Wyɛ́rɛŋi Kɔrɛnti dánafeebilʼà bínni si ntɛ̀gɛ Zheruzalɛmu wuubii tɛ̀gɛ ke
16
Ɲyɛ mii cìnmpyiibii,
wyɛ́rɛŋi u ɲyɛ na bínnini si ntɛ̀gɛ Kile wuubii tɛ̀gɛ Zheruzalɛmu kànhe e ke,
yii mú à yaa yii a lire pyi bà mii à yi jwo Galati kùluni dánafeebii kuruɲyʼá mɛ.
2 Cibilaaga maha cibilaaga,
canɲcyiigea yii shin maha shin à yaa u wwû u ɲùŋɔ wyɛ́rɛŋi i,
mà tàanna ná u cyentage e,
u yaha uye kanni na,
bà li si mpyi mii aha nta si nɔ yii yyére ke,
mii i sà uru wyɛ́rɛŋi ta u à bínnʼa kwɔ̀ mɛ.
3 Mii aha bú nɔ wani tèni ndemu i ke,
tùnntunmpii yii sí n‑cwɔɔnrɔ ke,
mii sí sémɛ taha pire na ná wyɛ́rɛŋi i pi sà ŋkan Zheruzalɛmu kànhe e.
4 Lʼaha mii kakarala kwɔ̀,
mii ná pire sí n‑kàre siɲcyan.
5 Mii la ɲyɛ si ɲara pyi Masedoni kùluni i,
si nta raa sì yii yyére,
ɲaha na yɛ mii la ɲyɛ si ntòro Masedoni i.
6 Mii aha nɔ wani yii yyére,
shwɔhɔlʼe mii sí tère nimbilere,
lire ɲyɛ mɛ mii sí wyeere tèni pyi ná yii e,
bà yii si mpyi si mii tɛ̀gɛ mii i na tashage ta mɛ.
7 Ɲaha kurugo yɛ numɛ tɔɔge e,
mii la ɲyɛ sì sà yii ɲya kanna si ntòro mɛ,
ŋka mii la ɲyɛ si tère pyi yii taan,
Kafooŋi ká ɲɛɛ.
8 Ŋka lire ná li wuuni mú i,
mii sí n‑kwôro Efese kànhe e,
fo zà nɔ Pantekɔtiŋi kataanni na,
9 ɲaha na yɛ Kile à sàa li laage kan mii á,
mii u báarabwɔhɔ pyi wani,
ali mà li ta mii zàmpɛɛnbilʼà ɲyaha wani.
10 Timɔti ká nɔ wani yii yyére,
yii i u cùmu lemɛ ɲwɔ,
bà li si mpyi u àha bú ŋkwɔ̀ màban fô uye na mɛ,
ɲaha na yɛ u na báare mii fiige Kafooŋi á.
11 Yii àha ŋkwɔ̀ u wíi ɲcwô mɛ!
Yii u tɛ̀gɛ u kùsheeni na bà u niɲcɛnŋɛ wu si mpyi si nɔ mii na mɛ,
ɲaha na yɛ mii ná cìnmpyiibii naha na u sigili naha.
12 Nde li ɲyɛ wuu cìnmpworoŋi Apolosi u kàmpanŋke ke,
mii à màban le u e sèlʼe,
bà u ná cìnmpyiibii sanmpii si mpyi si sà fworo yii na mɛ.
Ŋka u à yi jwo mii á na sèeŋi na,
li tèni sàha nɔ mɛ.
Li tèni ká nɔ u á,
u sí li pyi.
13 Yii kwôro ɲyii na,
yii yiye waha yii i ŋkwôro Kile kuni i,
yii àha màban yaha u fô yii na mɛ,
yii fànha le.
14 Ntàannamagarʼà yaa tʼa ɲaa yii kapyiiŋkii puni i.
15 Mii cìnmpyiibii,
mii sí kyaa niŋkin cya yii á sahaŋki.
Yii à li cè na Sitefanasi ná u pyɛngɛ shiinbii pi à pyi dánafeebii niɲcyiibii Akayi kùluni i,
pi à piye pwɔ Kile wuubii ntɛ̀gɛŋi na mú.
16 Yii à yaa yii a núru tire sùpyire shiŋʼá,
mà bâra mpii puni pi à piye pwɔ Kile báaraŋi na ke.
17 Mii funntanga wu u ɲyɛ,
ɲaha na yɛ Sitefanasi ná Foritunatusi ná Akayikusi naha ná mii i.
Yii nʼa mpyi naha,
nde yii mpyi na sí n‑pyi ke,
pi à lire pyi.
18 Pi à mii funŋke ɲíŋɛ,
bà pi à yii funɲyi ɲíŋɛ mɛ.
Yii a nte sùpyire shiŋi mɛtanga yiri.
19 Azi kùluni dánafeebii kuruɲyʼà yii shɛ́ɛre.
Akilasi ná Pirisili à yii shɛ́ɛre ná dánafeebii pi ɲyɛ na bínnini pi pyɛnge e ke,
pirʼà yii shɛ́ɛre sèlʼe Kafooŋi mɛge na.
20 Mii cìnmpyiibii punʼà yii shɛ́ɛre.
Yii a cìnmpworogo fwùŋi kaan yiyʼá ná funɲcɛnŋi i.
21 Mii Poli yabiliŋi u à ŋge fwùŋi sémɛ ná na cyɛge e.
22 Kafooŋi kyaa ká nta lʼà pɛn ŋgemu á ke,
Kile u urufoo láŋa.
«Kafooŋi,
ta ma!»
23 Kafooŋi Yesu u ɲwɔ yii na,
u u jwó le yii á!
24 Yii mú puni kyalʼà táan mii á,
Yesu Kirisita wwoɲɛɛge e.