Kile tùnnturʼà yaa tʼa mpyi dánafeebii shɛɛnre niɲcente e
14
Lire kurugo ntàannamagarʼà yaa ti pyi yii yacyage niɲcyiige.
Kile Munaani maha màkanyi ɲjemu kaan ke,
yii raa yire caa mú.
Ŋka Kile tùnnture ɲjwuŋi màkange wuuni lʼà lyɛ.
2 Ɲaha kurugo yɛ shinŋi u ɲyɛ na shɛɛnre tabɛrɛ yu ke,
ná sùpyire e bà urufoo maha yu mɛ,
ná Kile e u maha yu,
ɲaha na yɛ wà ɲyɛ na u jwumpe yyaha cìni mɛ.
Karigii cyi ɲyɛ cyi yyaha ɲyɛ a cè mɛ,
Kile Munaani sífente cye kurugo u maha cyire kyaa yu.
3 Ŋka ŋgemu u ɲyɛ na Kile tùnnture yu ke,
ná sùpyire e urufoo maha yu,
maa ti tɛ̀re ti i sì yyaha na Kile kuni i,
maa màban leni tʼe,
maa ti zòmpyaagii tàali.
4 Shinŋi u ɲyɛ na yu shɛɛnre tabɛrʼe ke,
ti maha urufoo kanni tɛ̀re u u sì yyaha na Kile kuni i.
Mà li ta shinŋi u ɲyɛ na Kile tùnnture yu ke,
urufoo maha dánafeebii kuruŋke puni tɛ̀re pi i sì yyaha na Kile kuni i.
5 Yii puni ká a jìni na shɛɛnre tabɛrɛ yu,
lirʼà táan mii i.
Ŋka nde lʼà táan mii i sèe sèlʼe ke,
lire li ɲyɛ yii puni pi a Kile tùnnture yu.
Kile tùnnture jwufooŋi tayyéregʼà fànha tò shɛɛnre tabɛrɛ jwufooŋi woge na,
fo wà ha nta na tire shɛɛnre kɛ̂ɛnŋi,
bà ti si mpyi si dánafeebii kuruŋke tɛ̀gɛ pi a sì yyaha na Kile kuni i mɛ.
6 Mii cìnmpyiibii,
yii yabilimpii pi li kàanmucya a wíi kɛ!
Mà jwo mii u pa Kile tùnnture tà jwo yii á,
si kani là cyêe yii na Kile kuni i,
lire ɲyɛ mɛ si yɛrɛge kà kan yii á ke,
kampyi shɛɛnre tabɛrʼe mii mpyi a pa jwo ná yii e,
ɲaha tɔ̀ɔn yii mpyi na sí n‑ta lire e yɛ?
7 Nde li ɲyɛ yatinɲyi kàmpanŋke,
mu à jwo tìinmpini,
lire ɲyɛ mɛ ŋkɔ̀nnɔŋi ke,
kuru ká mpyi ku ɲyɛ a bwɔ̀n ku bwɔ̀nŋkanna na mɛ,
mɛɛni li ɲyɛ na bwùun ke,
di wà sí n‑jà lire cè n‑jwo yɛ?
8 Tìinmpini pi maha wyì maha ntɛ̀gʼa kàshikwɔɔnbii wà piye na ke,
ná lire ɲyɛ a wyì li wyìŋkanna na mɛ,
jofoo u sí uye bégele kàshige mɛɛ na yɛ?
9 Amuni li mú ɲyɛ yii á,
yii pi ɲyɛ na yu shɛɛnre tabɛrʼe ke,
yii lógofeebii ká mpyi pi ɲyɛ na yii jwumpe núru mɛ,
ɲje yii ɲyɛ na yu ke,
di pi sí yire cè n‑jwo yɛ?
Li maha mpyi mu à jwo ná kafɛɛge e yii ɲyɛ na yu.
10 Shɛɛnre shiŋʼà ɲyaha diɲyɛŋi i,
ŋka tire shɛɛnre puni na núru ti jwufeebilʼá.
11 Mii aha mpyi mii ɲyɛ na shɛɛnre tà núru mɛ,
ti jwufooŋi maha mpyi nàmpɔnŋɔ mii á,
mii mú maha mpyi nàmpɔnŋɔ ti jwufooŋʼá.
12 Ɲyɛ ná Kile Munaani màkanyi lage sí ɲyɛ yii na,
ɲje yi sí n‑sìi n‑jà dánafeebii pyi pi a sì yyaha na Kile kuni i ke,
yii a yire caa ná yii cyeyi shuunniŋi i.
