yɛrɛyi nizanɲyi
13
Mii tontanrawoge ku sí n‑pyi ŋke yii yyére.
Wuu sí n-sà kapegigii pyifeebii sâra si ntàanna ná pi kapyiŋkilʼe,
bà yʼà jwo Kile Jwumpe Semɛŋi i na:
«Shiin shuunni taanre ká kani ndemu ɲya tapyige e ke,
lire kani sí n‑cwɔɔnrɔ si ntàanna ná pire niɲjwuyi ia.»
2 Mii tozhɔnwoge yii yyére,
mpii pi mpyi a kapegigii pyi ke,
mii mpyi a pire puni yɛrɛ,
mà bâra sùpyire sannte na.
Numɛ,
mà mii laage yaha kʼà tɔɔn yii na,
mii sí yi jwo yii á sahaŋki,
mii aha sà mpiimu ta pi i kapegigii pyi sahaŋki ke,
mii sì ku táan pirefee na mɛ.
3 Ná yii sʼà jwo na yii la ɲyɛ si ɲcè na Kirisita u à u jwumpe le mii ɲwɔge e,
yii sí li cè.
Kirisita fànhe ɲyɛ a cyɛ́rɛ yii karigilʼe mɛ,
u maha u sífente cyêre yii na.
4 Sèe wi,
tèni i pi mpyi na u kwòre cige na ke,
u mpyi a uye pyi fànha baa yaaga,
ŋka u à ɲɛ̀ a fworo kwùŋi i Kile sífente cye kurugo.
Wuu fànhʼà cyɛ́rɛ,
bà Kirisita woge mpyi a cyɛ́rɛ mɛ.
Ŋka wuu aha núrʼa shà yii yyére,
yii sí li ɲya wuu karigii pyiŋkanni i,
na Kile maha fànhe kaan wuu á,
bà u à ku kan Kirisita á mɛ.
5 Yii yiye kàanmucya sèe sèlʼe kampyi sèeŋi na yii na ɲaare Kile kuni i.
Yii ɲyɛ a li cè yiye e na Yesu Kirisita na ɲyɛ yii e mà?
U aha nta u ɲyɛ yii e mɛ,
lirʼà li cyêe na yii à kùuŋʼa cwo Kile kuni i.
6 Ŋka mii na sɔ̂nŋi yii sí li cè yiye e na wuu ɲyɛ a kùuŋʼa cwo Kile kuni i mɛ.
7 Wuu na Kile ɲáare,
yii àha ŋkwɔ̀ kapii pyi mɛ.
Li kapyiini ɲùŋke bà ku ɲyɛ si li cyêe yii na na wuu na jìnʼa kyaa pyi mɛ,
ŋka li kapyiini ɲùŋke ku ɲyɛ si yii ɲya kacɛnnɛ tapyige e.
Yii a kacɛnŋii pyi,
ali lire mɛ́ɛ ká nta li sí li cyêe na wuu à wurugo,
lire ɲyɛ tapege mɛ.
8 Wuu sì n‑jà Kile sèeŋi fyìinnɛ mɛ,
nde kanni wuu sí n‑jà n‑pyi ke,
lire li ɲyɛ mà u pyi u a sì yyaha na.
9 Wuu fànhe mɛ́ɛ ká nta kʼà cyɛ́rɛ,
ka yii woge si mpêe,
lire na ɲyɛ wuu á funntanga.
Wuu Kileɲarege ku ɲyɛ,
yii ndìre le Kile kuni i.
10 Mà mii laage yaha kʼà tɔɔn yii na,
mii na ŋge lɛtɛrɛŋi sémɛni si ŋkan yii á,
bà li si mpyi,
mii aha nɔ yii yyére,
mii àha zà yafyin cwɔɔnrɔ ná fahanʼi si ntàanna ná Kafooŋi fànhe niŋkange e mii á mɛ.
U à kuru fànhe kan mii á,
si yii tɛ̀gɛ yii a sì yyaha na Kile kuni i.
Ku ɲyɛ a kan si yii ɲùŋɔ kyán Kile kuni na mɛ.
Jwumpe nizanmpe
11 Ɲyɛ numɛ,
mii cìnmpyiibii,
yii pyi funntange e.
Nde li sí yii pyi yii ndìre le Kile kuni i ke,
yii a lire pyi.
Yii a màban leni yiye e.
Yii yii sɔ̀nŋɔre pyi niŋkin,
yii i yyeɲiŋke yaha ku pyi yii ná yiye shwɔhɔlʼe.
Lire ká mpyi,
Kileŋi u maha tàange ná yyeɲiŋke kaan ke,
uru sí n‑pyi ná yii e.
12 Yii a cìnmpworogo fwùŋi kaan yiyʼá ná funɲcɛnŋi i.
Kile wuubii pi ɲyɛ naha ke,
pire punʼà yii shɛ́ɛre.
13 Wuu Kafooŋi Yesu Kirisita u ɲwɔ yii na,
tàange ku ɲyɛ Kile e ke,
kuru ku pyi yii ná yiye shwɔhɔlʼe,
yii i mpyi Kile Munaani wwoɲɛɛge e.