9
Ɲyɛ wyɛ́rɛŋi yii ɲyɛ na bínnini si ntɛ̀gɛ Zheruzalɛmu shiinbii tɛ̀gɛ ke,
ɲùŋɔ saha ɲyɛ mii i yà jwo yii á uru kyaa na mɛ.
2 Ɲaha na yɛ funɲcɛnŋke ku ɲyɛ yii á uru báaraŋi mɛɛ na ke,
mii à ku cè.
Mii à yii mɛtanga yyere kuru kyaa na Masedoni dánafeebii shwɔhɔlʼe.
Mii à yi jwo pi á na mà lwɔ́ fo taɲjyee na,
Akayi kùluni dánafeebilʼà bégele si Kile wuubii tɛ̀gɛ Zheruzalɛmu i.
Kuru funɲcɛnŋke ku ɲyɛ yii á ke,
kurʼà màban le pi shinɲyaharʼe pi à ntɛ̀gɛŋi pyi sèlʼe.
3 Lire ná li wuuni mú i,
mii sí mpii cìnmpyiibii tun yii yyére,
ŋkèeŋi nimbwoŋi yii à ta ŋge wyɛ́rɛŋi kyaa na ke,
uru kà mpyi laaga baa mɛ,
pi i sà yii ta yii à bégele bà mii mpyi a yi jwo mɛ.
4 Ná lire bà mɛ,
Masedoni dánafeebii pìi ká shà ná mii i,
mà sà li ta yii ɲyɛ a bégele mɛ,
ku sí n‑pyi silege wuu á,
ŋka yii wuuni cye sí n‑tòro.
5 Lire e mii à li ɲya na mii à yaa mii i mpii cìnmpyiibii ɲáare,
pi raa wá na yyaha na yii yyére,
wyɛ́rɛŋi ɲwɔmɛɛni yii à lwɔ́ ke,
pi i sà uru karigii cwɔɔnrɔ mà jwo mii u nɔ wani ke.
Lire sí li cyêe na yii à u kan ná funŋɔ niŋkin i,
mà ta fànha ɲyɛ a cyán yii na mɛ.
6 Yii li cè na mu aha sùmashi nimpyigere nûgo,
sùma nimpyigere mu maha ŋkwɔ̀n.
Mu sí kà niɲyahawa nûgo,
mu maha niɲyahawa kwɔ̀n.
7 Pɛ̀rɛge shin maha shin à lwɔ́ uye funŋʼi si ŋkan ke,
urufoo u kuru kan.
U li pyi ná funntange e,
lʼàha mpyi mu à jwo fànha kyaa mɛ,
ɲaha na yɛ shinŋi u à ŋkanŋi pyi ná funntange e ke,
uru kyaa li maha ntáan Kile á.
8 Síŋi na ɲyɛ Kile á si kacɛnŋkii shiŋi puni pyi yii á,
bà yii si mpyi sʼa yii màkwuɲwɔyaayi puni taa tèrigii puni i fo si shinɲyahara tɛ̀gɛ tɛgɛŋkannigii niɲyahagii na,
9 bà yʼà sémɛ Kile Jwumpe Semɛŋi i sùpyaŋi niɲcɛnŋi kyaa na mɛ na:
«U maha fòŋɔfeebii kaan sèlʼe,
u cɛ̀nmpe ɲyɛ a sìi na ŋkwùu mɛa.»
10 Kile u maha sùmashiŋi kaan faapyiŋʼá,
maa yalyire kaan u á ke,
uru sí yii cyeyaayi ɲyaha mú,
bà pi sanmpii si mpyi sʼa yaaya niɲyahaya taa yii á mɛ.
11 Yii sí yaayi shiŋi puni ta,
bà yii si mpyi sʼa pi sanmpii kaan sèlʼe tèrigii puni i mɛ.
Lire ká mpyi,
wyɛ́rɛŋi yii sí n‑kan wuu sà ŋkan ke,
shinɲyahara sí fwù kan Kile á uru kyaa na.
12 Uru wyɛ́rɛŋi yii sí n‑bínni ke,
uru sí Kile wuubii wuuni ɲwɔ Zheruzalɛmu kànhe e.
Lire kanni bà mɛ,
li sí n‑pyi kaɲuŋɔ pi si fwù kan Kile á sèlʼe.
13 Pi aha uru ntɛ̀gɛŋi ta,
pi sí Kile kêe,
ɲaha na yɛ pi sí li cè na Jwumpe Nintanmpe pʼà yyaha tíi ná Kirisita e ke,
na yii à dá puru na,
maa pu kurigii ɲaare,
maa yii cyeyaayi táali sèlʼe ná pi e,
mà bâra sùpyire sannte na.
14 Ɲwɔŋkanni na Kile à sàa ɲwɔ yii na ke,
lire kurugo pi sí raa Kile ɲáare yii á,
si yii kyaa táan piyʼá sèlʼe.
15 Ɲyɛ mii cìnmpyiibii,
Kile à yabwɔhe ŋkemu kan wuu á mana,
ná sùpya sì n‑jà yi yyaha jwo mɛ,
wuu u pêe kuru kurugo.