13 Lire kurugo shinŋi u ɲyɛ na shɛɛnre tabɛrɛ yu ke,
urufoo u a Kile ɲáare,
bà u si mpyi sʼa ti kɛ̂ɛnŋi mɛ.
14 Ɲaha kurugo yɛ mii aha a Kile ɲáare shɛɛnre tabɛrʼe,
mii kɔni maha mpyi Kileɲarege na,
ŋka mii ɲyɛ na na jwumpe yyaha cìni mɛ.
15 Lire e ke ɲaha mii à yaa mii u pyi yɛ?
Mii sí n‑jà raa Kile ɲáare shɛɛnre tabɛrʼe,
ŋka shɛɛnre mii à cè ke,
mii mú sí n‑jà raa u ɲáare tire shɛɛnre e.
Mii sí n‑jà raa Kile pèente myahigii cêe shɛɛnre tabɛrʼe,
ŋka shɛɛnre mii à cè ke,
mii mú sí n‑jà raa cyi cêe tire shɛɛnre e.
16 Ɲyɛ mu aha a fwù kaan Kile á shɛɛnre tabɛrʼe,
wà ha nta dánafeebii kuruŋke e ŋgemu u ɲyɛ u ɲyɛ na tire shɛɛnre núru mɛ,
di urufoo sí n‑jà n‑jwo:
«Amiina» mà li ta u ɲyɛ a mu jwumpe lógo mà yɛ?
17 Mu fwùŋi niŋkanŋi mɛ́ɛ ká nta u à ɲwɔ sèlʼe,
u sì n‑jà urufoo tɛ̀gɛ Kile kuni i mɛ.
18 Mii à Kile shɛ́ɛre,
ɲaha na yɛ u à mii tɛ̀gɛ mii à jà na yu shɛɛnre sannte e mà tòro yii puni na.
19 Ŋka lire ná li wuuni mú i,
mii aha mpyi dánafeebii kuruŋke e,
mà ɲwɔɲyɛya kaŋkuro kanna jwo dánafeebii shɛɛnre nindogore e,
mii maha lire funŋɔ lwɔ́ maha ntòro mii u canmpuni lwɔ́ jwumpe na shɛɛnre tabɛrʼe pi ɲyɛ na tire ntemu núru mɛ.
20 Mii cìnmpyiibii,
yii àha raa sɔ̂nŋi nàŋkopyire sɔ̀nŋɔŋkanni na mɛ.
Ŋka kapegigii kàmpanŋke na,
yii yiye pyi pìnmpinɲyɛyɛ fiige.
Yákilifente kàmpanŋke na,
yii yiye pyi shinlyee.
21 Yʼà sémɛ Kile Jwumpe Semɛŋi i na Kafooŋi Kile à jwo:
«Nàmpwuunbii pìi mii sí n‑tun na shiinbilʼá.
Pire sí n‑jwo ná pi e shɛɛnre tabɛrʼe.
Ŋka lire ná li wuuni mú i,
pi sì mii ɲwɔmɛɛni cû mɛa.»
22 Mà tàanna ná lire katoroŋkwooni i,
ɲje mii sí n‑jwo ke,
yire yi ɲyɛ:
wà ha shɛɛnre tabɛrɛ jwo,
mpii pi ɲyɛ pi ɲyɛ Kile kuni i mɛ,
lire maha li cyêe pire na na Kile sí yoge kwɔ̀n pire na.
Puru jwumpe ɲyɛ a yyaha tíi ná dánafeebilʼe mɛ.
Wà ha Kile tùnnturo jwo,
lire maha li cyêe dánafeebii na na Kile ɲyɛ pi shwɔhɔlʼe.
Mpii pi ɲyɛ pi ɲyɛ Kile kuni i mɛ,
puru jwumpe ɲyɛ a yyaha tíi ná pire e mɛ.
23 Ɲyɛ lʼaha mpyi kee yii dánafeebii kuruŋkʼà bínni,
ka yii puni si wá na shɛɛnre tabɛrɛ yu,
shincyi ká mpa yii ta purʼe,
ŋgemu u ɲyɛ u ɲyɛ a Kile cè mɛ,
tá u sí n‑jwo na yii funɲyʼà shwɔ yii na mɛ?
24 Ŋka lʼaha mpyi mu à jwo Kile tùnnture yii ɲyɛ na yu,
ka u u mpa jyè yii kuruŋke shwɔhɔlʼe,
u aha yii jwumpe lógo,
lire sí u pyi u cè na sèeŋi yii ɲyɛ na yu,
si u pyi u cè na uru kapyiiŋkii ɲyɛ a tíi mɛ.
