Poli à lɛtɛrɛŋi shɔnwuŋi ŋgemu kan Kɔrɛnti kànhe dánafeebilʼá ke
Lɛtɛrɛŋi tasiige
1
Mii Poli u ɲyɛ Yesu Kirisita tùnntunŋɔ mà tàanna ná Kile ɲyii wuuni i ke,
mii ná wuu cìnmpworoŋi Timɔti u à ŋge lɛtɛrɛŋi sémɛ,
yii Kile dánafeebii kuruŋke ku ɲyɛ Kɔrɛnti i ná yii mpii puni pi ɲyɛ Kile wuu Akayi kùluni i ke,
si ntun yii á.
2 Wuu Tuŋi Kile ná wuu Kafooŋi Yesu Kirisita pi ɲwɔ yii na,
pi i yyeɲiŋke kan yii á.
Poli à fwù kan Kile á u ntɛ̀gɛŋi kurugo
3 Wuu Kile kêe,
uru u ɲyɛ wuu Kafooŋi Yesu Kirisita Tuŋi.
Uru u ɲyɛ ɲùɲaare punifoo,
uru u maha wuu tɛ̀re tèrigii puni i,
4 maa màban leni wuu e yyefuge shiŋi puni tèrigilʼe.
Lire e wuu maha jìni na màban leni yyefuge shiŋi puni feebilʼe,
bà u maha u leni wuu e mɛ.
5 Yii li cè na,
bà wuu maha yyefuge taa sèlʼe Kirisita mɛge kurugo mɛ,
amuni Kile mú maha màban leni wuu e sèlʼe Kirisita cye kurugo.
6 Mu aha wuu ɲya yyefuge e,
lire ɲùŋke ku ɲyɛ si màban le yii e,
yii raa sì yyaha na Kile kuni i.
Kile ká màban le wuu e,
lire ɲùŋke ku ɲyɛ si màban le yii e,
si yii pyi yii jà a wuu kyaage shiŋi kwú yiye e.
7 Wuu à sàa dá li na na yafyin sì n‑jà yii pyi yii fworo Kile kuni i mɛ,
ɲaha na yɛ wuu à li cè na,
bà yii ɲyɛ na yii nàzhan lwúu ná wuu e kyaage e mɛ,
amuni yii mú ɲyɛ na yii nàzhan lwúu màbanŋi ntaŋi i ná wuu e.
8 Ɲyɛ cìnmpyiibii,
yyefuge e wuu à tòro Azi kùluni i ke,
wuu la na ɲyɛ yii i kuru cè.
Ku fànhe mpyi a pêe mà tòro wuu pɛ̀rɛge na,
fo wuu sàha mpyi a tɛ̀ɛn ná lʼe na wuu sì n‑shwɔ kwùŋi na mɛ.
9 Wuu mpyi a sàa li yaha na pi sí wuu bò,
lire e wuu sàha mpyi a wuu sɔ̀nŋɔre taha wuye na mɛ,
fo Kile na,
uru u maha kwùubii ɲɛ̀ni ke.
10 Uru u à wuu shwɔ uru kwùŋi na,
u sí n‑pa wuu shwɔ sahaŋki.
Sèe wi,
wuu à tɛ̀ɛn ná lʼe na u saha sí n‑pa wuu shwɔ.
11 Yii mú na wuu tɛ̀re ná Kileɲarege e.
Yire Kileɲareyi niɲyahayi kurugo,
kacɛnni Kile à pyi wuu á ke,
shinɲyahara na fwù kaan u á lire kurugo.
Poli à u tashage kɛ̂ɛnŋɛ
12 Nde lʼà wuu ɲùɲyi yîrige ke,
lire li ɲyɛ wuu toroŋkanni diɲyɛŋi i,
mà cye cyán tèni i wuu mpyi yii shwɔhɔlʼe ke.
Wuu à li cè wuye e na wuu à lire pyi ná funvyinge ná sèeŋi i,
Kile baragʼe.
Sùpyire yákilifente bà tʼà lire pyi mɛ,
ŋka Kile ntɛ̀gɛŋi cye kurugo lʼà pyi.
13-14 Yii li cè na nde yii à kâla wuu lɛtɛribilʼe maa li yyaha cè ke,
wuu ɲyɛ a yafyin sémɛ mà tòro lire na mɛ.
Wuu Kafooŋi Yesu cannuruge wuu pi sí n‑pyi kaɲuŋɔ si yii ɲùɲyi yîrige,
yii sí n‑pyi kaɲuŋɔ si wuu wuyi yîrige.
Yii à ɲcyɛ̀rɛ cè lire kani i mà kwɔ̀,
ŋka mii na sɔ̂nŋi yii sí n‑pa li puni yyaha cè sèlʼe.
15 Mii à dá lire na,
lire e,
mii la mpyi si sà fworo yii na,
si ɲwɔ yii na sahaŋki.
16 Mii la mpyi si ntòro yii yyére,
si ŋkàre Masedoni kùluni i,
si yîri wani,
si núru mpa yii yyére,
bà yii si mpyi si mii tɛ̀gɛ mii i jà a kàre Zhude kùluni i mɛ.
17 Ɲyɛ mii ɲyɛ a pa shà mɛ,
lirʼà li cyêe na li ɲyɛ a mpyi mii sèe na mà?
Taha mii na na karigii pyi mà tàanna ná diɲyɛŋi sùpyire pyiŋkanni i,
maha jwo:
«ɔɔn» maa núrʼa kɛ̂ɛnŋʼa jwo:
«ɔnhɔ» la?
18 Kile u ɲyɛ ɲwɔmɛɛ niŋkin fooŋi ke,
uru u ɲyɛ mii shɛ̀rɛfooŋi,
mpe mii à jwo yii á ke,
puru ɲyɛ a mpyi:
«ɔɔn» ná «ɔnhɔ» tanuge e mɛ.
19 Ɲaha na yɛ Kile Jyaŋi Yesu Kirisita kyaa mii ná Silivɛn ná Timɔti à jwo yii á ke,
uru mú mpyi na «ɔɔn» ná «ɔnhɔ» yu kani ninuuni i mɛ,
ɲwɔmɛɛ niŋkinfoo u ɲyɛ u wi.
20 Uru cye kurugo,
Kile ɲwɔmyahigii puni maha fûnŋɔ,
uru cye kurugo mú,
wuu maha jwo:
«Amiina» maa Kile mɛge pêe.
21 Kile yabiliŋi u maha wuu ná yii fànhe ɲyahage Kirisita wwoɲɛɛge e,
uru mú u à wuu cwɔɔnrɔ mà pyi uye wuu,
22 maa u fyèŋi bwɔ̀n wuu na,
maa u Munaani le wuu e.
Lire kurugo yacɛnyi sanɲyi Kile à bégelʼa yaha wuu mɛɛ na ke,
wuu à tɛ̀ɛn ná lʼe na wuu sí yire ta.
23 Yii li cè,
mii la ɲyɛ a mpyi si ŋgaha nɔ yii na mɛ,
lire kurugo mii ɲyɛ a núrʼa shà wani yii yyére Kɔrɛnti kànhe e mɛ.
Mii aha finɛ,
Kile kà na yaha mɛ,
uru u ɲyɛ mii shɛ̀rɛfooŋi.
24 Wuu ɲyɛ na ŋko si fànha cyán yii na yii ɲaaraŋkanni i Kile kuni i mɛ,
ɲaha na yɛ yii à fànha ta lʼe.
Ŋka wuu la na ɲyɛ si yii tɛ̀gɛ bà yii funɲyi si mpyi si ntáan mɛ.