Poli ɲyɛ a Kile jwumpe jwo ná sùpyire yákilifente e mɛ
2
Mii cìnmpyiibii,
tèni i mii à sà Kile jwumpe jwo yii yyére ke,
mii ɲyɛ a naye pêe na mii à jwumpe cè,
lire ɲyɛ mɛ na mii yákiliŋʼà pêe mà tòro pi sanmpii wuŋi na mɛ.
2 Ɲaha kurugo yɛ mii ɲyɛ a li lwɔ́ naye funŋʼi,
si yaage kabɛrɛ kyaa jwo yii á,
Yesu Kirisita kàntugo na mɛ,
si u kwùŋi kyaa jwo yii á kworokworocige na.
3 Mii fànhe mpyi a cyɛ́rɛ wani yii shwɔhɔlʼe,
fyagare mpyi maha mpyi mii na fo mii mpyi maha ɲcyɛ̂ɛnni sèlʼe.
4 Tère o tère e mii à Jwumpe Nintanmpe jwo yii á ke,
ná sùpyire yákilifente e bà mii mpyi maha pu yu si nta yii ɲùmbogigii kɛ̂ɛnŋɛ ná pʼe mɛ.
Ŋka ná Kile Munaani sífente e mii mpyi maha pu yu,
5 bà li si mpyi yii dániyaŋi kà ntaha sùpyire yákilifente na mɛ,
fo Kile sífente.
Kile maha u yákilifente kaan wuu á, u Munaani cye kurugo
6 Kile jwumpʼà tatɛɛngɛ wwû mpiimu zòmpyaagilʼe ke,
pire maha yákilifente taa wuu jwumpe e.
Ŋka Kile sí n‑pa ŋge diɲyɛŋi sùpyire ná u ɲùŋufeebii mpiimu shi bò ke,
yákilifente ti ɲyɛ pirʼá ke,
tire shiŋi bà mɛ.
7 Kile yákilifente shɛnrɛ wuu ɲyɛ na yu ke,
sùpya mpyi a ti shi cè mɛ,
ɲaha na yɛ Kile mpyi a ti ŋwɔhɔ.
Mà jwo diɲyɛŋi u dá ke,
Kile mpyi a lire kaŋwɔhɔni yaa,
bà wuu si mpyi si mpyi shinbwoo si ntɛ̀ɛn ná u e u cyage nisinaŋke e mɛ.
8 Ŋge diɲyɛŋi ɲùŋufooŋi wà ɲyɛ a tire yákilifente cè mɛ.
Ná lire bà mɛ,
pi mpyi na sì ɲɛɛ Kafooŋi Peentefoo kwòro kworokworocige na mɛ.
9 Bà lʼà sémɛ Kile Jwumpe Semɛŋi i na:
«Sùpya ɲyii sàha ŋkwɔ̀ a ndemu ɲya mɛ,
ná niŋgyii sàha ŋkwɔ̀ a li lógʼa ɲya mɛ,
ná li sàha ŋkwɔ̀ a tîge sùpya funŋʼi mà ɲya mɛ,
mpii pi à Kile kyaa táan piyʼá ke,
lire u à bégelʼa yaha pire mɛɛ naa.»
10 Wuu pi ke,
Kile à lire kani cyêe wuu na,
u Munaani cye kurugo.
Lire li maha karigii puni yyaha caa,
ali karigii Kile à ŋwɔhɔ ke,
li maha cyire puni yyaha caa,
si cyi cè,
11 bà li ɲyɛ sùpya sì n‑jà u supyiɲɛɛŋi funzɔnŋɔre cè ná u yabiliŋi bà mɛ,
amuni li mú ɲyɛ sùpya sì n‑jà Kile funŋɔ karigii cè mɛ,
Kile Munaani kanni lʼà cyi cè.
12 Wuu sí pi ke,
Kile à u Munaani le wuu e,
lire lʼà wuu ná sùpyire sannte sɔ̀nŋɔŋkanni pyi lʼà wwû liye e.
U à lire pyi bà li si mpyi,
u à ɲwɔ wuu na maa yaayi ɲjemu kan wuu á ke,
wuu u yire cè mɛ.
13 Ná sùpyire yákilifente e bà wuu ɲyɛ na yire yaayi kyaa yu mɛ.
Ŋka Kile Munaani à ndemu cyêe wuu na ke,
lire wuu ɲyɛ na yu sùpyirʼá,
wuu na li yu bà Kile Munaani à li jwo mɛ.
14 Ŋka Kile Munaani ká mpyi li ɲyɛ a tɛ̀ɛn sùpyaŋi ŋgemu i mɛ,
urufoo ɲyɛ na ɲɛɛge Kile Munaani karigii na mɛ,
ɲaha na yɛ u maha cyire karigii sɔ̂nŋi sìɲcomɔ.
U sì n‑jà cyi yyaha cè mɛ,
ɲaha na yɛ Kile Munaani kanni cye kurugo sùpyaŋi maha jà a cyi yyaha cè.
15 Kile Munaani ɲyɛ sùpyaŋi ŋgemu i ke,
uru u maha yaayi puni cè a wwû yiye e.
Shintiiwe mú sí ɲyɛ na n‑jà a urufoo kapyiiŋkii cè a wwû cyiye e mɛ.
16 Yire yʼà sémɛ Kile Jwumpe Semɛŋi i na:
«Sùpya ɲyɛ a sìi ŋgemu u à Kafooŋi funzɔnŋɔre cè mɛ?
Sùpya mú ɲyɛ a sìi ŋgemu u sí n‑jà u yɛrɛ mɛb.»
Ŋka wuu pi ke,
Kile Munaani ɲyɛ wuu mpiimu i ke,
wuu à Kirisita funzɔnŋɔre cè.