Poli à jwo yasunɲyi kyaare kyaa na
8
Nde li ɲyɛ yasunɲyi kyaare kàmpanŋke ke,
bà yii à yi jwo na wuu mú punʼà kyaa cè mɛ,
yire na ɲyɛ sèe.
Ŋka mà li yaha maye funŋʼi na mu à kyaa cè,
lire maha sùpyaŋi pyi u à uye pêe.
Mà li ta ntàannamagare maha pi sanmpii tɛ̀gɛ sèlʼe pi i sì yyaha na Kile kuni i.
2 Wà ha nta u u sɔ̂nŋi na urʼà kyaa cè,
urufoo u li cè na yaaga saha a urufoo fô.
3 Ŋka ŋgemu u à sùpyire sannte kyaa táan uyʼá ke,
urufoo maha mpyi Kile cevooa.
4 Yibige yii à pyi na:
«wuu sí n‑jà raa yasunɲyi kyaare kyàa laa,
wuu sì n‑jà raa ti kyàa mɛb?»
ke,
mii sí yii ɲwɔ shwɔ numɛ.
Wuu à li cè na sùpyire maha sɔ̂nŋi na yasunɲyi yi ɲyɛ pire u kileebii mà li ta yire yasunɲyi ɲyɛ Kile mɛ,
Kile na ɲyɛ niŋkin.
5 Li mɛ́ɛ ká nta sùpyire na nìɲyiŋi yaayi yà ná ɲìŋke wuyi yà sɔ̂nŋi kileebii pìi,
maa sɔ̂nŋi na kafeebilʼà ɲyaha pirʼá,
6 wuu kɔnʼá,
Kile na ɲyɛ niŋkin,
uru u ɲyɛ wuu Tuŋi,
maa mpyi yaayi puni Davooŋi,
uru mɛɛ na wuu ɲyɛ shì na.
Kafoo niŋkin mú sí u ɲyɛ,
uru u ɲyɛ Yesu Kirisita.
Uru cye kurugo,
Kile à yaayi puni dá maa shìŋi kan wuu á mú.
7 Ŋka dánafeebii puni ɲyɛ a uru sèeŋi cè mɛ.
Pìi na ɲyɛ pi e,
zunŋi mpyi a tatɛɛngɛ wwû pi e,
ali niɲjaa pi aha ntòrʼa yasunŋɔ kyara kyà,
pi maha sɔ̂nŋi na pire saha na zunŋi pyi.
Pi ɲyɛ a sèeŋi cè sèlʼe mɛ,
lire e pi maha sɔ̂nŋi na yasunɲyi kyaare maha pire ná Kile shwɔ̀hɔŋi kɛ̀ɛge.
8 Li ɲyɛ mu à jwo yalyige ku maha wuu kyaa táan Kile á mà dɛ!
Wuu à lyî yo,
lire sì yafyin bâra wuu ná Kile shwɔ̀hɔŋi na mɛ.
Wuu ɲyɛ a lyî mà yo,
lire sì yafyin yige wuu ná Kile shwɔ̀hɔŋi i mɛ.
9 Ti ɲjyìŋi ná ti ɲjyìmbaaŋi i,
nde lʼà táan yii á ke,
yii sí n‑jà lire pyi.
Ŋka yii a yiye kàanmucaa,
mpii pi ɲyɛ pi sàha ŋkwɔ̀ a Kile kuni karigii yyaha cè sèlʼe mɛ,
bà li si mpyi yii àha mpyi kaɲuŋɔ si pire wurugo mɛ.
10 Mu u ɲyɛ na maye sɔ̂nŋi na mu à kyaa cè ke,
mpii pi ɲyɛ pi ɲyɛ a sèeŋi cè sèlʼe mɛ,
uru wà ká mu ɲya mu à tɛ̀ɛn yasunŋke kà tasunŋʼi na lyî,
tá lire sì màban lèŋɛ urufolʼe yasunɲyi kyaare ŋkyàŋi na mɛ?
11 Lire ká mpyi,
uru cìnmpworoŋi kurugo Kirisita à kwû mú ke,
tá mu u ɲcèŋi shiŋi sì n‑pyi kaɲuŋɔ si uru wuuni pyi li kɛ̀ɛge mɛ?
12 Mu aha lire pyi,
mu maha uru cìnmpworoŋi yakɛ lwɔ́,
ɲaha na yɛ kani u ɲyɛ na sɔ̂nŋi kapyimbaala ke,
li maha mpyi kee mu à u sɔ̀n a wà lire na.
Lire mpyiŋi tooyʼe,
Kirisita na mu maha lire kapiini pyi.
13 Lire kurugo kampyi yalyige kà ku sí n‑pyi kaɲuŋɔ mii i na cìnmpworoŋi wà yaha u kapii pyi,
mii sí raa kuru yalyige fún,
bà li si mpyi mii àha ŋkwɔ̀ na cìnmpworoŋi ɲùŋɔ kyán mɛ.