25 Yaaga maha yaaga kʼà ŋwɔhɔ urufoo zòŋi na ke,
yire puni sí n‑yige cyíinŋi na,
fo u sí yyahe cyígile si niŋkure sín si Kile kêe,
si jwo sèeŋi na,
Kile na ɲyɛ yii shwɔhɔlʼe.
Kile pèente karigii sogolo ŋkannʼà yaa li ɲwɔ
26 Mii cìnmpyiibii,
yii à yaa yii ndemu pyi ke,
lire li ɲyɛ:
yii aha yiye bínni Kile pèente mɛɛ na,
mɛɛ ká mpyi wà á,
urufoo u li cêe.
Yɛrɛgɛ jwumɔ ká mpyi wà á,
urufoo u pu jwo,
Kile ká nta u à kani là cyêe wà na,
urufoo u li jwo.
Kile ká nta u à shɛɛnre tabɛrɛ le wà ɲwɔ e,
urufoo u ti jwo.
Kile ká nta u à pyiŋkanna kan wà á u u jà a tire shɛɛnre kɛ̂ɛnŋɛ,
urufoo u ti kɛ̂ɛnŋɛ.
Ŋka cyire karigii punʼà yaa cyi dánafeebii tɛ̀gɛ pi a sì yyaha na Kile kuni i.
27 Mpii pi ɲyɛ na shɛɛnre tabɛrɛ yu ke,
pire ɲyɛ a yaa pi tòro shiin shuunni taanre na mɛ,
pi raa yu niŋkin niŋkin,
li i nta wà mú na ɲyɛ wani ŋgemu u sí n‑jà raa tire shɛɛnre kɛ̂ɛnŋi ke.
28 Kɛ̀ɛnŋɛfoo ká mpyi u ɲyɛ a ta tire shɛɛnre na mɛ,
ti jwufeebilʼà yaa pi fyâha,
pi raa yu piye funŋʼi ná Kile e.
29 Nde li ɲyɛ Kile tùnntunmpii kàmpanŋke ke,
pire shiin shuunni taanrʼà yaa pi a yu niŋkin niŋkin.
Pi sanmpii sʼa pi jwumpe núru pi raa pu kàanmucaa.
30 Ŋka Kile ká nta u à kani là cyêe wabɛrɛ na,
ŋgemu u à fyânha a jwumpe lwɔ́ ke,
urʼà yaa u fyâha,
u u u yaha u li jwo.
31 Yii ɲyɛ a yaa yii bínni yii a Kile tùnnture yu mɛ,
yii a ti yu niŋkin niŋkin,
bà ti si mpyi si dánafeebii le kurʼe,
si màban le pi e mɛ.
32 Yii li cè na li síŋi ɲyɛ Kile tùnntunŋi na mà jà a cû u ɲwɔge na,
si pi sanmpii yaha pi jwo a kwɔ̀.
33 Ɲaha kurugo yɛ ɲyàhaŋguruguŋi ɲyɛ a táan Kile á mɛ,
mà karigii yalʼa sogolo yyeɲiŋke e,
lire lʼà táan u á,
bà li ɲyɛ na mpyi dánafeebii kuruɲyi puni i mɛ.
34 Cyeebilʼà yaa pi fyâha mpìnniŋi cyeyi i,
ɲaha na yɛ kuni ɲyɛ a kan pi á,
pi jà pi a yu yire cyeyi i mɛ.
Pi à yaa pi piye tîrige,
bà Musa Saliyaŋi à yi jwo mɛ.
35 Pi la ká mpyi si yibige pyi cyage kà na,
pi aha nɔ pyɛngɛ pi kuru yibige pyi pi nàmbaabii na.
Ɲaha kurugo yɛ li lempʼà pi ceewe u a jwumpe lwúu dánafeebii kuruŋke eb.
36 Taha yii na sɔ̂nŋi na yii baga jwumɔ pu ɲyɛ Kile jwumpe?
Lire ɲyɛ mɛ,
taha yii na sɔ̂nŋi na yii kanni na puru jwumpʼà nɔ?
37 Wà ha nta u u sɔ̂nŋi na Kile Munaani maha jwumpe leni uru ɲwɔ e na yu pi sanmpilʼá,
u li cè na yɛrɛge mii ɲyɛ na sémɛni si ŋkan yii á amɛ ke,
kurʼà fworo Kafooŋi Yesu i.
38 Wà ha ŋke yɛrɛge jwumpe cyé,
yii àha núru urufoo le laage e mɛ.